У той самы час як некаторыя католікі з падазрэннем ставяцца да святой споведзі і могуць увогуле занядбаць сваё рэлігійнае жыццё, знаходзяцца іншыя асобы, якія – натхнёныя – з вялікай павагай і цікаўнасцю глядзяць на сакраманты каталіцкай веры. Прадстаўнікоў некаталіцкага веравызнання часта цікавіць спосаб атрымання псіхалагічнай палёгкі, калі яны могуць распавесці пра свае правіны каму-небудзь іншаму, і суцяшэння, калі могуць пачуць словы малітвы адпушчэння грахоў. Але ці мае права некатолік стаць у чаргу да каталіцкага святара, каб скарыстаць сакрамант паяднання?
    Адказ на гэтае пытанне можна знайсці ў Кодэксе кананічнага права, у якім вельмі ясна гаворыцца пра сакраманты ў Каталіцкім Касцёле. “Служыцелі-католікі правамоцна ўдзяляюць сакраманты толькі католікам-вернікам, якія таксама правамоцна прымаюць іх толькі ад служыцеляў-католікаў” (кан. 844 §1). Такім чынам, каб атрымаць правамоцна сакрамант святой споведзі ў каталіцкага святара, трэба знаходзіцца ў поўнай еднасці з Каталіцкім Касцёлам, г. зн. быць католікам. †

Кодэкс кананічнага права вызначае некаторыя выключэнні для ахрышчаных некатолікаў: “Калі існуе небяспека смерці або калі, на думку дыяцэзіяльнага біскупа або Біскупскай Канферэнцыі, існуе іншая сур’ёзная неабходнасць, служыцелі-католікі могуць правамоцна ўдзяляць тыя ж сакраманты (споведзь, намашчэнне хворых, Эўхарыстыя) хрысціянам, якія не знаходзяцца ў поўнай еднасці з Каталіцкім Касцёлам (некатолікам), якія не маюць магчымасці прыняць гэтыя сакраманты ад служыцеля ўласнай супольнасці і просяць аб іх удзяленні спантанна, пры ўмове, што ставяцца да гэтых сакрамантаў з каталіцкай верай і да гэтага добра падрыхтаваныя” (кан. 844 §4). Адсюль вынікае, што ў некаторых абставінах, напрыклад, праваслаўны вернік можа папрасіць аб сакраманце споведзі каталіцкага святара, бо ў Праваслаўнай Царкве існуюць тыя ж самыя сакраманты, і Каталіцкі Касцёл прызнае іх дзейснымі. Аднак каталіцкі святар можа ўдзяліць адпушчэнне грахоў некатоліку толькі ў рэдкіх выключэннях, напрыклад, у выпадку небяспекі смерці.
    Безумоўна, хрысціяне-некатолікі маюць права пры неабходнасці шукаць духоўную дапамогу таксама і ў Каталіцкім Касцёле. Каб атрымаць яе, дастаткова падысці да каталіцкага святара і дамовіцца з ім аб сустрэчы. Аднак што датычыць споведзі, якая вызваляе чалавека, адкрываючы яму новы шлях, то маем справу з выключным сакрамантам. І каб прыняць гэты каштоўны дар ад каталіцкага святара, трэба належаць да Каталіцкага Касцёла.