У нашай краіне пастава вернікаў сведчыць пра вялікую марыйную набожнасць. Людзі збіраюцца ў касцёлах, каплічках, сваіх дамах, каля прыдарожных крыжоў на маёвыя набажэнствы. Паўсюль гучыць Ларэтанская літанія, адна з найпрыгажэйшых малітваў ушанавання Найсвяцейшай Панны Марыі. У Гродзенскай дыяцэзіі ў першую нядзелю мая таксама адзначаецца Дзень маці на знак таго, каб матулі вучыліся любові па прыкладзе Нябеснай Маці.

Давер заўсёды спраўджваецца
    Шматдзетная мама Эльвіра Праўко, якая гадуе 2-ух сыноў і 2-ух дачок, прызнаецца, што вялікая сям’я патрабуе цярплівасці, якой, здараецца, не хапае. “У такіх выпадках накіроўваюся за дапамогай да Маці Божай, – гаворыць жанчына. – Да Марыі звярталася і кожны раз, калі насіла пад сэрцам дзіця. Яна як Маці Езуса разумее ўсе складанасці цяжарнасці і не марудзіць з падтрымкай”. †

Асаблівая дапамога спатрэбілася жанчыне, калі яна ў 3-ці раз рыхтавалася стаць маці. Доктар, правёўшы ультрагукавое даследаванне, заўважыў пэўнае адхіленне ад нормы ў развіцці плода і раіў не нараджаць. Спадарыня Эльвіра не пагадзілася з гэтым і працягвала маліцца аб шчаслівым нараджэнні дзіцяці. “Я веру, што з нябеснай дапамогай кожная сітуацыя можа выйсці на лепшае. Сын Паша сапраўды нарадзіўся з «анамаліяй» – ён гіперактыўны. Некаторыя праблемы са здароўем не дазваляюць яму сур’ёзна заняцца спортам, каб пазбаўляцца назапашанай энергіі, аднак мы знайшлі для яго іншы шлях – цяпер ён «рве» баян, – адзначае з усмешкай жанчына. – Нядаўна заняў другое месца ў абласным музычным конкурсе”.
    Іншыя дзеці таксама адрозніваюцца талентамі: старэйшая Марыя малюе, сярэдні Юра спявае і грае на скрыпцы, а маленькая Аліса задзейнічана ў аркестры дзіцячага садка.
   
    Cтвараючы атмасферу
  духоўнага ўзрастання
    Прыязджаючы ў маі на вёску да бабулі, дзяўчаты і хлопцы ўжо традыцыйна збіраюць кветкі ў гародзе і ставяць каля абраза Марыі, моляцца Ларэтанскай літаніяй. “Калі я адгаворваю Ружанец, дзеці самі да мяне далучаюцца. І паступова малітва пераходзіць у спеў – Юра кожны раз прапануе спяваць «Вітай, Марыя»”, – адзначае маці. Дадае, што яны заўсёды разам чытаюць біблійныя аповеды, а перад сном усе атрымліваюць ад яе бласлаўленне крыжыкам на лбе. Падчас посту дзеці бяруць пастановы, а на святы любяць удзельнічаць ва ўрачыстых працэсіях.
    Спадарыня Эльвіра пераканана, што практыка веры прыносіць свой плён. Як і ў кожнай сям’і, дзеці сварацца паміж сабой, часам абражаюць бацькоў, але пры гэтым заўсёды ўсведамляюць дрэнныя ўчынкі. Ніколі не чакаюць з тым, каб папрасіць прабачэння ў мамы з татам ці адзін у аднаго.
    “Я бачу, што, нягледзячы на ўзрост, кожны з іх усталяваў асабісты кантакт з Усявышнім. Хлопчыкі перад музычнымі конкурсамі заўсёды просяць аб Божай дапамозе. Марыя з вільготнымі вачыма моліцца перад Найсвяцейшым Сакрамантам – давярае Богу ўсе свае падлеткавыя перажыванні”, – распавядае жанчына.
    Шматдзетная маці ўпэўнена, што каб выхаваць у дзецях хрысціянскія каштоўнасці, неабходна ў першую чаргу самой узрастаць і развівацца ў веры. Будучы падлеткам спадарыня Эльвіра прымала ўдзел у рэкалекцыях. Пасталеўшы, скончыла катэхетычны каледж. Сёння, маючы працоўныя і хатнія абавязкі, жанчына заўсёды знаходзіць час, каб пазнаць штосьці новае і ўмацавацца духоўна. “Нядаўна пачала наведваць семінар «Новае жыццё». Молімся праз заступніцтва Маці Божай аб патрэбных дарах і абнаўленні ў Святым Духу. Падчас сустрэч чытаем Святое Пісанне, разважаем, запісваем свае думкі, а пасля ў групах усё дэтальна абмяркоўваем. У Бібліі ёсць адказ на любую жыццёвую сітуацыю, таму варта не пераставаць яе спасцігаць”, – сцвярджае жанчына.
   
    Праз Марыю будаваць жыццё
  паводле волі Госпада
    Да замужжа родныя спадарыні Эльвіры і знаёмыя манахіні прадракалі ёй жыццё ў кляштары. І сама мела такія думкі. Вырашыла па прыкладзе Марыі прыняць Божую волю, якой бы яна ні была.
    Неўзабаве спаткала хлопца, з якім захацела стварыць сям’ю. Жанчына прызнаецца, што яны з мужам не рабілі ўстаноўку стаць шматдзетнай сям’ёй, а проста ставіліся да кожнай чарговай радаснай навіны аб цяжарнасці як да бясцэннага дару.
    “Памятаю, як у дзяцінстве заслухоўвалася гісторыяй пра Маці Божую і трох маленькіх пастушкоў з Фацімы. Так супала, што я таксама будучы дзіцём пасвіла кароў. Часта, знаходзячыся на пашы, малілася Ружанец з думкай пра тое, што і мне хацелася б дасведчыць які-небудзь цуд. І моцна прасіла аб гэтым Марыю.
    Ужо цяпер на дарослы розум усведамляю, што Найсвяцейшая Маці мяне выслухала, і цудаў у маім жыцці ажно чатыры”, – падсумоўвае спадарыня Эльвіра.