ГРОДНА
Нядзеля,
21 красавіка
2024 года
 

Запраектаваць сваё жыццё з Богам

Слова рэдактара

 “У новы год мы павінны ўваходзіць з Езусам Хрыстом, народжаным з Дзевы Марыі, і ўносіць Яго бласлаўленне ў нашае жыццё”, – так заахвочваў усіх сабраных у катэдральнай базіліцы вернікаў наш кс. бп Аляксандр Кашкевіч падчас Эўхарыстыі на Новы год. Гэтымі ж словамі я вырашыў распачаць сваё першае сёлетняе разважанне, паколькі гэта вялікае заданне для кожнага з нас. Яно не вельмі лёгкае, але з Божай дапамогай яго ўдасца выканаць. Больш таго, гэта заданне не толькі на новы год, але і на ўсё жыццё. Калі хтосьці яшчэ не ўзяўся за яго выкананне, раю не адкладваць на апошнюю хвіліну, паколькі ніхто не ведае, калі гэтая хвіліна надыдзе. Калі ёсць тыя, хто ўжо паспрабаваў прыняць гэтыя словы ў сваё жыццё, яны бясспрэчна цешацца жыццём з Богам. А таму варта запраектаваць сваё жыццё па Божым прыкладзе і напоўніць яго Божым бласлаўленнем ужо на пачатку года.
    Калі мы штосьці плануем ці праектуем, у нас ёсць пэўная мэта. Мы стараемся спланаваць усё так, каб дасягнуць гэтай мэты. Калі нам гэта не ўдаецца, мы пераконваемся, што пэўныя нашы разлікі былі памылковымі. Некаторыя з іх мы можам выправіць, але ёсць і непапраўныя памылкі. У духоўным жыцці мы таксама маем нейкія планы і пастановы. Але мы павінны рабіць іх разам з Езусам, які не дапусціць, каб мы зрабілі памылку, бо для нашай душы яна можа быць смяротнай.
Божае бласлаўленне спрыяе таму, што чалавек знаходзіць свой жыццёвы шлях, ідучы па якім ён праектуе сваё жыццё так, як гэтага жадае Бог для карысці самога чалавека. Не трэба баяцца Пана Бога, паколькі Ён нас не абмяжоўвае, не трымае на прывязі, а наадварот – праз сваю прысутнасць дае нам шмат для працы, дае нам цэлы свет. Мы можам прыгадаць першых людзей, розных прарокаў, намашчаных Богам, Яна Хрысціцеля, святых, праз заступніцтва якіх мы молімся і г.д. У гэтае кола ўпісана і гісторыя нашага жыцця.
    У сённяшні час нам усім неабходны супольнасны духоўны пошук і змена свядомасці. Гэта самыя важныя аспекты рэлігійнай актыўнасці, якіх сёння нам, вернікам Беларусі, не хапае. Размаўляючы з рознымі людзьмі, я заўважаю, як яны нанова адкрываюць Бога, як пачынаюць разумець сапраўдны сэнс веры, жыцця з Богам, неабходнасць вывучэння Бога і прысутнасці Касцёла ў іх жыцці, як яны адчуваюць сябе шчаслівымі з-за таго, што ідуць да споведзі, на нядзельную Эўхарыстыю, што дзеці і моладзь маюць сёння мноства магчымасцей менавіта ў Касцёле знайсці сябе і сустрэць Бога. Давайце запраектуем сваё жыццё так, каб быць шчаслівымі і ўдзячнымі за мноства ласкаў, якімі Бог нас адорвае, а таксама дзяліцца гэтымі ласкамі з іншымі.

У новым 2015 годзе мы хочам паволі запраектаваць таксама нашу газету, каб яна больш чыталася Вамі, дарагія Чытачы. Мы вырашылі перш за ўсё зрабіць яе каляровай, паколькі ў гэтых колерах схавана прыгажосць Божага стварэння. Нам яшчэ неабходна трохі часу, каб усё адшліфаваць, таму прашу Вас набрацца цярплівасці ў гэтым нашым праектаванні для Вас. Калі ў Вас ёсць нейкія прапановы, дасылайце іх на адрас нашай рэдакцыі. У гэтым годзе свет убачыць шмат новых і цікавых артыкулаў, мы плануем паказваць жыццё простых людзей, прыклад якіх захопіць не аднаго з нас. Мы спадзяёмся, што з Божай дапамогай новыя праекты нашай газеты Вы ўспрымеце пазітыўна. Мы ўжо ўвайшлі ў новы год разам з Езусам і запрашаем кожнага з Вас, нашы дарагія і любімыя Чытачы, з Божым бласлаўленнем запраектаваць сваё жыццё разам з намі.

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

 
white
Адзначаем імяніны:
Да канца года засталося дзён:  255

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.