На працягу года ў Беларусі адбываецца перэгрынацыя копіі фігуры св. Міхала Арханёла з італьянскага санктуарыя ў горным масіве Гаргана. Там знаходзіцца адзіная ў свеце святыня, якая была асвечана не чалавекам, а анёлам. Гэта ўчыніў сам св. Міхал падчас аднаго са сваіх аб’яўленняў на гары Святога Анёла. Копія фігуры завітала ўжо і ў парафіі нашай дыяцэзіі: Смаргонь, Навагрудак, Макараўцы і інш.

У літургічны ўспамін св. Міхала Арханёла кс. Ігар Лашук, арганізатар перэгрынацыі, раскрывае сутнасць пілігрымавання фігуры анёла і распавядае, як дзякуючы Божаму Провіду маленькая ініцыятыва перарасла ў маштабную справу. †

– Кс. Ігар, наблізьце, калі ласка, асобу св. Міхала Арханёла. Чым яна блізкая вернікам?
    – Св. Міхал Арханёл сваім імем абвяшчае Божую моц і хвалу. Імя Міхал у перакладзе з габрэйскай мовы азначае “Хто ж як Бог”. Згодна з хрысціянскай традыцыяй, св. Міхал Арханёл з’яўляецца першым і наймагутнейшым сярод анёлаў. Ён лічыцца ахоўнікам Божага трона. Паводле біблейскага аповеду, св. Міхал выступіў супраць збунтаванага Люцыфера і перамог. Ён дапамагае людзям у барацьбе са злом. У літургіі св. Міхала таксама называюць анёлам супакою. Да яго часта звяртаюцца з просьбамі вывесці душы з чыстца.
    “Князь войск нябесных” здаўна апекуецца землямі Беларусі. Яго выява змешчана на старажытным гербе Навагрудка – першай сталіцы Вялікага Княства Літоўскага, нашай гістарычнай краіны. Сёння св. Міхал Арханёл з’яўляецца галоўным апекуном Канферэнцыі Каталіцкіх Біскупаў у Беларусі і ўсяго мясцовага Касцёла. Можна лічыць, што ён для нас самы блізкі памагаты з усяго Нябеснага войска.
   
    – Што стала галоўным штуршком да правядзення перэгрынацыі ў Беларусі?
    – Усё пачалося з жадання развіваць культ св. Міхала Арханёла ў аднайменнай парафіі ў в. Багданава (Мінска-Магілёўская архідыяцэзія – заўв. рэд.), дзе я служыў на працягу 7-мі гадоў. Касцёл там час ад часу нішчылі варожыя сілы. Зло рабіла ўсё магчымае, каб выкараніць веру мясцовых жыхароў, аднак дзякуючы заступніцтву магутнага апекуна святыня заўсёды адраджалася. Ці ж не цуд? І я вырашыў устанавіць на фасадзе касцёла вялікую фігуру св. Міхала Арханёла, каб яна ўзвышалася над усёй багданаўскай зямлёй, заахвочваючы тутэйшых людзей паглыбляць сваю веру.
    Неўзабаве Божая воля звяла мяне з італьянцам, які родам з горада Монтэ-СанАнджэла, дзе знаходзіцца найстарэйшы санктуарый св. Міхала Арханёла ў свеце. Ён распавёў пра шматлікія аб’яўленні анёла ў горным масіве Гаргана і перэгрынацыю яго фігуры ў розныя краіны. Пасля мяне чакаў яшчэ адзін прыемны сюрпрыз: сябар прапанаваў падарыць копію фігуры з санктуарыя на гары Святога Анёла і дапамагчы транспартаваць яе ў Беларусь. 8 мая 2018 года, у чарговую гадавіну аб’яўленняў св. Міхала Арханёла, мы прынялі ўдзел у св. Імшы ў пячоры ў горным масіве Гаргана і асвяцілі копію цудатворнай фігуры. А пасля рэйсам на прыватным самалёце даставілі яе ў Беларусь. Зразумела, я прыйшоў да высновы, што перш чым ”пасяліцца” ў Багданаве, фігура павінна наведаць усе парафіі нашай краіны.
   
