Беларусь

26 мая 2010 г. у Мінску пачаліся XVI Міжнародныя кірыла-мяфодзіеўскія чытанні, якія былі арганізаваны Інстытутам тэалогіі імя святых Мяфодзія і Кірыла БДУ і Міжнародным грамадскім аб’яднаннем “Хрысціянскі адукацыйны цэнтр імя св. Мяфодзія і Кірыла”. Тэма чытанняў: “Рэлігійная культура ў кантэксце свецкай адукацыі”. Ад імя Мітрапаліта Т. Кандрусевіча да прысутных звярнуўся з прывітальным словам біскуп Антоній Дзям’янка.

27-30 мая 2010 г. Беларусь наведаў арцыбіскуп Зыгмунт Зімоўскі, старшыня Папскай Рады па справах душпастырства працаўнікоў службы аховы здароўя. У рамках свайго візіту ў Беларусь ён наведаў абласны выканаўчы камітэт у Віцебску, Віцебскі дзяржуніверсітэт імя П. М. Машэрава, Віцебскую абласную клінічную бальніцу.
   На сустрэчы арцыбіскупа З. Зімоўскага, біскупа У. Бліна з намеснікам губернатара Леанідам Кавалёвым былі абмеркаваны перспектывы супрацоўніцтва Касцёла з медыцынскімі цэнтрамі вобласці ў сферы апекі над хворымі і старэйшымі асобамі, тэма годнасці старэйшых асобаў і душпастырскай працы з дарослымі і дзецьмі. 29 мая у Віцебску арцыбіскуп З. Зімоўскі выступіў з дакладам на тэму: “Каштоўнасць чалавечага жыцця ў аспекце навучання Касцёла” на IV Міжнароднай медыцынскай канферэнцыі “Праблемы ўрачэбнай этыкі ў сучасным свеце”.

1 чэрвеня 2010 г. у Бярозаўцы (Гродзенская дыяцэзія, Навагрудскі дэканат) адбылося пасяджэнне рады па справах сям’і пры Канферэнцыі Каталіцкіх Біскупаў у Беларусі. Узначаліў пасяджэнне старшыня рады дапаможны біскуп Мінска-Магілёўскай архідыяцэзіі Антоній Дзям’янка. Падчас сустрэчы былі падведзены вынікі сёлетняга ўдзелу ў акцыі «Духоўнае ўсынаўленне» ў паасобных дыяцэзіях. арганізацыя душпастырскіх акцый, абмеркаваны спосабы процідзеяння абортам і прадстаўлены актуальныя праекты па справах сям’і.

9 мая б.г. пешыя пілігрымы з пінскай парафіі імя Унебаўзяцця Найсвяцейшай Марыі Панны 18-ты раз дайшлі ў санктурый імя Божай Маці, Каралевы Палесся ў Лагішын. Біскуп Казімір Велікаселец быў галоўным цэлебрантам урачыстай св. Імшы. Моладзь і клерыкі з Міждыяцэзіяльнай вышэйшай духоўнай семінарыі імя св. Тамаша з Аквіну з Пінску ішлі разам з пілігрымамі.

12 мая 2010 г. у вёсцы Лучай (Віцебская дыяцэзія, дэканат Паставы) прайшоў дзень Духоўных сустрэчаў духоўных асобаў Віцебскай дыяцэзіі, які быў прысвечаны духоўным практыкам. Біскуп Уладзіслаў Блін цэлебраваў св. Імшу. Ад імя ўсіх святароў і сёстраў з манаскіх ордэнаў сястра Ева Бялецкая з Лынтупаў павіншавала біскупа з 30-ці гадовым юбілеем святарскіх пасвячэнняў і днём нараджэння.

13 мая 2010 г. з-пад касцёла імя св. Барбары ў Віцебску вырушыла пешая пілігрымка вернікаў у санктуарый імя Фацімскай Божай Маці ў Шуміліна.У дзень святкавання фацімскіх аб’яўленняў у санктуарый прыбылі вернікі з розных парафій Віцебскай дыяцэзіі, каб супольнай малітвай прасіць Божую Маці аб заступніцтве.

26 красавіка б.г. у 24 –ую гадавіну выбуху рэактару ў атамнай электрастанцыі ў Чарнобылі дапаможны біскуп Мінскай-Магілёўскай архідыяцэзіі Антоній Дзям’янка быў галоўным цэлебрантам св. Імшы за ахвяры трагедыі.

20 красавіка б.г. у парафіі імя Беззаганнага Сэрца Марыі ў Оршы прайшоў дзень духоўных сустрэчаў душпастыраў і сёстраў, якія працуюць у Віцебскай дыяцэзіі. У нядаўна пабудаванай капліцы пасля ружанцовай малітвы прайшла св. Імша, галоўным цэлебрантам якой быў біскуп Уладзіслаў Блін. Потым адбылася канферэнцыя аб смутку і радасці ў жыцці хрысціяніна.