У апошні дзень жніўня Мітрапаліту Мінска- Магілёўскаму арцыбіскупу Тадэвушу Кандрусевічу, які вяртаўся з Польшчы, было адмоўлена ва ўездзе ў Беларусь.

У сувязі з гэтым было распачата мноства малітоўных акцый у інтэнцыі хуткага вяртання арцыбіскупа да сваіх вернікаў, каб ён мог працягваць пастырскае служэнне і кіраваць Касцёлам у Беларусі. Між іншым, у гродзенскай катэдры св. Францішка Ксаверыя на заканчэнне перэгрынацыі фігуры св. Міхала Арханёла адбылася св. Імша ў інтэнцыі іерарха, а таксама за краіну і яе жыхароў. Вернікі ўсіх парафій горада над Нёманам маліліся аб міры і дары паяднання для грамадзян Беларусі на шляху дыялогу, у духу ўзаемнай павагі і клопату пра агульнае дабро.†

Кс. арцыбіскуп Тадэвуш Кандрусевіч ва ўмовах сацыяльна-палітычнага крызісу, які перажывае наша краіна, заклікаў (і працягвае гэта рабіць, знаходзячыся за мяжой) да дыялогу і прымірэння. Іерарх падкрэслівае, што Каталіцкі Касцёл у Беларусі не намаўляе да рэвалюцыі, але падтрымлівае ідэю мірнага вырашэння праблем.
    Будучы яшчэ ў Мінску, арцыбіскуп Кандрусевіч ініцыяваў сустрэчу з міністрам унутраных спраў Рэспублікі Беларусь Юрыем Караевым.
    На ёй іерарх падкрэсліў, што Каталіцкі Касцёл заўсёды выступае ў абарону слабых і безабаронных і ў гэтай сітуацыі з’яўляецца голасам тых, хто пазбаўлены голасу, як вучыць папа Францішак. Заклікаў вызваліць затрыманых пасля пратэстаў асоб, а таксама звярнуўся да абодвух бакоў канфлікту, просячы скласці зброю і вырашыць спрэчку мірным шляхам.
    У цяжкі для ўсіх нас час давайце мабілізуемся да малітвы, праявім асаблівую салідарнасць з арцыбіскупам Тадэвушам, які так шмат робіць для Каталіцкага Касцёла і грамадства нашай краіны. Давайце падтрымліваць адзін аднаго ў любой сітуацыі. Мы адна вялікая сям’я. Няхай паміж намі ніколі не будзе падзелаў. Няхай любоў, згода і прабачэнне прывядуць нас да агульнай мэты – мірнага і шчаслівага жыцця на зямлі і вечнага збаўлення.
   

Старшыня Канферэнцыі каталіцкіх біскупаў у Беларусі кс. абп Тадэвуш Кандрусевіч нарадзіўся ў Адэльску пад Гроднам і мае беларускае грамадзянства.