ГРОДНА
Субота,
13 ліпеня
2024 года
 

Парафіяда стала духоўным феноменам гродзенскага Касцёла

З жыцця Касцёла

Кожнае наша дзеянне з добрым намерам можа праслаўляць Бога: ці песня гэта, ці танец, ці гульня ў бадмінтон. Мы атрымалі ў дар ад Бога розум, які дазваляе нам пазнаваць свет, мы маем сваё цела, якое можам навучыць прыгожа рухацца, мы маем душу, якая пазнае Бога. Калі мы будзем увесь час развіваць у сабе гэтыя дары, то будзем расці цалкам гарманічнымі асобамі. Арганізатары Парафіяды акурат і ставяць такія мэты – выхоўваць дзяцей і моладзь у поўнай гармоніі душы, цела і розуму. У Гродзенскай дыяцэзіі спаборніцтвы ў межах трыяды “Святыня-Тэатр-Стадыён” ладзяцца ўжо чацвёрты год. Як кажа галоўны арганізатар Парафіяды кс. Артур Малафей, яна ўжо стала духоўным феноменам у жыцці Касцёла Гродзенскай дыяцэзіі. Таму штогод усё больш дзяцей і моладзі прыязджае паспаборнічаць у розных конкурсах, паспяваць, патанцаваць і разам праславіць Бога ў супольных набажэнствах. З 12 па 15 чэрвеня парафіі Гродна-Паўднёвы і Гродна-Дзевятоўка будуць прымаць маладых вернікаў з усёй дыяцэзіі ў межах конкурсаў “Святыня-Тэатр”, а спартыўныя спаборніцтвы будуць адбывацца на галоўным гарадскім стадыёне. Як рыхтуецца Парафіяда ў гэтым годзе, мы распыталі кс. Артура Малафея. 

– Кс. Артур, чаму абраны менавіта такі дэвіз Парафіяды: “Вера без учынкаў з’яўляецца мёртвай”, і якім чынам гэтыя словы будуць рэалізоўвацца падчас Парафіяды?
– Сёлетні дэвіз павінен быць падрыхтоўчым этапам да таго, што ў кастрычніку Бенедыкт XVI абвесціць у Касцёле Год веры. Арганізацыйны камітэт Парафіяды таксама падкрэсліў моц праўды, што Касцёл павінен шукаць спосабы паказаць дзецям і моладзі, што жывой верай можна жыць штодзённа, нягледзячы на пагрозы сённяшняга свету.
Адна з частак трыяды – “Святыня” – будзе асаблівым момантам, у якім мы і плануем рэалізаваць словы з ліста св. Якуба. Склалася добрая традыцыя, што для справавання Эўхарыстыі на кожны дзень Парафіяды мы запрашаем новага святара прамаўляць Божае слова. Святароў, якія сёлета прыедуць з казаннямі, арганізатары будуць прасіць, каб гэтая тэма стала падставай для ўсяго тэкста гаміліі. Адпаведная дэкарацыя таксама павінна стварыць патрэбную атмасферу ў рэалізацыі гэтага дэвіза. Плануецца сустрэча са Святым Пісаннем, а таксама конкурсы: біблійны, пластычны, “Sacro song”, конкурс з жыцця і гісторыі Касцёла, у якіх гэтай тэматыцы будзе надавацца шмат увагі. Таксама вельмі важнымі будуць ранішнія і вячэрнія малітвы. У час спаборніцтваў у межах часткі “Стадыён” удзельнікі перад стартам будуць адгаворваць малітву, тэкст якой кажа пра тое, што значыць добры ўчынак падчас старту ў спартыўных спаборніцтвах.

– Якія моманты Парафіяды самыя ўдалыя з вопыту папярэдніх гадоў? На што дзеці і моладзь адгукаюцца найбольш ахвотна?
– Дзеці і моладзь нашай дыяцэзіі любяць як малітву, так і забавы. Цяжка сказаць дакладна, што было самым удалым. Напэўна, самі ўдзельнікі могуць лепш пра гэта расказаць. Кожны год парафіядны камітэт пасля сканчэння Парафіяды робіць падсумаванне, што ўдалося ў гэтым годзе, а што не. Мы робім усё, каб на наступнай Парафіядзе было яшчэ лепш. Мы адкрытыя на парады адносна арганізацыі Парафіяды.

