6–7 чэрвеня ў дыяцэзіяльным санктуарыі Пана Езуса Журботнага ў Росі правёў рэкалекцыі знакаміты харызматык з Уганды (Афрыка) кс. Джон Башабора. Удзел у рэкалекцыях прымалі вернікі як з Беларусі, так і з-за мяжы.

Трэба адзначыць, што падчас гэтых рэкалекцый кс. Башабора “паставіў на калені” натоўпы людзей. Вернікі прыступілі да сакраманту пакаяння, які ўдзялялі дзясяткі святароў. Многія ў чарговы раз адкрыліся на Божую ласку.
    Як падкрэсліў сам кс. Башабора, гэта не ён аздараўляе чалавека, гэта робіць Увас­крослы Бог. Каб чалавек мог атрымаць духоўнае ці фізічнае аздараўленне, на думку рэкалекцыяніста, умовай з’яўляецца вера, адкрыццё на Божую дзейнасць і размяшчэнне Бога на першым месцы ў сваім жыцці.
   Ва ўрачыстасць Пяці­дзясятніцы, 8 чэрвеня, на завяршэнне рэкалекцый у Росі, Гродзенскі ардынарый блаславіў шматлікіх удзель­нікаў.Іерарх, памятаючы пра сваіх вернікаў, вяртаючыся з Ваўкавыска, дзе ўдзяліў сакрамант канфірмацыі, наве­даў Рось. Звяртаючыся да прысутных, ён заахвоціў маліцца ў інтэнцыях Святога Айца аб супакоі, таму што ў тыя хвіліны праходзіла гістарычная сустрэча лідараў Палестыны і Ізраіля ў Ватыкане. Затым архіпастыр памаліўся аб супакоі ва ўсім свеце малітвай “Ойча наш” і “Вітай Марыя”.
    Біскуп Аляксандр шчыра падзякаваў кс. Джону Башабору, які на працягу двух дзён карміў Божым словам і духоўна ўзмацняў беларускіх вернікаў.†

Перад лідскім касцёлам сабралася каля 12 тысяч чалавек. Малі­тоўная сустрэча пачалася гімнам да Святога Духа “Veni Creator” і супольным Ружанцам, затым парафіяльны хор руху “Gloriоsa Trinita” праслаўляў Бога спевам. У св. Імшы прыняло ўдзел больш за 30 святароў. У гаміліі кс. Джон распавёў аб Святым Духу і Яго моцы, з якой Ён спасылае свае дары на ўдзельнікаў урачыстасці Пяцідзясятніцы, што сабраліся на падворку касцёла Святой Сям’і.
    Святар выказаў удзячнасць уладам за магчымасць наведаць Беларусь. Госць з Уганды распавёў аб прычынах духоўных і фізічных хвароб, якія, па яго словах, паходзяць ад недахопу прабачэння сваім бліжнім, заклікаў вернікаў заўважыць адзін аднаго, пазнаёміцца, назваць сваіх суседзяў “брат”, “сястра”, сказаць ім, што Езус любіць іх такімі, якія яны ёсць.
    Малітоўная сустрэча за­вяр­­шылася заклікам аб спасланні Святога Духа на прысутных і індывідуальным бласлаўленнем Найсвя­цей­шым Сакрамантам.
    Кс. Юрый Гурскі распавёў, што падчас Эўхарыстыі і адарацыі было шмат фізічных і духоўных аздараўленняў: напрыклад, паралізаваны мужчына пачаў хадзіць, хворая на рассеяны склероз жанчына адчула сілу і без дапамогі маці ўстала на ногі.