13 снежня па ўзнагароду да Пана адышоў пробашч парафіі св. Войцеха-Адальберта ў Калінінградзе (Расія) кс. прэлат Юрый Стэцкевіч. Яшчэ ў канцы верасня ён праводзіў у Гродзенскай вышэйшай духоўнай семінарыі рэкалекцыі для святароў…

Кс. Юрый нарадзіўся 1 кастрычніка 1954 года ў Гродне. У дзяцінстве выехаў з бацькамі ў Польшчу на Заходняе Памор’е. У 1975 годзе паступіў у Вышэйшую духоўную семінарыю ў Шчэціне. Прэзбітэрскае пасвячэнне атрымаў 12 красавіка 1981 года. †

Служыў у Шчэцінска-Каменскай архідыяцэзіі. Быў, між іншым, дырэктарам дыяцэзіяльнага выдавецтва, дыяцэзіяльнай друкарні і рэдактарам газеты. З чэрвеня 1991 года працаваў у Калінінградзе. Будаваў там сакральныя аб’екты. Выконваў абавязкі дэкана Каталіцкага Касцёла ў Калінінградскай вобласці, а таксама біскупскага вікарыя. Заснаваў першую ў Расіі каталіцкую рускамоўную газету “Калининградский католический вестник”.
    У 1996 годзе папа Ян Павел ІІ надаў яму тытул капелана Яго Святасці, а папа Бенедыкт XVI у 2013 годзе – годнасць ганаровага прэлата Яго Святасці.
    Святар вельмі шанаваў бл. Цэліну Бажэнцкую. У Абрэмшчынe каля Заневічаў, на месцы былога маёнтка Цэліны i Юзафа Бажэнцкiх, дзякуючы старанням кс. Юрыя і яго брата кс. прэлата Андрэя Стэцкевіча пабудавана невялікая капліца ў гонар бласлаўлёнай. У будоўлю быў укладзены сімвалічны камень з былога маёнтка Бажэнцкіх.
    16 снежня ў парафіі Найсвяцейшага Сэрца Пана Езуса i св. Язафата ў Заневічах (дэканат Вялікая Бераставіца), з якой святар асаблівым чынам звязаны, адбылася св. Імша ў інтэнцыі спачылага. У той жа дзень кс. Юрый быў пахаваны ў Калінінградзе, дзе служыў на працягу апошніх амаль 30-ці гадоў.