ГРОДНА
Нядзеля,
19 мая
2024 года
 

Дапамагчы добрай радай

Дапамагчы добрай радай

Кс. Павел Салабуда, псіхолагБеручы пад увагу надзвычайны прагрэс у медыцыне і псіхалогіі, мы можам лепш інтэрпрэтаваць стан і паводзіны: як уласныя, так і іншых людзей. Пры гэтым вера і рэлігія не з’яўляюцца ўзаемавыключальнымі паняццямі – уяўляюць сабой найважнейшыя элементы жыцця. Такая думка натхніла мяне разам з працаўнікамі Каталіцкай кансультацыі Гродзенскай дыяцэзіі стварыць на старонках газеты “Слова Жыцця” новую рубрыку “Дапамагчы добрай радай”.
Нашы спецыялісты дзякуючы адпаведнай кваліфікацыі здольны дапамагчы лепш зразумець сябе і сваіх блізкіх.
Можна сказаць, што мы жывём у часы некампетэнтнасці. Замест таго, каб маліцца за дзіця, калі яно палохаецца, многія накіроўваюцца да “бабак-шаптух”, замест таго, каб пайсці ў групу падтрымкі для ананімных алкаголікаў, спрабуюць разнастайныя “кадзіраванні”, замест таго, каб паразмаўляць са святаром, купляюць параднікі тыпу “дапамажы сабе сам” і г. д. Але праблемы ніколі не існуюць у чыстай форме. Сусветная арганізацыя здароўя адзначае, што на стан чалавека ўплывае таксама спосаб мыслення, пачуцці, якія носіць у сэрцы, неадпаведныя паводзіны і да т. п.
    Ідэал духоўнага здароўя – гэта стан першапачатковай ласкі. Адам і Ева перад першародным грахом не хварэлі ні целам, ні душой: “І стварыў Бог чалавека паводле свайго вобразу, паводле Божага вобразу стварыў яго, стварыў мужчыну і жанчыну” (Быц 1, 27). Сёння чалавецтва пакутуе ад розных хвароб, таму галоўным прадметам нашых разважанняў будзе здароўе: цялеснае, псіхічнае і духоўнае.
    Напэўна, кожны хоць аднойчы перажываў нездаровыя сітуацыі. У цяжкую хвіліну важна натрапіць на асобу, якая сапраўды здольна дапамагчы. Пачуць ад кагосьці словы тыпу “не хвалюйся” – занадта мала. Большасць чакае канструктыўных рэкамендацый адносна таго, як справіцца з напатканымі цяжкасцямі.
    Асноўным заданнем кансультавання з’яўляецца пазнанне іншага чалавека.
    Гэта штосьці большае, чым толькі назіранне за яго фізічным станам, таму што трэба браць пад увагу шмат іншых момантаў: вызнаваемыя каштоўнасці, узровень духоўнага жыцця, атрымліваемыя эмоцыі, успаміны і г. д. Праўда ў тым, што зразумець іншую асобу значна складаней, чым самога сябе.
    Рубрыка “Дапамагчы добрай радай” будзе датычыць пытанняў і праблем, з якімі чалавек сутыкаецца кожны дзень. Паважаныя Чытачы, калі Вас нешта непакоіць, у чымсьці сумняваецеся, шукаеце дакладнага тлумачэння або проста маеце патрэбу ў падтрымцы, можаце дасылаць свае лісты на паштовы або электронны адрас рэдакцыі, які змешчаны на апошняй старонцы газеты. Спецыялісты Каталіцкай кансультацыі з задавальненнем дапамогуць добрай радай!
    Хацелася б падкрэсліць, што ў першую чаргу трэба памятаць пра атрыманыя ад Бога звышнатуральныя дары: малітву, сакраманты, духоўнае кіраўніцтва. Езус з’яўляецца самым цудоўным Лекарам, а сакраманты – найлепшым лякарствам! Веды з вобласці псіхалогіі – таксама Божы дар. Тэрапію нельга супрацьпастаўляць малітве, сакрамантам ці духоўнаму кіраўніцтву. Усё гэта павінна супольна служыць здароўю чалавека.

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

 
white
Адзначаем імяніны:
Да канца года засталося дзён:  227

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.