ГРОДНА
Панядзелак,
15 ліпеня
2024 года
 

Перажыць праўдзівую радасць свят

Слова рэдактара

22-457-pdf byМы ўсё яшчэ трываем у адвэнтавым чаканні свят Божага Нараджэння. Перажываем асаблівы час ласкі, які дае нам Пан Бог. Дадзены перыяд служыць роздуму над пытаннем “што мы ўвогуле збіраемся святкаваць”, а таксама “як выглядае і куды накіроўваецца наша жыццё”.
    Час Адвэнту і Божага Нараджэння – гэта магчымасць усвядоміць і прыняць, што ні елка, ні падарункі, ні нават аплатка з сям’ёй не прынясуць шчасця: зямнога, а тым больш вечнага. Па-сапраўднаму ашчаслівіць чалавека здольны толькі Езус. Святы з’яўляюцца чарговым запрашэннем да таго, каб за “ўпакоўкай” – пакупкамі ды прыгатаваннем смачных страў – мы разгледзелі сапраўдны “падарунак” – жывога Бога. Варта разарваць тую абалонку, што так часта замінае ўбачыць рэчаіснасць, і перажыць праўдзівую радасць гэтай урачыстасці. І тады шыкоўны вігілійны стол ці дарагія сюрпрызы ад св. Мікалая будуць нічым у параўнанні з духоўным багаццем.
Разам з прыходам Пана нашыя сэрцы павінны напоўніцца любоўю і радасцю. Стварыцель свету аб’явіўся Чалавекам, каб быць як мага бліжэй да людзей, бачыць і раздзяляць іх турботы, радасці, клопаты і надзеі. Ён не хоча заставацца недасяжным і далёкім, але як нявіннае Немаўля запрашае стаць Божымі дзецьмі – паслухмянымі, якія без рэшты давяраюць апецы Айца.
    Сёлетняе святкаванне Божага Нараджэння не першае ў гісторыі Касцёла. Але ўсё яшчэ ўражвае цуд, які здзейсніўся больш за 2 тысячы гадоў таму і будзе трываць да канца часоў. Бог прыходзіць вельмі ціха: як у тую ноч у Бэтлееме. Найважнейшая таямніца адкрываецца тым, хто поўнасцю і бязмежна верыць. Зірнём на шопку і на Езуса, утоенага ў табернаклі – мы можам перажываць цуд Уцелаўлення падчас кожнага Пераісточання. Хрыстос у сваім хвалебным Целе прысутнічае таксама як Дзіця, у якім існуе такая ж паўната Боства, што і ў прыбітым да крыжа Богу-Чалавеку.
    У вігілійную ноч скіруем позірк на неба і першую зорку. Яна ўкажа нам дарогу і правядзе ў бэтлеемскі хлеўчык, як некалі накіравала мудрацоў з Усходу. Створым адпаведны клімат, каб Езус, прыйшоўшы, застаў дзверы нашых сэрцаў адкрытымі і сагрэўся ў іх – не толькі падчас сямейных, поўных радасці і прабачэння свят, але і на працягу ўсяго жыцця.
   
      Дарагія Чытачы!
    Вы трымаеце ў руках апошні нумар газеты ў бягучым годзе. З гэтай нагоды хацелася б падзякаваць за тое, што надалей застаецеся з намі, Сябры. Мы існуем менавіта для Вас, таму прыміце ад імя ўсёй рэдакцыі асаблівыя святочныя пажаданні. Няхай Хрыстос народзіцца ў Вашых сэрцах, а Яго любоў напоўніць супакоем. Дзіцятка Езус стане крыніцай глыбокай веры, нязломнай надзеі і гарачай любові. А Марыя Панна, якая схіляецца над яселькамі, выпрасіць усім бласлаўлення на надыходзячы 2017 год Панскі.

Актуальны нумар

 

Каляндар 2022

Каляндар
«Слова Жыцця»
на 2022 год

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.