ГРОДНА
Чацвер,
18 ліпеня
2024 года
 

Трэба клапаціцца аб захаванні чыстага сэрца

Інтэрв'ю

Кс. Антоній Грэмза, галоўны арганізатар Дыяцэзіяльных дзён моладзі Гродзенскай дыяцэзіі ў Смаргоні
– Ксёндз Антоній, раскажыце, калі ласка, чаму месцам сустрэчы моладзі дыяцэзіі была выбрана менавіта Смаргонь і чаму такі дэвіз?
    – Адказ вельмі просты: у апошні раз Дні моладзі праходзілі ў Смаргоні ў 2003 годзе, і ўвогуле, моладзь з гэтага горада вельмі актыўная і годна прымаць у сябе ДДМ. Дэвіз – “Чыстыя сэрцам бачаць Бога” – з’яўляецца парафразай галоўнага дэвіза, пададзенага папам Францішкам моладзі ўсяго Касцёла на бягучы год: “Шчаслівыя чыстыя сэрцам, бо яны Бога ўбачаць”. Гэта словы аднаго з бласлаўленняў Пана Езуса.
   
    – Якія існуюць крытэрыі выбару сталіцы Дыяцэзіяльных дзён моладзі?
    – Крытэрыі заўсёды нязменныя: добры даезд, гасціннасць ксяндзоў і вернікаў, актыўнасць мясцовай моладзі ў жыцці дыяцэзіі і парафіі.
   
    – Каб прамовіць да сучаснай моладзі ці заахвоціць яе да чагосьці, трэба выкарыстаць усе магчымыя сродкі. Якія сродкі будуць выкарыстаны падчас гэтых дзён, каб маладыя людзі пачулі Хрыста і адзін аднаго?
    – Гэтымі сродкамі евангелізацыі будуць спецыяльны цягнік ДДМ – г.зв. цягнік “Чыстага сэрца”, рэлігійныя канцэрты і сустрэчы з людзьмі, якія падзеляцца сведчаннем аб тым, чаму варта клапаціцца пра захаванне “Чыстага сэрца” ў кансэкраваным жыцці, святарстве, сужэнстве, пасля заручын і падчас перажывання перыяду маладосці.

    – Больш моладзі прыязджае з гарадоў, менш – з вёсак. Але за столькі гадоў назіранняў, ці можаце Вы сказаць, з якіх парафій прыбывае больш за ўсё маладых людзей?
    – Так і ёсць. Моладзь з гарадскіх парафій – з Гродна альбо з Ліды, са Шчучына і Іўя – ахвотна прымае ўдзел у моладзевых сустрэчах. Колькасць удзельнікаў з гэтых гарадоў заўсёды высокая. Але ў працэнтных суадносінах ёй не саступаюць, а нават і перавышаюць яе некаторыя сельскія парафіі: Суботнікі, Забалаць, Шылавічы, Ліпнішкі.
   
    – Якія новыя пункты прадугледжаны ў плане сёлетніх Дзён моладзі?
    – Як і заўсёды, пункты праграмы будуць адпавядаць галоўнай тэме сустрэчы – словам “Чыстыя сэрцам бачаць Бога”. Ім таксама будуць прысвечаны катэхезы і працы ў групах, размовы і магчымасць далучыцца да “Руху чыстых сэрцаў”, гэта значыць да групы людзей, якія ў сферы свайго інтымнага і сексуальнага жыцця стараюцца жыць паводле бласлаўлення і навукі Пана Езуса.
   
    – Ці прыносіць плён феномен моладзевых сустрэч, а гэта каля 1000 маладых людзей у папярэдніх ДДМ?
    – Заўсёды падчас Дыяцэзіяльных дзён моладзі адбываецца сталы працэс рэлігійнага выхавання маладых людзей. Сёлетняя сустрэча – не выключэнне. Ад выхавання адбываецца пераход да самавыхавання. Гэта відаць у жыцці моладзі, якая рэгулярна ўдзельнічала ў сустрэчах, а сёння сама вядзе актыўнае жыццё ў розных апостальскіх і парафіяльных групах, ажыўляючы іх сваімі хрысціянскімі ўчынкамі і сведчаннем жыцця.
   
    – Як можна заахвоціць маладых людзей да штодзённай працы ў сваіх парафіях?
    – Трэба, перш за ўсё, паверыць у іх, каб яны маглі пераканацца, што змогуць разам зрабіць шмат добрага. Дасягненне гэтай мэты залежыць ад сталай прысутнасці душпастара разам з моладдзю і ад скіравання яе, каб на самой справе магла перажываць сваю веру як сустрэчу з жывым Богам. Тады будзе менш негатыўных выказванняў з боку ксяндзоў і дарослых адносна таго, што наша моладзь дрэнная ці што яна мала ўдзельнічае ў парафіяльным і апостальскім жыцці. На самой справе моладзь добрая, трэба толькі ўмець адкрыць яе патэнцыял дабра.
   
    – Дзякуй за размову.

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

green
Адзначаем імяніны:
Сёння ўспамінаем памерлых святароў:
Да канца года засталося дзён:  167

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.