ГРОДНА
Чацвер,
22 лютага
2024 года
 

XXVII Нядзеля звычайная

Разважанні з Божым Словам

З Eвангелля св. Марка

Падышлі фарысеі да Езуса і, выпрабоўваючы Яго, спыталіся, ці дазволена мужу разводзіцца з жонкаю? Ён сказаў ім у адказ: “Што наказаў вам Майсей?”
    Яны сказалі: “Майсей дазволіў пісаць разводны ліст і разводзіцца”. А Езус сказаў ім у адказ: “Дзеля жорсткасці сэрца вашага ён напісаў вам гэтую запаведзь, бо на пачатку стварэння Бог стварыў іх мужчынам і жанчынай. Таму пакіне мужчына бацьку свайго і маці сваю і злучыцца са сваёй жонкай, і будуць двое адным целам. Так што яны ўжо не двое, але адно цела. Таму тое, што Бог злучыў, чалавек няхай не разлучае.
    У доме вучні зноў спыталіся ў Яго пра гэта. Ён сказаў ім: “Хто развядзецца з жонкаю сваёю і ажэніцца з іншай, той чыніць распусту ў дачыненні да яе. I калі жонка развядзецца з мужам сваім і выйдзе за іншага, чыніць распусту”.
    I прыносілі да Езуса дзяцей, каб ён дакрануўся да іх. Вучні ж дакаралі іх. А Езус, убачыўшы гэта, абурыўся і сказаў ім: “Дазвольце дзецям прыходзіць да Мяне, не забараняйце ім, бо такім належыць Валадарства Божае. Сапраўды кажу вам: хто не прыме Валадарства Божага, як дзіця, той не ўвойдзе ў яго. I, абдымаючы іх, ускладаў на іх рукі і благаслаўляў”.

Mk 10, 2-16

Зло, якое закранае сям’ю

 Якая са сфераў людскога жыцця з’яўляецца найбольш уражлівай на зло? Дзе можна чалавека найбольш пакрыўдзіць, найглыбей параніць? Якія з людскіх грахоў астаўляюць у душы раны, што найцяжэй гояцца? Многія з нас прызнаюцца ў тым, што самае балючае зло нясуць тыя грахі, якія закранаюць сем’і! Бо ў асяродзі сужэнства, сям’і з’яўляецца новае жыццё. Любоў і адданне адзін аднаму мужа і жонкі прымаюць удзел у стваральнай справе самога Бога! Дзіця, якое прыходзіць на свет, бяспечна сябе адчувае пад апекай чулай маці і клапатлівага бацькі. У такім асяроддзі яно расце, сталее. У клімаце бацькоўскай любові яно ўспрымае самыя важныя звесткі аб жыцці, развівае здольнасць любіць, вучыцца ахвярнасці, адказнасці. Самыя прыгожыя хвіліны жыцця звязаны з дзяцінствам і родным домам.
    А калі з-за якога-небудзь няшчасця няма аднаго з бацькоў, то тут мы маем справу з трагедыяй сіроцтва. Тады цяжка разлічваць на поўнае шчасце, вельмі складана, амаль немагчыма замяніць адсутнасць мамы ці таты.
    Чалавек быў створаны для шчасця і радасці, крыніцай чаго з’яўляецца Бог-Айцец. Гэта Ён пастанавіў, каб кожнае яго дзіця адчувала сябе бяспечна пад апекай бацькоў. Так было на пачатку стварэння і так павінна застацца, калі мы хочам, каб чалавек узрастаў да сапраўднага шчасця. Усякае зло, якое знішчае сужэнства і сям’ю, накіравана ў жыццё, якое зараджаецца, і з’яўляецца няшчасцем канкрэтных людзей і цэлых грамадстваў. Разводы, забойствы ненароджаных дзяцей, спробы замяніць Бога эксперыментамі штучнага зачацця новага жыцця - усё гэта з’яўляецца плёнам крайняга эгаізма. Ніякі чалавечы закон не можа паправіць таго, што ля пачаткаў стварэння было дасканалым.

Кс. Яраслаў Грынашкевіч

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

 
white
Адзначаем імяніны:
Да канца года засталося дзён:  314

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.