Варта ведаць

•  Пробашч рымска-ката­ліцкай парафіі Беззаганнага Зачацця НПМ у Слоніме (Гродзенская дыяцэзія) кс. Ігар Анісімаў праспяваў для маладых падчас шлюбу знакамітую песню “Алелюя” Леанарда Коэна на рускай мове. Нагадаем, нядаўна каталіцкі святар з Ірландыі стаў знакамітасцю на YouTube пасля таго, як праспяваў “Алелюя” на шлюбе пары ў яго парафіі і набраў дзясяткі мільёнаў праглядаў. Як і ў выпадку з ірландскімі маладымі, беларуская пара і вернікі былі ў шоку ад сюрпрызу.
   
    •  У Рыме 1 верасня 2014 г. адбудзецца “міжканфесійны футбольны матч за мір”. Яго натхняльнікам з’яўляецца папа Францішак. Месцам правядзення павінен стаць рымскі Алімпійскі стадыён, напісаў аргентынскі футбаліст Хаўэр Дзанэці, віцэ-прэзідэнт футбольнага клуба “Інтэр”, у ватыканскай газеце “L’Osservatore Romano”. Ён не выключае, што Францішак асабіста будзе прысутнічаць на стадыёне. Як паведаміла французскае каталіцкае інфармацыйнае агенцтва “IMEDIA”, дапамогу ў арганізацыі міжрэлігійнага футбольнага матча аказала Папская акадэмія навук, рэктарам якой з’яўляецца таксама аргентынец, біскуп Марсэла Санчэс Саронда. На полі могуць з’явіцца зоркі сусветнага футбола: Раберта Баджо, Зінедзін Зідан, Ліянэль Месі і Франчэска Тоці. Трэнерам павінен стаць партугалец Жазэ Маўрынью. Футбалісты апрануць майкі з выявай вясёлкі. Менавіта яна лічыцца сімвалам міра, падставай для чаго з’яўляецца біблійная гісторыя пра выратаванне Ноя пасля сусветнага патопу.†

•  Папа Францішак у другі раз стаў “самым уплывовым палітычным лідарам”, прысутным у “Твітэры”. Па дадзеных даследавання “Twiplomacy”, праведзенага PR-агенцтвам “Burson-Marsteller”, кароткія пасланні ніводнага іншага палітыка ці рэлігійнага лідара свету не чытаюць так часта і не перадаюць далей, як “твіты” Святога Айца. “Вырашальнай тут з’яўляецца не толькі колькасць карыстальнікаў, але і іх актыўнасць і ўплыў”, – падкрэслілі аўтары даследавання. У 2013 г. “Twiplomacy” ўжо прызнавала за Францішкам статус найбольш уплывовага карыстальніка сацыяльнай сеткі. “Твітэр” папы Францішка дзейнічае на дзевяці мовах.
   
    •  Хітом года ў плебісцыце Таварыства хрысціянскай музыкі “Muza Dei” стала песня “Вольнасць” кс. Якуба Бартчака ў стылі хіп-хоп. Яе праслухалі каля 770 тыс. разоў на YouTube. Святар з’яўляецца капеланам у Дольнаслёнскім цэнтры захворванняў лёгкіх у Вроцлаве, а таксама ўдзельнічае ў дабрачынных акцыях адносна харчавання бяздомных і кіруе групай у неакатэхуменаце. Святар падкрэслівае, што музыка – гэта толькі яго хобі.†

•  У Францыі пракуратура патрабуе ад 70-гадовага кс. Жэрара Рыффара з Сэнт-Эцьен, які даў прытулак бяздомным у памяшканні, што належаць парафіі, штраф у памеры 12 тысяч еўра. На працягу чатырох гадоў святар кіруе таварыствам “Anticyclone”, якое займаецца дапамогай бяздомным людзям. Яго абвінавачваюць таксама ў тым, што такім чынам ён падтрымлівае нелегальную міграцыю. Кс. Жэрар, у сваю чаргу, гаворыць, што, паколькі дзяржава не выконвае абавязку забеспячэння даху над галавой асобам, якія шукаюць прытулку, гэта будзе рабіць ён. Прысуд па гэтай справе павінен быць вынесены 10 верасня.
   
    •  У Аргенціне, правінцыя Санцьяга-дэль-Эстэра, усё больш развіваецца і становіцца папулярным культ умбанда, звязаны з рытуаламі на могілках, у пакінутых дамах. Пасля гэтых рытуалаў заўсёды застаюцца розныя прадметы і ахвяры са звяроў. Культ з’явіўся ў Бразіліі ў XIX–XX стст. Яго асновай з’яўляецца магія і спірытызм, а таксама рэлігійныя традыцыі нявольнікаў, вывезеных з Гвінеі і Нігерыі. Мясцовыя католікі лічаць гэты культ ушанаваннем д’ябла.†

•  Паводле апошніх даследаванняў, ва ўсім свеце ўзрастае колькасць католікаў, святароў і семінарыстаў. З 2005 г. колькасць католікаў узрасла на 10,2% – да 1 229 мільёнаў вызнаўцаў. Католікі складаюць 17,5% насельніцтва свету. За кошт Азіі і Афрыкі ўзрастае таксама колькасць святароў. На жаль, у Еўропе каталіцызм знаходзіцца ў стадыі застою. Найбольшы рост каталіцызму зафіксаваны ў Афрыцы – 29%. Найбольш хутка ў Касцёле развіваецца катэгорыя сталых дыяканаў: за апошнія гады іх колькасць павялічылася на 26%. Узрасла таксама колькасць семінарыстаў, у асноўным у Азіі, Афрыцы і Акіяніі. Аднак, у Еўропе іх колькасць паменшылася.
   
    •  У Іспаніі ў апошні час гавораць аб папулярнай мадэлі і актрысе, якая стала манахіняй. Сястра Алайя Аліверос ва ўзросце 36 гадоў скончыла сваю кар’еру і ўступіла ў Кангрэгацыю св. Міхала Арханёла. Гэтая супольнасць мае статус грамадскага таварыства вернікаў. Да яго належаць як кансэкраваныя асобы, так і свецкія. На сённяшні дзень с. Алайя працуе ў доме для прыстарэлых у Мадрыдзе. Як сцвярджае сястра, яе акружэнне і сям’я да гэтага часу не могуць зразумець таго, што яна зрабіла.†