Дыяцэзія

  У Асаве (дэканат Радунь) ў касцёле імя св. Юзафа прайшоў велікапосны дзень малітоўных сустрэчаў святароў Гродзенскай дыяцэзіі. З пачатку ксяндзы ўдзельнічалі ў набажэнстве Крыжовага шляху, якое праводзіў айцец Анджэй Шчупал. Пасля гэтага ксёндз Вітальд Лазавіцкі правёў канферэнцыю на тэму: “Сакрамэнт Пакаяння і Паяднання”. На заканчэнне дня духоўных сустрэчаў адбылася св. Імша, галоўным цэлебрантам якой быў біскуп Аляксандр Кашкевіч. Ён паблагаславіў святароў, каб яны аддана служылі вернікам падчас велікапосных рэкалекцый у парафіях дыяцэзіі. Ксёндз У. Гуляй абвясціў гамілію. Трэба нагадаць, што прымаючы рашэнне аб правядзенні дня сустрэчаў у Асаве, біскуп хацеў, каб ксяндзы пазнаёміліся з гэтай невялікай парафіяй і касцёлам, стагоддзе з дня асвячэння якога будзе адзначацца ў гэтым годзе.

15 лютага 2010 г. у Вышэйшай духоўнай семінарыі ў Гродне прайшоў дзень духоўных сустрэчаў для святароў Гродзенскай дыяцэзіі. Ксяндзы, пасля праспявання гімна да Святога Духа, удзельнічалі ў аскетычнай канферэнцыі на тэму “Вернасць Хрыста – вернасць святара”, якую правёў а. Анджэй Шчупал CSsR. У 11.00 адбылася адарацыя Найсвяцейшага Сакрамэнту. У гэты дзень у 11.45 біскуп Аляксандр Кашкевіч разам з архімандрытам Сяргеем Гаекам, апостальскім адміністратарам для грэка-католікаў Беларусі, канцэлебравалі ўрачыстую Эўхарыстыю. Сабраныя ксяндзы разважалі пра святарскае прызванне падчас гаміліі, абвешчанай біскупскім вікарыем кс. Янам Кучынскім.

Гродна (м-н Дзевятоўка).

14 лютага 2010 г. у 12 .00 гадзінаў біскуп Аляксандр Кашкевіч асвяціў манаскі дом айцоў-рэдэмптарыстаў і пабудаваны касцёл імя Найсвяцейшага Адкупіцеля, які быў аддадзены вернікам для літургічных мэтаў. Цяпер жыхары мікрараёна Дзевятоўка могуць штодзённа маліцца не ў капліцы, а ў святыні, якая займае плошчу ў 1000 квадратных метраў. Вернікі дзякавалі Богу за Яго прыгожы дар падчас урачыстай св. Імшы, якую разам з біскупам Аляксандрам Кашкевічам канцэлебравалі а. правінцыял Рышард Божэк з Варшавы і шматлікія святары з нашай дыяцэзіі.
    У мікрараёне Дзевятоўка парафія была створана ў 1993 г. У жніўні 1994 г. была асвечана пабудаваная капліца, а ў лістападзе 1998 г. было пачата будаўніцтва касцёла і душпастырскага цэнтра. Кансэкрацыя святыні адбудзецца ў верасні 2010 года.

20 лютага 2010 г. у першую нядзелю Вялікага посту падчас урачыстай св. Імшы восем алюмнаў з пятага курсу ВДС з Гродна было прынята ў лік кандыдатаў, якія непасрэдна падрыхтоўваюцца прыняць дыяканскія і прэзбітэрскія пасвячэнні. Гэта – чарговы этап на шляху да святарскіх пасвячэнняў, на якім дзякуючы адпаведнай падрыхтоўцы і малітве клерыкі ўсведамляюць, што “Ніхто не прыдатны да Валадарства Божага, хто ўскладае руку сваю на плуг і аглядаецца назад” (Лк 9, 62). Падчас св. Імшы біскуп Аляксандр Кашкевіч здзейсніў абрад акалітату для клерыкаў з чацвёртага курсу нашай семінарыі. Яшчэ шэсць алюмнаў будуць дапамагаць ксяндзам выконваць іхнія абавязкі, як напрыклад: удзяляць вернікам св. Камунію.
    Чарговыя дзевяць алюмнаў з трэцяга курсу нашай семінарыі змогуць абвяшчаць Божае слова пасля таго, як падчас св. Імшы біскуп А. Кашкевіча паблагаславіць іх у лектары. З 17 – 20 лютага б.г. падчас велікапосных рэкалекцый клерыкі падрыхтоўваліся належным чынам да гэтай узнёслай урачыстасці.

