Дыяцэзія

3 лютага 2010 г. клерыкі нашай семінарыі пачалі II семестр акадэмічнага 2009-2010 году. Падчас зімовых канікулаў, якія пачаліся з 28 студзеня (пасля заканчэння экзаменацыйнай сесіі), клерыкі раз’ехаліся ў родныя старонкі, каб набрацца сілаў для дальнейшай навукі.
    Апрача паглыблення ведаў, некаторыя алюмны ВДС у Гродне, пасля заканчэння вялікапосных рэкалекцый, атрымаюць паслугу акалітату і лектарату.

У духу салідарнасці з ахвярамі землетрасення на Гаіці з пачатку лютага б.г. клерыкі і ксяндзы-прафесары ВДС у Гродне, а таксама паасобныя парафіі нашай дыяцэзіі арганізавалі збор грашовых сродкаў. Сабраныя ахвяры былі перададзены на рахунак арганізацыі Карытас Гродзенскай дыяцэзіі, а затым – арганізацыі Карытас у Мінску, якая накіруе фінансавую дапамогу для пацярпелых.
    Трагічнае землетрасенне адбылося ў Гаіці 12 студзеня б.г. Звыш 200 тысяч асобаў загінула, мільёны людзей былі пазбаўлены даху над галавой, харчавання і самых неабходных рэчаў. Перад абліччам трагедыі нашых братоў і сёстраў на Гаіці мы заахвочваем усіх вернікаў да салідарнасці і духоўнай лучнасці з ахвярамі гэтага катаклізму.

17 студзеня 2010 г. у актавым зале імя Яна Паўла II ВДС у Гродне адбыўся конкурс калядных песняў. Ідэя яго арганізацыі ўзнікла ў рэктара гэтай навучальнай установы ксяндза Юзафа Станеўскага і яна была горача падтрымана клерыкамі. У конкурсе, які вялі семінарысты з ансамбля “Ave”, удзельнічалі прадстаўнікі ўсіх курсаў нашай семінарыі. Клерыкі з 1 – 5 году навучання прадэманстравалі калядныя песні, а семінарысты 6 года – тэатральную пастаноўку. У сольным выкананні Часлава Ладыкі з другога курсу прагучалі цудоўныя калядныя творы. Журы, у склад якога ўвайшлі выкладчыкі семінарыі: кс. Тадэвуш Вышынскі, кс. Міхал Ластоўскі, кс. Юзаф Станеўскі і кс. Павел Салабуда, падкрэсліла высокі артыстычны ўзровень выканаўцаў. Першае месца ў конкурсе было прысуджана тром алюмнам з першага курсу, а ўзнагародай для іх быў выезд у спартыўны комплекс “Сілічы” пад Мінскам, дзе клерыкі змаглі паездзіць на лыжах.

На пачатку 2010 г. выйшаў у свет новы дыск ансамбля “Ave” з Вышэйшай духоўнай семінарыі ў Гродне пад назвай: “Бог нараджаецца”. На ім было запісана 11 твораў на тэму Божага Нараджэння, якія былі выкананы на польскай, беларускай і рускай мовах. У хуткім часе дыск можна будзе набыць у дыяцэзіяльнай кнігарні.
    Ансамбль “Ave” суправаджае вернікаў у праслаўленні Бога сваёй музыкай і спевамі ўжо звыш 15 гадоў. За гэты час алюмны нашай семінарыі выпусцілі ў свет ужо 6 сваіх дыскаў, з ліку якіх можна згадаць пра наступныя дыскі: “Твая любоў” (2004 г.), “Каб мог ісці за Табой” (2006г.), “Давяраю Табе” (2007 г.), “Раніца” (2008 г.).

22 студзеня 2010 г. адбылося аплаткавае спатканне асобаў, якія працуюць у сямейнай кансультацыі ў Гродне. На ім прысутнічалі працаўнікі кансультацыі са сваімі сем’ямі. А перад сустрэчай адбылася ўрачыстая св. Імша, якую цэлебраваў кс. Павел Салабуда.

