ГРОДНА
Пятніца,
09 снежня
2022 года
 

Якой павінна быць сям’я

Слова рэдактара

 На пытанне, якой павінна быць сённяшняя сям’я, усё цяжэй знайсці адказ. Давайце паспрабуем задумацца, чаму так? Чаму на адно з фундаментальных пытанняў нашага жыцця ў сучасных рэаліях цяжка правільна адказаць? Хтосьці думае, што сям’я перш за ўсё павінна быць любячай, але ў сённяшнім свеце варта спытацца, што гэта за любоў і паміж кім. Альбо, можа, хтосьці скажа, што сям’я здаўна была і павінна быць шчаслівай, але як мы сёння разумеем шчасце, бо сям’я сёння – гэта не толькі родны дом, у які хочацца вяртацца, цяпер такой фармулёўкі ўжо замала. А хтосьці дадасць яшчэ шмат прыметнікаў, хаця б: клапатлівая, апякунчая, талерантная, вытрыманая і, перш за ўсё, сямейная.
    Чаму сёння так складана знайсці адказ на, здавалася б, вельмі простае жыццёвае пытанне? Адказ я пачуў у аднаго з амерыканскіх кардыналаў, які прысутнічае на Сінодзе Біскупаў. Ён сказаў пра сучасны свет так: “Апаноўваючы прыроду з мэтай развіцця, мы, лю-дзі, атруцілі нашы акіяны і паветра, якім дыхаем. Мы атруцілі кантрацэпцыяй чалавечы арганізм. Мы страцілі разуменне сексуальнасці. У імя самарэалізацыі мы заняліся будаўніцтвам новай Вавілонскай вежы тыраніі, якая падкармлівае нашы жаданні, але прымушае да смерці галадаць нашу душу”. Менавіта такім становіцца наш свет, у якім жывём мы, жывуць нашыя сем’і.
Я не сумняваюся, што правільны адказ на гэтае пытанне дасць нам чарговы Сінод у Рыме на тэму сям’і. З вуснаў папы Францішка мы пачуем, якой сёння павінна быць сям’я. Пачуем таксама, што Касцёл можа зрабіць для кожнай сям’і, якім чынам ён будзе далей ёй спадарожнічаць.
    Некалькі дзён таму я быў сведкам казання аднаго ксяндза на тэму сям’і. Цікава тое, што адрасатамі былі дзеці. Гамілія не заняла шмат часу, але мы пачулі мноства простых адказаў ад дзяцей. Святар спытаў у маленькіх вернікаў, што такое сям’я і як яны яе разумеюць. Мы пачулі адназначны адказ, што сям’я – гэта тата, мама і дзіця. Затым святар спытаўся, колькі дзяцей павінна быць у сям’і, на што прагучалі розныя адказы. Адзін, два, тры... Кожнае дзіця казала пра сваю сям’ю, пра тое, як ёсць у іх родным доме. Пазней, на знак супакою, святар прапанаваў дзецям падысці да сваіх бацькоў і перадаць ім знак супакою. Усе заўважылі атмасферу радасці і шчасця сярод блізкіх адзін аднаму людзей. Як жа важна сёння, каб нашы сем’і былі здаровымі, прытым як духоўна, маральна, так і фізічна, і псіхічна. Няхай “аповесць” сямейнага жыцця будзе вернай Евангеллю па прыкладзе Святой Сям’і з Назарэта, па прыкладзе тых сем’яў, якія жывуць згодна з Евангеллем.
   
    Арцыбіскуп Тадэвуш Кандрусевіч у Рыме так сказаў: “Я хацеў бы выехаць з Сінода з перакананнем, што дзякуючы малітве і нашым дзеянням сучасная сям’я пераможа розныя крызісы і будзе надзеяй для ўсяго свету”. Варта маліцца за нашыя сем’і, каб яны былі моцныя Богам і заставаліся надзеяй для ўсяго свету. Такія сем’і неабходны сучаснаму грамадству. І варта дадаць, што сёння менавіта такіх сем’яў вельмі шмат.

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

violet
Адзначаем імяніны:
Сёння ўспамінаем памерлых святароў:
Да канца года засталося дзён:  23

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.