    – З Вашых назіранняў, як вернікі перажываюць перэгрынацыю?
    – Людзі з вялікім энтузіязмам прымаюць фігуру. Сярод вернікаў адчуваецца моцны рэлігійны ўздым. Кожны візіт у парафію мае свае асаблівасці, адзначаецца чымсьці новым. Запал парафіян і святароў натхняе мяне на новыя ідэі. Так, напрыклад, сёлета 29 верасня маю ў планах паляцець верталётам з Івянца на Анёльскую (Свята-Міхайлаўскую) гару пад Нясвіжам, дзе знаходзіўся касцёл св. Міхала і кляштар айцоў езуітаў.
   
    – Як адбываецца перэгрынацыя?
    – Звычайна пробашч запрашае наведаць яго парафію, і мы ўзгадняем бліжэйшую вольную дату. Стараюся даставіць як мага менш клопатаў з арганізацыйнымі момантамі: бяру на сябе перавоз і ўсталяванне фігуры ў святыні.
    Як правіла, перэгрынацыя распачынаецца ў аўторак – анёльскі дзень – і заканчваецца праз тыдзень. Вернікі атрымліваюць адмыслова падрыхтаваны малітоўнік “Хто ж як Бог”, у якім змешчаны ўсе малітвы праз заступніцтва св. Міхала Арханёла, і мы разам выпрошваем у Бога патрэбныя ласкі. Штодня людзі збіраюцца на св. Імшы, якая цэлебруецца ў розных інтэнцыях. Часам адбываецца ружанцовая малітва да распачацця літургіі, часам адарацыя перад Найсвяцейшым Сакрамантам пасля Імшы.
   
    – Адна з мэт перэгрынацыі – малітва за Беларусь. Аб чым просіце для нашай краіны?
    – Ідучы шляхам да збаўлення, мы адчуваем патрэбу дзяліцца гэтай радасцю з блізкімі. Жадаем дабра ўсім, з кім лёс наканаваў суіснаваць на створанай Богам зямлі. Молімся за Касцёл у Беларусі, за кіраўнікоў дзяржавы, за памерлых, якія жылі тут вякі таму, і за ўсё тое, што маем. Просім, каб Госпад аберагаў нас ад граху, каб Святы Дух сышоў на гэтую зямлю і аднавіў яе, каб св. Міхал Арханёл захоўваў яе ў спакоі.
   
    – У чым сутнасць перэгрынацыі фігуры анёла?
    – Складана жыць у свеце, дзе шалее д’ябал, без заступніцтва св. Міхала Арханёла, галоўнага нябеснага воіна. Прыступіўшы калісьці да змагання з цмокам, ён па сённяшні дзень вядзе барацьбу з праявамі зла. Падчас візітаў яго фігуры ў парафіі шмат хто можа пазнаёміцца або нанова адкрыць для сябе не толькі вобраз гэтага вялікага арханёла, але і сілу малітоўнага адзінства з анёламі. Кожны з нас патрабуе іх аховы.
    Аднак самае важнае, што хочацца данесці людзям, – гэта спрадвечнае пасланне св. Міхала: “Хто ж як Бог”. Мы будзем ісці па памылковым жыццёвым шляху, пакуль не зразумеем, што з’яўляемся стварэннямі Госпада і ніхто не можа зраўняцца з Ім.
   

Малітва да св. Міхала Арханёла     Святы арханёле Міхале, князь войскаў анёльскіх! Прыйдзі на дапамогу людзям, якім пагражае сіла цемры. Яны былі створаны па падабенстве Божым, адкуплены праз жыццё, смерць і ўваскрасенне Езуса Хрыста, Сына Божага, прызначаны святыняй Божай, каб прабываў у іх Святы Дух.     У табе, святы Міхале, Касцёл мае свайго абаронцу і апекуна, ты вядзеш збаўленых да нябеснага шчасця. Прасі Бога аб спакоі, каб перамог уладу сатаны, сейбіта хаосу, і каб не дазволіў трымаць людзей у няволі і шкодзіць Касцёлу. Няхай Беззаганная Панна Марыя, апранутая ў сонца Каралева анёлаў, праз цябе струшчыць галаву антыхрысту і абароніць сваіх зямных дзяцей ад яго варожага ўплыву.     Святы арханёле Міхале, абаронца хвалы Найвышэйшага, занясі нашы просьбы да Бога і выпрасі для нас Яго міласэрнасць. Беражы ў змаганні супраць спакус і пастак злога духа, будзь нам абаронаю. Князь войска нябеснага, моцаю Божаю скінь у пекла сатану і іншых злых духаў, якія на згубу душ снуюць па свеце. Паспрыяй, каб мы праз усю вечнасць былі верныя твайму закліку “Хто ж, як Бог!”. Амэн.