– Хто з прафесіяналаў дапамагае святарам рыхтаваць конкурсы ў межах спаборніцтваў “Тэатр” і “Стадыён”? Такія асобы ўвогуле запрашаюцца, ці ўсе спаборніцтвы рыхтуюцца сваімі сіламі – Касцёлам?
– Калі казаць пра “Тэатр” і пра ўсе конкурсы, падрыхтаваныя ў гэты дзень, то тут кс. Віктар Ханько (Гродна-катэдра) і а. Віктар Бохан (Гродна-Дзевятоўка) адказваюць за іх падрыхтоўку. Я ўпэўнены, што з гэтым яны вельмі добра справяцца. Калі ўзнікае патрэба, ёсць людзі, да якіх святары могуць звярнуцца па дапамогу.
У межах спаборніцтваў на стадыёне мы ўжо некалькі гадоў супрацоўнічаем з дырэктарам ЦСК “Нёман” Францішкам Лецяга, які таксама з’яўляецца членам Беларускай асацыяцыі футбола. Мы запрашаем прафесійных суддзяў на футбол (са Слоніма і Гродна), настольны тэніс, бадмінтон, лёгкую атлетыку. Як і штогод, сёлета падрыхтоўкай спаборніцтваў па шашках будзе займацца кс. Антоні Абухоўскі, які таксама з’яўляецца старшынёй спартыўных аб’ектаў. Старшынёй спартыўнай камісіі будзе Артур Кахоцкі, студэнт, ён будзе сачыць, каб усё адбывалася своечасова. У падрыхтоўцы секцыі “Стадыён” таксама наладжана супрацоўніцтва са школай лёгкай атлетыкі ў Гродне і Слоніме.

– Якія складанасці ўзнікаюць падчас падрыхтоўкі Парафіяды? Чаго не хапае для найлепшай арганізацыі і правядзення гэтага вялікага мерапрыемства?
– Калі размова ідзе пра арганізацыю акцыі, цяжкасці ёсць усюды. З Божай дапамогай, а таксама з дапамогай спонсараў і ахвярадаўцаў мы даём сабе рады. Кс. Максім Бачарнікаў, аканом Парафіяды, адказвае таксама і за падачу праектаў на падтрымку Парафіяды.

– Якія ўзнагароды Вы рыхтуеце пераможцам?
– Сёлета апрача дыпломаў, кубкаў, медалёў і статуэтак будзе спецыяльная ўзнагарода для парафіі, якая пераможа ў спаборніцтвах на стадыёне, а таксама ў частках трыяды “Тэатр” і “Святыня”. І канешне, будуць узнагароды для трох найлепшых парафій, якія здабудуць найбольш балаў ва ўсёй трыядзе. Кожны ўдзельнік Парафіяды атрымае дыплом.

– Кс. Артур, чым для Вас з’яўляецца Парафіяда?
– Для мяне гэта час сустрэчы з вялікай і жывой сям’ёй Хрыста, з жывым Касцёлам, які павінен быць нашай будучыняй. Падчас Парафіяды кожнае дзеянне, будзь гэта “Святыня”, “Тэатр” ці “Стадыён”, прасякнута думкай пра Бога і бліжняга.

– Дзякуй за размову!

12.06.2012
(Святыня)

