Аргенцінскі кардынал Хорхе Марыа Берголіа, які з 13 сакавіка з’яўляецца 266 Біскупам Рыма, мае 76 гадоў і на працягу апошніх 16-ці гадоў быў мітрапалітам свайго роднага горада Буэнас-Айрэса. Ён першы аргенцінец, і ўвогуле жыхар Амерыкі, а таксама першы езуіт, якога выбралі на найвышэйшую пасаду ў каталіцкім Касцёле, акрамя таго, ён першы Папа-манах за апошнія паўтара стагоддзя. Ён таксама першы абраў імя Францішак.
    Вельмі сціплы чалавек. На працу ездзіў аўтобусам, жыў у простай кватэры і, падобна, сам сабе гатаваў. У вольны час наведваў бедных. Аўтар кніг на тэму духоўнасці. †

Герб сённяшняга Папы выглядае так: у цэнтры блакітнага шчыта знаходзіцца манаграма Езуса Хрыста, прадстаўленая ў тыповай для Ордэна езуітаў графічнай форме – у выглядзе сонца, на якім размешчаны літары IHS. Літара H увенчана крыжам, пад ёй змешчана выява трох цвікоў. У ніжняй частцы герба размешчаны выявы зоркі і гронкі вінаграду. Зорка, паводле старадаўняй геральдычнай традыцыі, сімвалізуе Панну Марыю, Маці Хрыста і Касцёла, а гронка вінаграду – св. Юзафа, Заступніка Паўсюднага Касцёла. У іспанскай іканаграфіі ён часта прадстаўляецца менавіта з вінаграднай гронкай у руках. Змяшчаючы гэтыя выявы на сваім гербе, папа Францішак выражае сваю асаблівую пашану і любоў да Панны Марыі і св. Юзафа. Гербавы шчыт увенчаны сімваламі папскай годнасці, аўтэнтычнымі тым, якія ўпрыгожвалі герб Бенедыкта XVI, – гэта значыць без тыяры, але з мітрай, двума ключамі – залатым і сярэбраным, і чырвонай вяроўкай.
    Дэвіз Святога Айца – “Miserando atque eligendo” – з’яўляецца выразам з пропаведзі св. Беды, у якой ён каментуе евангельскі фрагмент аб пакліканні св. Мацвея, кажучы: “Езус, убачыўшы мытніка і паглядзеўшы на яго з любоўю, выбраў яго і сказаў: «Ідзі за Мной». (Vidit ergo Іesus publicanum et quia miserando atque eligendo vidit, ait illi Sequere me)”. Словы на гербе Папы азначаюць: “Паглядзеў на яго з міласэрнай любоўю, ужо прадбачыўшы яго абранне”. Яны звязаны з пакліканнем самога Папы: у 1953 г. ва ўзросце 17 гадоў ён асабліва адчуў любячую прысутнасць Бога ў сваім жыцці, а пасля споведзі адчуў, як Божая міласэрнасць кліча яго да кансэкраванага жыцця па прыкладзе св. Ігнація Лаёлы.
    Пярсцёнак папы Францішка не залаты, а толькі з пазалочанага срэбра. На шляху з сакрыстыі да магілы св. Пятра Папу суправаджалі патрыярхі арцыбіскупы самых вялікіх Усходніх каталіцкіх Касцёлаў. Каля магілы Князя Апосталаў ужо былі падрыхтаваны палій і пярсцёнак Рыбака, якія кардынал-протадыякан Жан-Луі Таран урачыста перадаў Папу. Па словах кс. Ламбардзі, Папа зацвердзіў выяву, якая была змешчана на пярсцёнку Рыбака, – св. Пётр з ключамі. Яго зрабіў італьянскі мастак Энрыка Манфрыні.
    Праз некалькі хвілін пасля малітвы Анёл Панскі 17 сакавіка на плошчы св. Пятра Пантыфік напісаў першае паведамленне ў сацыяльнай сетцы “Twitter”: “Дарагія сябры, ад усяго сэрца дзякую вам і прашу аб малітве за мяне. Папа Францішак”.
    Кс. Ламбардзі: “Папа просіць не называць яго Францішкам I. Дастаткова проста Францішак”.