Свет

У межах свайго візіту ў Вену (Аўстрыя) сербскі патрыярхі Ірыней выступіў з прамовай, у якой заклікаў да прымірэння каталіцкі Касцёл і праваслаўную Царкву. “Мы павінны зрабіць усё, каб гэтыя Цэрквы вярнуліся адна да аднае, каб шляхі, якія раздзяляюцца, зноў зблізіліся, бо такая ёсць Божая воля”, — падкрэсліў кіраўнік сербскай праваслаўнай Царквы.

Брат Леапольд Маркуэз Санхэз, іспанскі капуцын, які жыў у XIX і XX стагоддзях, стаў благаславёным. 12 верасня б.г. арцыбіскуп Анжэла Амата, прэфект Кангрэгацыі па кананізацыйных справах, узначаліў урачыстасці ў Гранадзе.

Па запрашэнні вармінскага Мітрапаліта арцыбіскупа Войцеха Зембы 12 верасня 2010 г. Мінска-Магілёўскі Мітрапаліт арцыбіскуп Тадэвуш Кандрусевіч наведаў Гетшвалд (Польшча), дзе ўзначаліў адпустовыя ўрачыстасці ў гонар Божай Маці ў санктуарыі Гетшвалдскай Божай Маці, што ў 20 кіламетрах ад Ольштына.
    Санктуарый у Гетшвалдзе бярэ свае вытокі ад цудоўнага абраза Гетшвалдскай Божай Маці, першыя звесткі аб якім вядомы з 1568 г. Сваю славу ён, аднак, атрымаў пасля аб’яўленняў Божай Маці, што адбыліся з 27 чэрвеня да 16 верасня 1877 г. Тады Панна Марыя першы раз аб’явілася дзецям на клёне, а 8 верасня благаславіла крынічку, адкуль да сённяшняга дня людзі чэрпаюць цудатворную ваду. Менавіта таму Гетшвалдскі санктуарый часта называюць вармінскім Лурдам. Цікава таксама тое, што зараз завяршаецца беатыфікацыйны працэс адной з гетшвалдскіх візіянерак — сястры з супольнасці Сёстраў міласэрнасці св. Вінцэнта дэ Поля с. Барбары Самулоўскай, якая памерла ў 1950 г.
    У наш час Гетшвалдскі санктуарый з’яўляецца адным з найбольш вядомых у паўночна-заходняй Польшчы. І на гэты раз у адпустовых урачыстасцях прынялі ўдзел каля 40 тысяч вернікаў.

1 студзеня 2010 г. адкрыццём Святых дзявярэй, так званых Дзвярэй прабачэння,пачаўся чарговы 119 год св. Якуба ў катэдры ў Сантьяга дэ Кампастэла.
    Юбілейны Святы год абвяшчаецца ў Сантьяга дэ Кампастэла ва ўсе тыя гады, калі свята апостала Якуба ( 25 ліпеня) прыходзіцца на нядзелю. А такая магчымасць з’яўляецца кожныя 6, 5, 6 і 11 гадоў. Вернікі, якія наведаюць магілу св. Якуба ў катэдры ў Сантьяга дэ Кампастэла ў Іспаніі ці ў іншым месцы, дзе знаходзяцца рэліквіі св. Якуба, адгавораць малітвы ў інтэнцыях Папы, і 15 дзён перад ці 15 дзён пасля наведвання магілы пабудуць у споведзі і прымуць св. Камунію, атрымаюць поўны адпуст. Першы Святы год, устаноўлены Святым Айцом Калікстам II, прыходзіўся на 1120 год, а наступны адкрыццём Святых дзвярэй, так званых будзе адзначацца ў 2021 годзе. †

9-11 ліпеня 2010 г.11 ліпеня б.г. біскуп Аляксандр Кашкевіч цэлебраваў св. Імшу і абвясціў казанне для ўдзельнікаў парафіяды дзяцей і моладзі ў Варшаве.

23 – 24 чэрвеня 2010 г. кіраўнік аддзелу знешніх царкоўных сувязяў Маскоўскага Патрыярхату, Мітрапаліт Валакаламскі Іларыён знаходзіўся з працоўным візітам у Польшчы. Іерарх удзельнічаў у чарговым туры размоў паміж каталіцкім Касцёлам і праваслаўнай Царквой аб польска-расійскім паяднанні. Мітрапаліт падкрэсліў, што Цэрквы павінны ліквідаваць гістарычныя непаразуменні і жадаюць развіваць выключна царкоўны дыялог. «Патрыярх Кірыл хацеў бы прыехаць у Польшчу, і я лічу, што падпісанне дакументу аб паяднанні паміж Цэрквамі было б добрай нагодай для такога візіту», — адзначыў мітрапаліт.

4–6 чэрвеня 2010 г. Святы Айцец Бэнэдыкт XVI наведаў Рэспубліку Кіпр – краіну, дзе большасць насельніцтва – праваслаўныя. З 600 тысяч жыхароў дзяржавы амаль 25 тысяч чалавек належаць да каталіцкага Касцёла. Папа ўручыў патрыярхам усходніх Касцёлаў і біскупам Instrumentum laboris сходу спецыяльнага сіноду біскупаў для Блізкага Усходу, які адбудзецца ў кастрычніку 2010г.
    На экуменічнай сустрэчы 4 чэрвеня ў Пафасе Бэнэдыкт XVI заахвоціў памаліцца за адзінства ўсіх вучняў Хрыста. На сустрэчы побач са Святым Айцом і кіраўніком праваслаўнай Царквы на Кіпры арцыбіскупам Хрызастомам II былі таксама хрысціяне іншых веравызнанняў, якія належаць да армянскай, лютэранцкай і англіканскай супольнасцяў.
    Адна з мэтаў папскага паломніцтва - гэта ўзмацненне духу католікаў, якія жывуць на Кіпры і на Блізкім Усходзе. Папа заахвоціў кіпрскіх католікаў, каб яны “дапамагалі ствараць такі ўзаемны давер паміж хрысціянамі і нехрысціянамі як аснову для стварэння трывалага міру і згоды паміж народамі розных рэлігій, палітычных рэгіёнаў і культурных каранёў”. Практычным прыкладам міжрэлігійнага дыялогу была неспадзяваная сустрэча Папы з адным з духоўных аўтарытэтаў мусульманскай супольнасці на Кіпры 89-ці летнім шэйхам Мухамедам Назім Абіл Аль-Хаггані. Шэйх абняў Папу і папрасіў яго аб малітве.

9 тысяч ксяндзоў з 91 краінаў свету прыняло ўдзел у трохдзённай сустрэчы ў Рыме, якая закончыла год Святарства, які быў пачаты 19 чэрвеня 2009 г. і абвешчаны Папам у сувязі са 150-ай гадавінай смерці св. Яна Марыі Віянэя, пробашча з Арс. У 1929 годзе гэты святар быў названы папам Піем XI заступнікам пробашчаў. 11 чэрвеня б.г. Святы Айцец Бэнэдыкт XVI быў галоўным цэлебрантам св. Імшы на плошчы імя св. Пятра ў Рыме, якую разам з ім канцэлебравала 15 тысяч святароў з усяго свету. У гаміліі Папа звярнуў увагу на самыя важныя праблемы і пытанні, якія стаяць перад Касцёлам і духавенствам.