3 мая ў Доме міласэрнасці ў Каменцы (дэканат Шчучын) адышоў у вечнасць ксёндз прэлат Ежы Лявінскі, шматгадовы выкладчык Вышэйшай духоўнай семінарыі ў Гродне.

     Пахавальная св. Імша ў інтэнцыі памерлага святара, які на нашых землях пашыраў культ Езуса Міласэрнага, з удзелам біскупаў, шматлікіх святароў, манаскіх сясцёр і вернікаў была адпраўлена 6 мая ў гродзенскім касцёле Адшукання Святога Крыжа (пабернардынскім). Пахаванне адбылося ў Гродне на Старых могілках.
     Ксёндз прэлат Ежы Мар’ян Лявінскі нарадзіўся 2 студзеня 1930 года ў Дзятлаве. Разам з сям’ёй быў вывезены ў Сібір. Вышэйшую духоўную семінарыю скончыў у Сандаміры (Польшча), там жа 29 мая 1955 года біскуп Ян Лорка ўдзяліў яму прэзбітэрскае пасвячэнне.
     У савецкія часы ездзіў на душпастырскую працу ў Беларусь, Расію і Казахстан, дзе па меры магчымасці абвяшчаў Евангелле, цэлебраваў Імшу, спавядаў. Пасля шасці гадоў душпастырскага служэння быў накіраваны на вучобу ў Люблінскі каталіцкі ўніверсітэт, пасля заканчэння якога абараніў кандыдацкую дысертацыю па кананічным праве. З 1968 па 1990 гады працаваў у дыяцэзіяльнай курыі ў Сандаміры.
     З пачатку існавання Вышэйшай духоўнай семінарыі ў Гродне быў яе выкладчыкам, некаторы час прэфектам. З’яўляўся Ганаровым капеланам Яго Святасці, Грэміяльным канонікам Сандамірскага капітула, Ганаровым канонікам Гродзенскага капітула.