ГРОДНА
Нядзеля,
21 красавіка
2024 года
 

Выказаць захапленне жаночай душой

На скрыжаванні

Хвала Хрысту!
    Вітаю чытачоў моладзевай рубрыкі “На скрыжаванні”. У сённяшнім нумары мы з Вамі паразважаем пра прызначэнне жанчыны, яе ўнікальную ролю ў грамадстве і прыродную ахвярнасць. Падумаем, чым жаночая душа адрозніваецца ад мужчынскай і як прадстаўніцы цудоўнай паловы чалавецтва ўплываюць на будучыню.
   Наперад з Богам!

    ВЫКАЗВАННЕ З БІБЛІІ:
    “І сказаў Гасподзь Бог: нядобра быць чалавеку аднаму; створым яму памочніка, адпаведнага яму” (Бц 2, 18)
   Разам мужчына і жанчына могуць усё, што ні адзін паасобку здзейсніць не зможа. Дасканалых няма, кожны чалавек унікальны. І ніхто не пераўзыхо-дзіць другога, паколькі абодва аднолькава неабходныя. Па задуме Стварыцеля, мужчына і жанчына ўзаемна дапаўняюць адзін аднаго, як ключ і замок.
   
    ІНТЭНЦЫЯ МЕСЯЦА:

    каб ва ўсіх краінах свету да жанчын адносіліся з шанаваннем і павагай, а таксама каб быў ацэнены іх неабходны ўклад у развіццё грамадства
   Галоўнае прызначэнне жанчыны – быць увасабленнем Любові. І дзяліцца гэтай любоўю ўсімі даступнымі шляхамі: праз ўзаемаадносіны, творчасць, працу. Жанчыны фарміруюць будучыню, выхоўваючы дзяцей. Ад таго, якімі яны стануць, залежыць заўтрашні дзень. Молімся за жанчын, каб яны і далей напаўнялі любоўю ўсё, да чаго дакранаюцца.
   
  ПРАДМЕТ РАЗВАЖАННЯЎ МЕСЯЦА:
    прызначэнне
   Бог невыпадкова стварыў нас жанчынамі і мужчынамі, даўшы кожнаму непаўторныя дары і таленты, адвёўшы кожнаму яго месца і абавязкі. У залежнасці ад гэтага людзі будуюць сваё жыццё. Адны нараджаюць і выхоўваюць дзяцей, другія абараняюць сваю сям’ю. Адны займаюцца фізічнай працай, другія ствараюць утульнасць і прыгажосць.
    Толькі тады, калі мы ўсвядомім, навошта Бог стварыў нас менавіта такімі, а не іншымі, мы будзем па-сапраўднаму шчаслівымі. Адсюль і слушныя клопаты, мары, надзеі.
   
 МЭТА МЕСЯЦА:
    дакладна акрэсліць мужчынскія і жаночыя ролі
   У сённяшнім свеце часта адбываецца змяшэнне роляў: жанчына можа выконваць мужчынскія абавязкі, а мужчына – жаночыя. Жанчыне, напрыклад, нярэдка даводзіцца насіць цяжкія сумкі, надрывацца на некалькіх месцах працы. Яна можа і шафу сабраць, і кран адрамантаваць. Вядома, сапраўдная жанчына ўсё можа зрабіць сама, толькі, як кажуць, сапраўдны мужчына гэтага не дапусціць.
    Жанчынам час паразважаць над тым, ці не прымяраюць яны на сябе мужчынскія ролі, а мужчынам – ці дазваляюць яны жанчынам “замяшчаць” іх у сваім жыцці.
   
 СПРАВА МЕСЯЦА:
    выказаць захапленне жаночай душой
   Чым жа яна адрозніваецца ад мужчынскай? Жаночая душа больш адчувальная, пяшчотная і ранімая. Яна паклікана аддаваць, дзяліцца сабою са светам. Гэта тлумачыцца тым, што кожная жанчына – патэнцыяльная маці. І яе прызначэнне – прыносіць сваё жыццё ў дар.
    Мама, сястра, бабуля, сяброўка, знаёмая, калега... Вакол нас шмат жанчын, якім варта выказаць падзяку або прапанаваць плячо падтрымкі. Гэта можна здзяйсняць пастаянна праз добрае слова, учынак або малітву.
 
