Паколькі многія браліся скласці апавяданне пра падзеі, якія адбыліся сярод нас, як перадалі нам тыя, хто ад пачатку быў відавочцам і слугою слова, вырашыў і я дакладна прайсціся па ўсім ад пачатку і апісаць табе ўсё па парадку, найшаноўнейшы Тэафіле, каб ты пазнаў праўдзівасць таго, чаму ты быў навучаны. У той час Езус вярнуўся ў моцы Духа ў Галілею і разышліся чуткі пра Яго па ўсёй ваколіцы. Ён навучаў ва ўсіх сінагогах, і ўсе Яго славілі. І прыйшоў Ён у Назарэт, дзе быў выхаваны, і ўвайшоў, паводле свайго звычаю, у дзень суботні ў сінагогу, і ўстаў, каб чытаць. Яму падалі кнігу прарока Ісаі. Ён, разгарнуўшы кнігу, трапіў на месца, дзе было напісана: “Дух Пана на Мне, бо Ён намасціў Мяне абвяшчаць добрую навіну ўбогім, паслаў Мяне абвяшчаць вызваленне палонным, і сляпым вяртаць зрок, каб выпусціць спакутаваных на свабоду, каб абвясціць год ласкі Пана”. Закрыўшы кнігу, Ён аддаў яе слузе і сеў. А вочы ўсіх у сінагозе былі скіраваныя на Яго. І Ён пачаў гаварыць ім: “Сёння споўніліся гэтыя словы Пісання, якія вы чулі”. †

Добрая Навіна
   Кожны чалавек, які жыве на зямлі, у пэўнай ступені з’яўляецца хворым, знаходзіцца ў няволі ўласных падзенняў і залежнасцей, пакутуе ад духоўнай слепаты. Як падае Святое Пісанне, Хрыстос прыйшоў у свет, каб абвяшчаць убогім Добрую Навіну, вязням – свабоду, а сляпым – прасвятленне. Тады на зямлі ўсталявалася Божае Валадарства, якім з’яўляецца вызваленне са зняволенняў, слабасцей і грахоў.
    Усе мы закліканы быць людзьмі 8-мі бласлаўленняў. Аднак на гэтым наша задача не заканчваецца: маем абвяшчаць Евангелле ўсюды там, дзе жывём, працуем і адпачываем, становячыся такім чынам сведкамі Любові ў свеце. Таму давайце прасіць Святога Духа, які пакоіцца на Езусе і праз усё зямное жыццё спадарожнічаў Яму, каб зышоў таксама на нас і ўчыніў здольнымі да прыняцця і адважнага абвяшчэння Добрай Навіны.
   

● Чым для мяне з’яўляецца Добрая Навіна, абвешчаная Езусам? ● Ці абвяшчаю я Евангелле?