  З 17 – 20 лютага 2010 г. у семінарыйнай супольнасці ў Гродне прайшлі велікапосныя рэкалекцыі. У гэтым годзе іх праводзіў а. Рафал Шымковяк OFMCap, францысканскі рэкалекцыяніст, які выкладае катэхетыку ў ВДС капуцынаў у Кракаве. На працягу чатырох дзён падчас канферэнцыі Хрыстус вуснамі а. Рафала вучыў слухачоў сапраўднай любові да свайго Творцы, чаго часта не хапае чалавеку з-за яго эгаізму. Супольны брэвіярый, набажэнствы Крыжовага шляху і Песняў жальбы, ружанцовая малітва, адарацыя Найсвяцейшага Сакрамэнту і супольная Эўхарыстыя дапамаглі ксяндзам і семінарыстам падрыхтавацца ў духоўным плане да ўрачыстасцяў Вялікай Ночы, якія надыходзяць.

17 лютага 2010 г. у Папяльцовую сераду ў каталіцкім Касцёле пачаўся Вялікі пост. У гэты дзень у гродзенскай катэдры ў 12. 00 гадзінаў біскуп Аляксандр Кашкевіч быў галоўным цэлебрантам св. Імшы з гаміліяй і асвячэннем попелу.
    Ардынарый Гродзенскай дыяцэзіі падкрэсліў у сваёй гаміліі, што “Вялік пост – гэта час нашага сталення з Богам. Гэта пара, калі мы можам паглядзець на ўсё інакш, развівацца ў духоўным плане, ізноў адчуць Божую любоў, якая нас акружае штодзённа”. Біскуп, звяртаючыся да шматлікіх вернікаў у касцёле, заклікаў кожнага хрысціяніна навярнуцца да Бога, каб цалкам адчуць пасхальную радасць.

Дарагія чытачы!
    Падчас Вялікага посту мы хочам разам аднавіць нашыя сэрцы, удзельнічаючы ў вялікапосных практыках, да якіх у гэтую пару навяртання заклікае нас Касцёл. Мы жадаем сустрэць Хрыста, які любіць кожнага з нас і аддаў сваё жыццё за людзей. Ёсць мноства вялікапосных практыкаў. Напэўна, з ахвотай кожны вернік прымае ўдзел у іх, каб паглыбіць містэрыю Мукі і Смерці Езуса Хрыста.
    Рэкалекцыі складаюць неадлучны элемент Вялікага посту. З першых стагоддзяў яны практыкуюцца ў каталіцкім Касцёле.
    У сённяшні час, як падкрэслівае Папа Бэнэдыкт XVI, адчуваецца неабходнасць сустрэчы з Богам. Сёння хопіць магчымасцяў абвяшчаць Божае слова. Тыповыя парафіяльныя рэкалекцыі прадаўжаюцца на працягу трох дзён у парафіях нашай дыяцэзіі. Мы хочам таксама ўключыцца ў гэтую рэкалекцыйную працу і ў трох чарговых вялікапосных нумарах на старонках нашай газеты размесцім па адной рэкалекцыйнай навуцы. Памятайце, што гэта не вызваляе Вас ад удзелу ў парафіяльных рэкалекцыях, увянчэннем чаго служыць вялікапосная споведзь.

1 лютага 2010 г. у катэдральнай базыліцы ў Гродне была цэлебравана св. Імша, на якую сабраліся сёстры і браты з розных ордэнаў, члены свецкіх інстытутаў з нашай дыяцэзіі, каб падчас супольнай малітвы аднавіць свае абяцанні Богу і падзякаваць за дар свайго паклікання. Запальваючы напярэдадні дня Кансэкраванага жыцця свечкі – сімвал ахвяры, несучы іхняе святло ва ўрачыстай працэсіі, асобы, прызваныя да кансэкраванага жыцця, прыгадалі нам таксама момант унясення Езуса ў ерузалімскую святыню, дзе Ён быў названы Святлом Свету. Біскуп Аляксандр Кашкевіч быў галоўным цэлебрантам св. Імшы і ўзначаліў працэсію са свечкамі ў той урачысты дзень. У гаміліі ардынарый Гродзенскай дыяцэзіі, звяртаючыся да сабраных ля алтара братоў і сёстраў з розных манаскіх ордэнаў, зазначыў, што жыццё жадае ад іх безупыннай ахвяры, самаадданасці, цярплівасці і высілку. Біскуп Аляксандр Кашкевіч, дзякуючы кансэкраваным асобам за плённую працу ў гродзенскім Касцёле, заклікаў іх, каб яны, незалежна ад даверанай ім місіі, захоўвалі ў сэрцы прымат кансэкраванага жыцця.