КНІГА МЕСЯЦА:

  “Жанчыны місіянеркі”, Вера Кушнір
   Аўтар распавядае пра лёсы простых жанчын-хрысціянак, якія прысвяцілі сябе служэнню Богу і людзям. На прыкладзе іх жыцця паказана, што кожная жанчына, якая любіць Бога, з’яўляецца Яго вучаніцай і мае магчымасць працягнуць гэты спіс. Кніга можа стаць добрай дапамогай у працы жаночых гурткоў і груп пры касцёле, а таксама яна карысная для індывідуальнага вывучэння.

 ПЕСНЯ МЕСЯЦА:

   “Любіце жанчын”, T1One
   Выканаўца глыбока разглядае прыроду жанчыны: “яна ўсім сэрцам бачыць глыбіню істоты”, “і нават у недахопах заўважыць нешта добрае”. “Каб дарыць сваё нутро, ёй не патрэбны прычыны”, “любіць насуперак усяму і не можа інакш”. У песні гучыць заклік шанаваць і захапляцца жанчынамі кожнае імгненне. “Не трэба лішніх слоў, проста любіце іх...”. Выканаўца жадае, каб у жаночых сэрцах бясконца была вясна, і “толькі радасць у іх цудоўных вачах”.

АСОБА МЕСЯЦА:

    святая Уршуля
   Нарадзілася 17 красавіка 1865 года ў Лосдорфе (Aўстрыя). Паходзіла са знатнай польскай сям’і Ледухоўскіх, якая была вядома сваім патрыятызмам і рэлігійнасцю.
    З ранніх гадоў дзяўчына была адчувальнай да людской беднасці і нядолі. Ва ўзросце 21 год уступіла ў кляштар уршулянак у Кракаве. У ордэне атрымала сярэднюю адукацыю і дыплом настаўніцы. На працягу многіх гадоў навучала ў гімназіі. З 1904 года выконвала абавязкі настаяцельніцы кляштара. У гэты ж час заснавала першую ў Польшчы марыйную кангрэгацыю для дзяўчат. Клапоцячыся пра студэнцкую моладзь, адкрыла інтэрнат для студэнтак і арганізавала рэлігійныя курсы. Заснавала польскія школы і дамы апекі ў Расіі, Фінляндыі і Швецыі. Займалася дабрачыннай дзейнасцю.
    У ходзе такой дзейнасці ў яе нарадзілася ідэя стварэння новай манаскай сям’і, дастасаванай да актуальных патрэб выхаваўчай працы. Пасля заканчэння ваенных дзеянняў набыла невялікую нерухомую маёмасць у Пневах, якая стала генеральным домам уршулянак старых. Апостальская Сталіца зацвердзіла Кангрэгацыю.
    Памерла Уршуля 29 мая 1939 года ў Рыме. У 1983 годзе была беатыфікавана папам Янам Паўлам II, у 2003 годзе – ім жа кананізавана. У пяцідзясятую гадавіну смерці мошчы Уршулі былі перанесены з Рыма ў горад Пневы, у капліцу галоўнага манастыра жаночай манаскай кангрэгацыі Сясцёр Уршулянак Сэрца Езуса Канаючага.
   
   
Да якіх святых звяртацца з асаблівай просьбай аб заступніцтве ў маі?
   Св. Юзаф (1 мая),
    св. Філіп (6 мая),
    св. Станіслаў (8 мая),
    св. Беатрыс (10 мая),
    св. Зоф’я (15 мая),
    св. Андрэй (16 мая),
    св. Фелікс (18 мая),
    св. Рыта (22 мая),
    св. Уршуля (29 мая),
    св. Жана (30 мая).
   
    Усе заўвагі і пажаданні дасылайце ў рэдакцыю або на электронны адрас аўтара рубрыкі Гэты e-mail адрас абаронены ад спаму-ботаў, для яго прагляду ў Вас павінен быць уключаны Javascript .

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

 
white
Адзначаем імяніны:
Да канца года засталося дзён:  255

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.