13 мая ў Гродзенскай дыяцэзіі пачалася перэгрынацыя фігуры Маці Божай Фацімскай. Галоўныя ўрачыстасці, прысвечаныя гэтай падзеі, адбыліся ў санктуарыі Маці Божай Фацімскай у Шчучыне. У гэты дзень вернікі духоўна ядналіся з папам Францішкам, які знаходзіўся на месцы марыйных аб’яўленняў у Партугаліі, а таксама разважалі аб ролі фацімскага паслання – вялікага дару для чалавецтва – і яго актуальнасці ў наш час.

Адна з найважнейшых падзей ХХ стагоддзя
    Урачыстасці ў Шчучыне пачаліся канферэнцыяй на тэму “Актуальнасць культу Маці Божай Фацімскай”, якую прамовіў а. д-р Віталій Сярко SchP. На пачатку свайго выступлення святар узгадаў падзеі з Фацімы ў храналагічным парадку. Распавёў пра аб’яўленні Маці Божай, што адбываліся паміж 13 мая і 13 кастрычніка 1917 года, а таксама пра таямніцы, якія Марыя адкрыла 3-ом пастушкам. †

“Словы, якія гучалі з вуснаў Найсвяцейшай Маці і анёла 100 гадоў таму, не губляюць свайго значэння і актуальнасці ў наш час, – адзначыў а. Віталій. – Галоўныя наказы фацімскага духоўнага запавету наступныя: маліцца, ахвяраваць пакуты за ўласныя грахі, а таксама ў інтэнцыі навяртання грэшнікаў; як мага часцей адгаворваць Ружанец; аддаць сябе апецы Найсвяцейшай Панны; пашыраць і паглыбляць пашану да Марыі і Яе Беззаганнага Сэрца, асабліва перажываючы першыя суботы месяца”. На завяршэнне дакладчык падкрэсліў, што праз сваё аб’яўленне ў Фаціме Марыя дала заблукалым людзям надзею на збаўленне і вызваленне з няволі граху. І толькі ад стаўлення да фацімскага паслання залежыць наша духоўнае адраджэнне і канчатковая перамога святла і праўды над цемраю і злом.
    Пасля канферэнцыі адбылася адарацыя Найсвяцейшага Сакраманту, падчас якой вернікі дзякавалі Усявышняму за ўсе атрыманыя ласкі праз пасярэдніцтва Найсвяцейшай Панны Марыі. Перапрашалі за правіны і выпрошвалі заступніцтва, каб заставацца вернымі свайму хрысціянскаму пакліканню.
   
    Фацімскае пасланне – шлях да навяртання
    Цэнтральным пунктам святкавання стала св. Імша з удзелам шматлікіх вернікаў, духоўных асоб, а таксама гродзенскіх іерархаў: біскупа ардынарыя Аляксандра Кашкевіча і дапаможнага біскупа дыяцэзіі Юзафа Станеўскага.
   

Урачыстасці з нагоды 100-й гадавіны фацімскіх аб’яўленняў таксама адбыліся ў парафіях Нараджэння НПМ у Зарачанцы і св. Мікалая ў Геранёнах. У гэты ж дзень у парафіі Святой Сям’і ў Лідзе быў арганізаваны дзень нястомнай малітвы на ружанцы за мір і супакой ва ўсім свеце і ў інтэнцыі сем’яў парафіі.

