10 красавіка, у нядзелю Мукі Пана, якая распачынае Вялікі тыдзень, біскуп Гродзенскі Аляксандр Кашкевіч узначаліў св. Імшу ў катэдральным касцёле св. Францішка Ксаверыя ў Гродне.

У гэты дзень у святыні чыталася апісанне Мукі Пана, пасля чаго іерарх звярнуўся да вернікаў з гаміліяй.
    Біскуп адзначыў важнасць Пальмовай нядзелі, якая нагадвае пра ўезд Езуса ў Іерусалім, каб там памерці ды ўваскрэснуць, і распачынае святкаванне пасхальнай таямніцы. Іерарх заклікаў перажыць Вялікі тыдзень, які распачынаецца ў Пальмовую нядзелю, годным і належным чынам.

Таксама біскуп блаславіў пальмовыя галінкі, якія вернікі па традыцыі прынеслі ў святыню на памяць пра ўваход Езуса ў Іерусалім.
    Звычай бласлаўлення пальмовых і вербных галінак з’явіўся ва ўсім Касцёле ў XI стагоддзі. Пасля вяртання дадому, некаторыя вернікі змяшчаюць пабласлаўленыя галінкі за крыжы і абразы. Раней іх таксама ўтыкалі на полі, каб Бог аберагаў пасевы ад граду, засухі і празмерных дажджоў.