Вітаю Вас, дарагія чытачы, а асабліва міністранты, у гэты радасны “белы” перыяд. Белай гэтую пару можна назваць таму, што ўсё навокал нас як бы пакрыта цудоўным белым прасцірадлам, якое выткана з мільярдаў малых белых лапікаў! Як жа гэта Бог усё вытанчана і цудоўна зрабіў.
    Давайце задумаемся над гэтай вытанчанасцю і элітарнасцю. Дык вось, чым ёсць і што значыць міністранцкая служба, было не аднойчы напісана, між іншым, таксама ў гэтай рубрыцы. Мы хочам указаць на пэўны аспект гэтай службы, а менавіта на яе вытанчанасць, элітарнасць і на яе значэнне для вас, міністранты.
    А таму, міністрант – гэта ёсць прадастаўнік паслугі самога Бога! †

Давайце заўважым, мы можам шалець па пэўнай музыцы, пэўных кіназорках і зорках шоу-бізнесу, а ці шалеем па Богу? У гэтых “зорак” ёсць свая ахова, служба, якая спецыяльна падабрана, перад ёй ставяцца пэўныя патрабаванні. А што з гэтага вынікае? Паколькі Бог з’яўляецца самай выдатнай Асобай у космасе, то натуральна, што Яго ахова і служба павінны быць таксама самымі выдатнымі і больш таго, яны і ёсць такія. Паўстае пытанне: “Ці міністрант годна прадстаўляе такую паслугу?” Дык вось, дарагія міністранты, невыпадкова вы стаіце ля алтара: Бог адшукаў вас для гэтай асаблівай элітарнай паслугі.

    Ён спецыяльна падбіраў, хоць часам нам здаецца, што такога? А таму гэтая годнасць з’яўляецца сапраўды элітарнай, калі ўсведамляеш, што ты служыш міністрантам у самай выдатнай і важнай Асобы ва ўсім космасе. А таму заахвочваю вас захоўваць гэтую годнасць. На гэта вы павінны адказаць: “Заўжды і ўсюды”.

    А на пытанне: “Што азначае міністранцкая служба для міністранта?” адказалі самі міністранты. У нядзелю Хрыста – Валадара Сусвету клерыкі далі міністрантам карткі для запаўнення.
    Вось самыя цікавыя адказы:

    Тамаш
    (Ліда, касц. Узвышэння Святога Крыжа, 10 год служэння міністрантам):
    “Міністранцкая служба з’яўляецца для мяне ўдзячнасцю Богу за тое, што Ён дазволіў мне жыць на гэтым свеце”.

    Яраслаў
    (Іўе, касц. Св. Пятра і Паўла, апосталаў, 4 гады міністранцкай службы):
    “Міністранцтва азначае ўшаноўваць і праслаўляць Бога, служыць Яму, а таксама верыць”.

    Яўген
    ( Галімшчына (Іўе), касц. Св. Пятра і Паўла, апосталаў, 10 год міністранцкай службы):
    “Міністранцтва для мяне - гэта служба Богу. Я думаю, што міністранты знаходзяцца бліжэй Бога, чым іншыя вернікі. Міністранцтва – гэта любоў да Бога”.

    Аляксандр
    (Індура, касц. Найсвяцейшай Тройцы, 14 год міністранцкай службы):
    “Падчас міністранцкай службы на св. Імшы я аддаюся Богу, які мне заўжды дапамагае”.