    Звяртаючыся да прысутных з гаміліяй, біскуп Юзаф адзначыў, што фацімскае пасланне, якое Марыя перадала свету праз дзяцей візіянераў, канцэнтруецца, найперш, вакол тэмы малітвы і навяртання. Іерарх падкрэсліў, што Маці Божая паказала пастушкам жахі пекла, прадказала пераслед Касцёла, але, у той жа час, дала надзею. “Марыя сказала: «Урэшце маё Беззаганнае Сэрца затрыумфуе і Расія навернецца». Яна гаварыла пра Расію, але мелася на ўвазе і Беларусь, якая ў той час была часткай Расійскай Імперыі”, – сказаў іерарх.
    Біскуп Юзаф таксама адзначыў, што і сёння Марыя прыходзіць, каб дакрануцца да людскіх сэрцаў, каб ажывіць веру і паказаць, што кожны з нас з’яўляецца дзіцём Божым. “Падчас перэгрынацыі Маці Божая ў фацімскай фігуры пойдзе шукаць тое месца, тых дзяцей, праз якіх зможа перадаць свету гісторыю збаўлення і свой заклік да навяртання. І кожны, хто прыме Яе, паверыць і будзе жыць так, як заклікае Марыя, стане на шлях збаўлення, – прамовіў пастыр. – Няхай Нябесная Маці, якая дакранулася да нашага сэрца і ўклала ў рукі ружанец, учыніць так, каб мы, ідучы ў свет, не баяліся дакрануцца да чалавека, які перажывае духоўную адзіноту і не ведае, у якім напрамку рухацца”.
    На заканчэнне літургіі да прысутных звярнуўся біскуп Аляксандр Кашкевіч. Іерах пажадаў, каб узнёслая падзея перэгрынацыі фігуры Маці Божай Фацімскай стала выразам удзячнасці дыяцэзіян за адраджэнне веры і Касцёла на гэтых землях, за пабудаваныя і адноўленыя святыні, за перамену людскіх сэрцаў і сумленняў, а таксама за ўсе атрыманыя ласкі. “Будзем перажываць гэтую перэгрынацыю ў духу навяртання, перапрашэння і пакаяння за тое, што ў нашым асабістым і грамадскім жыцці не заўсёды ідзём за голасам Пана. Маю надзею, што гэтая падзея спрычыніцца да паглыблення нашай веры, надзеі і любові, да ўзрастання набожнасці, да лепшага зразумення і прыняцця фацімскага паслання і да навяртання сэрцаў. Няхай Марыя, Каралева Супакою, ахінае нас матчынай апекай і вядзе да збаўлення!” – сказаў біскуп Аляксандр.
    Затым іерарх асвяціў фігуру Маці Божай Фацімскай, з якой вернікі прайшлі працэсіяй вакол касцёла. З гэтага моманту пачалася вандроўка фігуры Фацімкай Панны па парафіях Гродзенскай дыяцэзіі.
   

Шчучын абраны ў якасці месца пачатку перэгрынацыі невыпадкова. Тут знаходзіцца адзіны санктуарый Маці Божай Фацімскай у Гродзенскай дыяцэзіі. З пачатку 1990-х гадоў тут арганізоўваліся спецыяльныя набажэнствы на ўзор тых, што праходзяць у Фаціме. У іх актыўна прымалі ўдзел не толькі парафіяне, але таксама вернікі з іншых куткоў Гродзеншчыны.     Імпульс развіццю марыйнага культу, напэўна, дала фігура Маці Божай Фацімскай, гісторыя якой заслугоўвае асаблівай увагі. Дзякуючы намаганням тагачаснага пробашча а. Казіміра Вуйцяка і падтрымцы арцыбіскупа Тадэвуша Кандрусевіча ў 1991 годзе гэтая фігура была прывезена на Сусветныя дні моладзі ў Чанстахову. Падчас перапынку на чуванні Святы Айцец Ян Павел ІІ запрасіў Мітрапаліта на сустрэчу, падчас якой іерарх адважыўся папрасіць Папу асвяціць фігуру. Дамовіліся, што ён учыніць гэта, калі будзе вяртацца на адарацыю да алтара. І сапраўды, праходзячы паблізу вернікаў з Беларусі, Святы Айцец затрымаўся, усклаў на фігуру карону і асвяціў яе. Той факт, што шчучынская фігура Маці Божай Фацімскай не зусім звычайная, дадаткова мабілізаваў вернікаў да ўшанавання Нябеснай Заступніцы. Зараз да Багародзіцы, як да духоўнай Маці, яны ўзносяць свае просьбы і падзякі.     З вялікай радасцю мясцовыя вернікі прынялі навіну аб святкаванні юбілею 100-годдзя аб’яўленняў Маці Божай у Фаціме. Кожны 13-ты дзень месяца ў нашай парафіі праводзіліся спецыяльныя тэматычныя казанні. Праграма падрыхтоўкі таксама ўключала Навэнну да Маці Божай Фацімскай. Спадзяёмся, што падчас перэгрынацыі Маці Міласэрнасці ў фацімскім абліччы прыйдзе да кожнага з нас, адорыць сваёй ласкай, умацаваўшы веру, надзею і любоў.