ГРОДНА
Аўторак,
18 студзеня
2022 года
 

Для чаго мы асвячаем віно падчас свята св. Яна?

Задай пытанне

Ксёндз Юрый МарціновічАдказ на гэтае пытанне трэба пачаць з таго, што віно з’яўляецца вельмі важным у гісторыі хрысціянства. Пра гэтую важнасць сведчыць хоць бы гісторыя вяселля ў Кане Галілейскай. Менавіта там Езус здзяйсняе першы цуд – перамяняе ваду ў віно. Дзякуючы гэтаму вясельныя госці маглі яшчэ даўжэй і гучней павесяліцца.
    Ужо ў Старым Запавеце мы чытаем, што Бог даверыў клопат аб вінаградніку чалавеку, бо плён вінаградных кустоў радуе сэрца, дазваляе таксама забыць пра працу і стомленасць. Біблія ўспамінае пра віно аж 450 раз. Кожны год у літургічны ўспамін св. Яна-Апостала, які прыпадае на 27 снежня, у нашых касцёлах практыкуецца звычай благаславення віна. У гэты дзень кожны вернік, які прынясе ў касцёл віно, можа яго асвяціць. Паблагаслаўлены напітак павінен захаваць людзей ад смагі, зберагчы здароўе і засцерагаць ад атручэнняў. Асвячанае віно з’яўляецца таксама сімвалам любові, а яго ўжыванне пазбаўляе нас ад атруты зла і нянавісці, а таксама дапамагае ў пашырэнні ўзаемазразумення і зычлівасці.
Традыцыя асвячэння віна ўзяла свой пачатак ад св. Яна-Апостала і евангеліста. Існуе некалькі легенд, якія расказваюць пра гэты звычай. Адна з іх паходзіць з VI ст. і даносіць да нас, што св. Ян, пілігрымуючы па азіяцкім кантыненце, сустрэў на сваім шляху святара Арыстадэма са святыні Дыяны ў Эфэзе. Гэты святар павінен быў падвергнуць Яна выпрабаванню атручаным віном – калі той выжыве пасля ўжывання яду, то Арыстадэм прыме хрысціянства. Таму ж самаму выпрабаванню былі падвергнуты таксама двое асуджаных, якія – як няцяжка дадумацца – пасля таго, як яны выпілі атручанае віно, то памерлі.
    Святы Ян, перш чым паднёс келіх з віном да вуснаў, паблагаславіў яго і такім спосабам пазбавіў віно ад атруты. Аднак гэтага было недастаткова святару Дыяны, таму ён дамагаўся іншага цуду. У сувязі з гэтым св. Ян вярнуў жыццё двум атручаным асуджаным. Пасля такой сілы аргументаў, Арыстадэму не засталося нічога, як толькі навярнуцца.
    Звычай асвячэння віна з’явіўся ў Касцёле ўжо ў XIII ст. У некаторых парафіях пасля закончанай літургіі святары даюць вернікам пакаштаваць віно ў сімвалічнай колькасці. Напрыклад, такая традыцыя распаўсюджваецца айцамі-паўлінамі на Яснай Гары ў Чанстахове, дзе 27 снежня збіраюцца шматлікія жыхары ваколіцы, як і прыбылыя пілігрымы.
    Аднак мы павінны памятаць, што гэтае віно асвячаецца не для таго, каб ім напівацца, а затым нарабіць шуму, прытым растлумачваючы, што Касцёл дазваляе на гэта, а яшчэ больш – падтрымлівае. Ва ўсім гэтым абрадзе ідзе размова пра тое, каб гэтае віно, якое мы асвяцім, а пазней будзем піць, было знакам Божага благаславення, якое мы прымаем усім сэрцам.

Актуальны нумар

 

Каляндар 2022

Каляндар
«Слова Жыцця»
на 2022 год

Літургічны каляндар

 
green
Адзначаем імяніны:
Да канца года засталося дзён:  348

Чакаем Вашай падтрымкі

skarbonkaДарагія Чытачы!
Просім Вас аб дапамозе ў абвяшчэнні Добрай Навіны. Мы чакаем Вашых лістоў, артыкулаў, здымкаў і падтрымкі ў фінансаванні газеты. Як адна сям’я “Слова Жыцця” мы прагнем несці Божае слова, гаварыць аб Хрысце і Касцёле ўсё большай колькасці людзей у Беларусі і па-за яе межамі.