Папа Бэнэдыкт XVI
    У тыдзень місіянерства Папа заахвочвае паглядзець на Касцёл як на містэрыю камуніі, якая па сваёй прыродзе прызначана для чалавека і ўсіх людзей. Падчас разважанняў Святы Айцец абвясціў, што наступны агульны звычайны сход Сіноду Біскупаў у 2012 г. будзе прысвечаны тэме “Новая евангелізацыя для перадачы хрысціянскай веры”. Папа абрысаваў постаць св. Паўла, які жыў у камуніі са Змёртвыхпаўсталым Хрыстом. Аб’яднанне з Хрыстом не робіць апостала пасіўным на чаканне канчатковай узнагароды, але заклікае да абвяшчэння Евангелля кожнаму чалавеку. На заканчэнне разважанняў Папа аддаў пад апеку Найсвяцейшай Панне Марыі хрысціянскія супольнасці Блізкага Усхода і ўсіх місіянераў Евангелля.
    З разважанняў перад малітвай “Анёл Панскі” 24 кастрычніка. †

Арцыбіскуп Тадэвуш Кандрусевіч
    “Трэба задумацца, як выглядае наш каталіцызм, ці мы не вядзём падвойнага жыцця?... Мы павінны задумацца, што рабіць,бо тое, што ёсць добра ў Рыме, неабавязкова павінна быць добра ў Мінску ці Варшаве. У новай евангелізацыі павінны ўдзельнічаць усе: біскупы, святары, манахі і свецкія, таму што гэта яны могуць сведчыць сваім жыццём адпаведна думцы слоў Паўла VI, што сучасны свет больш патрабуе сведкаў, чым настаўнікаў”. У сваім выступленні мінска-магілёўскі мітрапаліт падкрэсліваў, што Касцёл патрабуе новай евангелізацыі і павінен быць сур’ёзна падрыхтаваны да яе”.
    Фрагмент выступлення на тэму новай евангелізацыі з нагоды ўрачыстага адкрыцця ВДС у Гродне 5 кастрычніка.



   Біскуп Аляксандр Кашкевіч
    І гэта ёсць чарговая Божая справа, якая заключаецца ў тым, што Творца карыстаўся і далей карыстаецца паслугамі чалавека для здзяйснення сваіх планаў. Біскуп – пастыр дыяцэзіі і наступнік апосталаў, які стаіць на чале, яго супрацоўнікі-святары, сёстры і манахі-браты, а таксама ўсе вернікі, аб’яднаныя са Святым Айцом, з’яўляюцца Божым людам.
    Мы верым, што толькі ў такім Касцёле, дзе зберагліся адзінства, святасць, усеагульнасць і апостальскасць, жыве і дзейнічае Бог і Збавіцель – Хрыстус. Ужо звыш 2000 год Хрыстус рэалізуе сваю збавенную місію з дапамогай сваіх спадкаемцаў і іншых асобаў.
Фрагмент казання, абвешчанага  падчас урачыстасцяў у Пінску