14.00-17.00 – Прыезд груп і рэгістрацыя (пар. Гродна-Паўднёвы)
17.10 – Прэзентацыя парафіяльных груп у выглядзе слайд-шоу са здымкаў “Успаміны Парафіяды-2011”
17.20 – Падрыхтоўка да св. Імшы (падрыхтоўка літургіі спеваў, магчымасць скарыстання з сакраманту паяднання)
17.40 – Чэрвеньскае набажэнства
18.00 – Эўхарыстыя (праводзіць Я. Э. ксёндз біскуп Аляксандр Кашкевіч)
19.30-21.15 – Засяленне
21.30 – Зварот
13.06.2012
(Святыня-Тэатр)
7.00-7.30 – Сняданак
7.45 – Ранішнія малітвы
8.00 – Выезд аўтамабілямі ў пар. Гродна-Дзевятоўка
9.00 – Св. Імша.
10.00-13.00 – Конкурсы
13.00-14.00 – Абед
14.15-19.00 – Конкурсы
19.30 – Вячэра
20.30 – Канцэрт парафіяльнага моладзевага гурта з Дзевятоўкі
21.30 – Зварот
21.50 – Вяртанне ў пар. Гродна-Паўднёвы
14.06. 2012
(Святыня-Стадыён)
7.00-7.30 – Сняданак
7.45 – Ранішнія малітвы
8.00 – Эўхарыстыя
9.00 – Выезд на гарадскі цэнтральны стадыён
9.30 – Урачысты пачатак спартыўных конкурсаў
10.00-14.00 – Спартыўныя конкурсы
14.05-15.00 – Абед
15.05-18.30 – Спартыўныя конкурсы
18.40 – Вячэра
19.00 – Выезд у пар. Квасоўка
20.00 – Адкрыты вечар (пар. Квасоўка)
21.40 – Зварот
22.00 – Выезд у пар. Гродна-Паўднёвы
15.06.2012
(Святыня-Тэатр-Святыня)
7.00-7.30 – Сняданак
8.50 – Ранішнія малітвы
9.00 – Эўхарыстыя (праводзіць Я. Э. ксёндз біскуп Аляксандр Кашкевіч)
10.30 – Уручэнне ўзнагарод
11.30 – Супольны пачастунак і заканчэнне Парафіяды

Праграма “Святыні”
   Ранішнія малітвы – кожны дзень распачынаецца малітвай (усе павінны ўдзельнічаць і не спазняцца).
   Св. Імша – гэта найважнейшы пункт праграмы кожнага дня. Чытанне, псальм, паўсюдную малітву і літургію спеву рыхтуюць ахвотныя ўдзельнікі Парафіяды (апекуны падаюць ахвотных).
   Адарацыя Божага слова – кожны дзень будзе адбывацца адарацыя Божага слова, злучаная з чытаннем Евангелля (сустрэча і разважанне над Божым словам, дзяленне сваімі перажываннямі).
   Сакрамант паяднання – перад і падчас св. Імшы ёсць магчымасць скарыстацца з сакраманту паяднання. Вячэрні зварот – кожны дзень заканчваецца вячэрнім зваротам. Тады зноў сустракаемся разам (дзень таксама заканчваецца супольнай малітвай).

Праграма часткі трыяды “Тэатр”
9.00 – Св. Імша (пар. Найсвяцейшага Адкупіцеля – Дзевятоўка)
10.00 – Біблійны конкурс
11.00 – Конкурс з жыцця і гісторыі Касцёла
12.00 – Выступ тэатральных гуртоў з кожнай парафіі
13.00 – 14.00 – Абед
14.15 – Пластычны конкурс
14.30 – Конкурс “Sacro Song”
17.00 – Конкурс “Музыка маім жыццём”
19.30 – 20.15 – Вячэра
20.30 – Канцэрт гуртоў з Дзевятоўкі
21.30 – Вячэрні зварот
21.50 – Выезд на месца пражывання
План спаборніцтваў
у частцы трыяды “Стадыён”
9.30 – Адкрыццё
9.45- 10.15 – Кіданне мяча (дзяўчаты)
9.45-10.15 – Скачкі ў даўжыню з разбегу (хлопцы)
10.15-10.35 – Кіданне мяча (хлопцы)
10.15-10.45 – Скачкі ў даўжыню з разбегу (дзяўчаты)
10.45-14.00 – Футбол (хлопцы)
11.00-14.00 – Бадмінтон, настольны тэніс (дзяўчаты)
12.00-14.00 – Шашкі (дзяўчаты)
12.30-14.00 – Бег па перасечанай мясцовасці (дзяўчаты, хлопцы)
15.00-17.15 – Валейбол (дзяўчаты)
15.00-17.15 – Бадмінтон, настольны тэніс (хлопцы)
16.00-17.15 – Шашкі (хлопцы)
17.30-18.30 – Бег 60 метраў, бег 100 метраў (хлопцы, дзяўчаты)

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

green
Адзначаем імяніны:
Сёння ўспамінаем памерлых святароў:
Да канца года засталося дзён:  172

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.