Езус сказаў народу: “Валадарства Нябеснае падобнае да скарбу, схаванага ў полі, які знайшоў чалавек і ўтаіў. У радасці ад гэтага ён ідзе і прадае ўсё, што мае, і купляе гэтае поле. Яшчэ Валадарства Нябеснае падобнае да купца, які шукае прыгожых пярлін. Знайшоўшы адну каштоўную пярліну, ён ідзе і прадае ўсё, што мае, і купляе яе”. †

Крыніца сапраўднага шчасця – у Пану
    У пошуках уласнага шчасця мы вольныя і маем права выбіраць тое, што лічым найлепшым. Але ў той жа час гэтая вольнасць можа стаць перашкодай для дасягнення сапраўднага шчасця, якое мае крыніцу ў Стварыцелі. Што рабіць, каб гэтага не адбылося? Трэба стаць падобнымі да герояў сённяшняга Евангелля: чалавека, што купляе поле, на якім схаваў знойдзены скарб, ці купца, што шукае каштоўных пярлін і пакідае ўсё, каб набыць найпрыгажэйшы скарб – Нябеснае Валадарства.
    Бог прагне, каб кожны быў шчаслівы. Таму мае сэнс інвеставаць у тое, што набліжае нас да Яго, не звяртаючы ўвагі на тое, што ў вачах іншых мы рызыкуем і можам страціць усё. Магчыма, пакуль скарб Божага Валадарства закрыты і для нашых вачэй. Але дзеля яго варта аддаць усё, бо менавіта там мы зможам дасягнуць і спазнаць сапраўдную радасць і сапраўднае шчасце.