ГРОДНА
Пятніца,
09 снежня
2022 года
 

Ці добра ты думаеш пра сябе?

На шляху да святасці

Прачніся! Чаму табе хочацца быць такім, як усе? Мець тое, што ёсць ва ўсіх? Чаму гэта важней, чым быць сабой – тым, якім ты быў створаны?
На вуліцах так шмат людзей з паніклым позіркам. З боку – шэрая маса без прыкмет жыцця: знешні выгляд адлюстроўвае ўнутраны стан чалавека. І я, і ты ў гэтай шэрай масе. Але якімі нам быць у ёй: тымі, хто нясе радасць ці шэрасць – выбіраць нам.
    Як жа не зліцца з натоўпам? Як ісці сваёй дарогай? Як адчуваць “смак жыцця” і вылучацца палаючымі радасцю вачыма і ўсмешкай?
Адказ ёсць. Трэба быць з крыніцай праўды, радасці і чыстай, бескарыслівай любові. Хто гэтая Крыніца? Гэта наш Нябесны Айцец. І Ён кажа: “І не дастасоўвайцеся да гэтага веку, але перамяняйцеся праз абнаўленне розуму, каб вы пазналі, якая воля Божая, што добрае, прыемнае і дасканалае” (Рым 12, 2).
    Такім чынам, каб быць сабой, трэба “перамяняцца праз абнаўленне розуму”. Таму спачатку варта звярнуць увагу на тое, што ты думаеш на свой рахунак і што гаворыш сам пра сябе? А далей – зверыць з тым, што думае і гаворыць пра цябе Бог.
    Правер, колькі разоў за дзень ты кажаш: “Ну я і дурань”, “Я дрэнны муж/бацька/маці/дзіця”, “У мяне рукі-крукі”, “Я тоўсты”, “Вечна я ўсё псую” і г. д. Але таксама ў нашай галаве могуць быць і чужыя словы, якія нехта сказаў у наш адрас: “Ты брыдкі”, “Ты робіш занадта мала”, “А вось у іншага лепш”, “У іншага гэта ёсць, а ў цябе – не”, “Нават не спрабуй – не выйдзе”…
    Калі ты з дня ў дзень усё сваё жыццё чуеш гэта і прымаеш, то ўяві, які груз няпраўды цягнеш на сабе? Што за гэты час стала з тваім духам?
    Вораг можа скарыстацца іншымі людзьмі, каб атакаваць тваё пачуццё годнасці як чалавека цудоўна створанага. Бо напісана: “І стварыў Бог чалавека паводле свайго вобразу, паводле Божага вобразу стварыў яго” (Быц 1, 27). “І ўбачыў Бог усё, што Ён стварыў; і было яно вельмі добрым” (Быц 1, 31).
    Ты чуеш? Ты створаны па Божым вобразе і ты вельмі добры!
    Бог таксама кажа: “Ты дзівосна зладжаны” (параўн. Пс 138, 14), “Любоўю вечнай Я палюбіў цябе, таму Я захаваў міласць да цябе” (Ер 31, 3), “Я выбраў цябе і не адкіну цябе” (Іс 41, 9), “Ты Сын Мой умілаваны, Цябе ўпадабаў Я” (Мк 1, 11).
    Вядома, цяжка паверыць у сваю каштоўнасць і сілу, калі ў нашым грамадстве прынята зважаць больш на свае недахопы і стала працаваць над імі. А тое, што добрае і што натуральна атрымліваецца, не шанаваць. З дзяцінства мы навучаны, што хваліць сябе – гэта дрэнна і нясціпла. А бачыць свае слабыя бакі – мудра і прыгожа. Аднак прымнажаецца тое, на што скіравана ўвага.
    Ці знаёма табе сітуацыя:
    – Ты сёння выдатна выглядаеш! Сукенка і макіяж табе вельмі ідуць!
    – Ой! Ты што, сукенка старая, а пад вачыма сінякі!
    Праўда ў тым, што калі ты сам не можаш убачыць у сабе дабро, то і іншыя не змогуць разглядзець дары і таленты, дадзеныя табе Богам.
    Падыдзі да люстэрка і паглядзі на сябе. Ці ж не цуд? Ты настолькі прызвычаіўся да свайго вобразу, што не заўважаеш сябе. А на цябе з таго боку люстэрка глядзіць цэлая клеткавая дзяржава са 130-цю трыльёнамі жыхароў-клетак. Прычым кожная клетка – гэта асобная мікракраіна, дзе ёсць свае заводы, камунікацыі, нават электрастанцыя. Калі паспрабаваць вырабіць чалавека з радыёдэталяў, атрымаўся б велізарны хмарачос. Так, “дзівосныя дзеі Твае, і душа мая ўсведамляе гэта” (Пс 138, 14).
    Клопат аб нашай самаацэнцы з’яўляецца нашым абавязкам. Каб зрабіць уласныя думкі пра сябе ветлівымі і прыязнымі, нам спатрэбіцца шмат цярпення, часу і… веры. Езус кажа: “Усё магчыма для таго, хто верыць” (Мк 9, 23). І калі цяжка верыць, мы можам усклікнуць: “Веру, памажы майму бязвер’ю” (Мк 9, 24). Так, усклікнуць і папрасіць аб дапамозе! Бо “Пан сам пойдзе перад табою і будзе з табою, Ён не адступіцца і не пакіне цябе. Не бойся і не палохайся” (Дрг 31, 8).
    А ўжо сёння ты можаш зрабіць першы крок у абнаўленні свайго розуму – пачаць дзякаваць. Дзякуй за тое, за што шчыра адчуваеш удзячнасць. Запісвай гэта і перачытвай! І ты ўбачыш, як шмат маеш!

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

violet
Адзначаем імяніны:
Сёння ўспамінаем памерлых святароў:
Да канца года засталося дзён:  23

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.