Разважанні з Божым Словам

    Евангелле з’яўляецца кнігай жыцця па некалькі прычынах. Першая і самая важная: яна паказвае Асобу нашага Збавіцеля, Езуса Хрыста. Ён сам назваў сябе “шляхам, праўдай і жыццём”. Другая падстава – гэта факт, што Евангелле – гэта Добрая Навіна, якая вядзе да жыцця. Божае слова з’яўляецца словам жыцця. Бог стварыў наш Сусвет з нічога, толькі сваім словам. Для нашага збаўлення Божы Сын, Адвечнае Слова Айца, стаў Целам і пасяліўся сярод нас. Таму кожная старонка Евангелля, якая расказвае пра вялікія Божыя справы, заключае ў сабе моц і магутнасць жыцця. Чытаючы Святое Пісанне, мы дакранаемся да Божых таямніцаў, пазнаём планы Творцы. Слова Бога набліжае нас да Яго любові.
    Ёсць яшчэ адна прычына, па якой Евангелле з’яўляецца кнігай жыцця. У ёй кожны з нас можа знайсці сваё ўласнае жыццё: звыклае людское жыццё з яго радасцямі і смуткамі, поўнае сяброўскіх спатканняў, але і варожых асобаў. У Евангеллі ёсць задавальненне з-за рэалізаваных планаў і прыклады няўдачаў, а нават балючых здрадаў з боку самых блізкіх. Перад намі – чалавечае жыццё ва ўсёй сваёй праўдзе! Таму так важны былі пэўныя “рамкі”, у якія св. Ян-евангеліст змяшчае свой аповяд пра жыццё Збавіцеля. Першым яго апавяданнем з’яўляецца цуд падчас вяселля ў Кане Галілейскай. Езус выратаваў радасць маладых людзей з самага пачатку іхняга супольнага жыцця. Святы Ян заканчвае сваё Евангелле апісаннем сустрэчы з уваскрэслым Езусам ля Галілейскага возера. Паміж гэтымі падзеямі ёсць усё: навучанне Езуса, вылечванні, неразуменне, жыццё з мукай і апісанне смерці - ўсё для таго, каб сказаць нам, што ўсё гэта служыць для выратавання чалавечага шчасця.

Кс. Яраслаў Грынашкевіч

< Папярэдняя		Наступная >