З годна са шматгадовай традыцыяй 23 студзеня 2010 г. група клерыкаў і выкладчыкаў ВДС з Гродна наведала Дом дзіцяці ў Радуні, каб дапамагчы дзеткам і адарыць іх любоўю, якую яны не могуць цалкам адчуць. Падчас сёлетняй сустрэчы клерык Ян Раманоўскі правёў катэхезу пра Божае Нараджэнне, а пазней усе паламаліся аплаткамі і разам спявалі калядныя песні. Вялікую радасць выхаванцаў выклікалі вельмі жаданыя святочныя падарункі, якія яны атрымалі ад гасцей. Пасля сустрэчы з дзецьмі клерыкі і выхавацелі нашай семінарыі наведалі мясцовы музей ксяндза-пралата Казіміра Шаняўскага, шматгадовага пробашча парафіі ў Радуні, які паўстаў, дзякуючы Ганне Штэйн, гаспадыні ксяндза Казіміра.
    У той жа самы дзень клерыкі ВДС з Гродна з духоўным айцом Андрэем Радзевічам наведалі школу-інтэрнат у вёсцы Парэчча, а 26 студзеня – дзяцей-інвалідаў у вёсцы Галавічполе. Падчас сустрэчы з дзецьмі былі арганізаваны імправізаваныя канцэрты, спалучаныя з забавамі і расказамі пра Божае Нараджэнне, а затым кожны яго ўдзельнік атрымаў “салодкі” падарунак.

24 студзеня 2010 г. у 15.00 у раённым Доме культуры ў Іўі адбыўся VII дэканальны конкурс калядных песень. Маладыя яго ўдзельнікі змагаліся за ўзнагароды ў трох катэгорыях: салісты; дуэты, трыо, квартэты; ансамблі і хоры. Перад конкурсам усе прысутныя сабраліся ў касцёле імя св. апосталаў Пятра і Паўла на св. Імшы, галоўным цэлебрантам якой быў біскупскі вікарый па Лідскай акрузе кс. Уладзімір Гуляй. Радасны спеў песень пра Божае Нараджэнне гучаў у Іўі ў гэты дзень да вечара, бо на конкурс прыехала 213 маладых артыстаў з 8 парафій дэканату. Журы, старшынёй якога быў кс. Тадэвуш Вышынскі з ВДС з Гродна, падкрэсліла высокі артыстычны ўзровень выкананых песень.
    У катэгорыі салісты ў малодшай узроставай групе першае месца было прысуджана Наталлі Лапата з пар. імя св. ап. Пятра і Паўла з Іўя, ва ўзроставай групе з 14 – 18 гадоў перамагла Грэта Ашмантайтэ з пар. імя Нараджэння НМП з Трабаў. У катэгорыі дуэты, трыо, квартэты першае месца прысуджана трыо дзяўчатам з вёскі Сураж (пар. імя св. Мікалая- біскупа з Геранёнаў), а ў катэгорыі ансамблі і хоры – хору “Ave Maria” з пар. імя Нараджэння НМП з Трабаў.

Асабліва радасны настрой панаваў у гэтым годзе падчас урачыстасці Аб’яўлення Пана сярод вернікаў парафіі імя Вастрабрамскай НПМ у Аўгустоўку. У гэты дзень удзельнікі ансамбля “Ave” з Вышэйшай духоўнай семінарыі ў Гродне упрыгожылі сваімі спевамі і музыкай св. Імшы, сустрэліся з міністрантамі і моладдзю, каб расказаць пра штодзённае семінарыйнае жыццё і падзяліцца сваімі думкамі пра сваё прызванне. У 16.00 яны далі цудоўны канцэрт. Ужо стала прыгожай традыцыяй, што ва ўрачыстасць Трох Каралёў клерыкі нашай семінарыі выязджаюць у парафіі, каб памаліцца і падзякаваць добраму Богу і ўсім вернікам за ахвяры, атрыманыя на карысць нашай навучальнай установы.