Цэлебрацыю св. Імшы ўзначаліў арцыбіскуп Кандрусевіч. Ва ўступным слове заслужаны іерарх падзякаваў ксяндзу Вэдэру за вялікі ўнёсак у адраджэнне Каталіцкага Касцёла ў Беларусі, адзначыўшы, што палову свайго святарскага шляху ён прысвяціў менавіта Касцёлу на Усходзе, будучы інспектарам для салезіян з краін былога СССР.
    Звяртаючыся да ўсіх гасцей і дзякуючы за прысутнасць, добрыя словы і малітву ў яго інтэнцыі, юбіляр адзначыў, што, сказаўшы Богу „так”, ён ніводнага разу не пашкадаваў. Пасля св. Імшы ў араторыі, які дзейнічае пры парафіі, адбыўся святочны канцэрт і ўрачысты абед.