З жыцця Касцёла

7 верасня бягучага года а 12-й гадзіне пад кіраўніцтвам дапаможнага біскупа Гродзенскай дыяцэзіі Юзафа Станеўскага была адпраўлена св. Імша падзякі за 20 гадоў існавання парафіі Найсвяцейшага Адкупіцеля ў Гродне на Дзевятоўцы.

Знамянальным з’яў­ляецца той факт, што св. Імша адбылася на месцы, дзе ўсё пачалося. На пачатку літургіі а. Юзаф Ген­за прадставіў гісторыю ўзнікнення парафіі.
    Канец васьмідзясятых гадоў XX стагоддзя – гэта час палітычных змен у Еўропе, якія маюць вялікі ўплыў на рэлігійнае жыццё. Пасля многіх гадоў праследаванняў Касцёлы і веравызнанні атрымліваюць магчымасць свабодна абвяшчаць Евангелле. Рэлігійнае жыццё, якое перажывае сваё адраджэнне, у той жа час пакутуе ад недахопу святынь і святароў. Гэта датычыцца таксама і Беларусі. На дапамогу прыходзяць святары з іншых краін, у першую чаргу з Польшчы, а сярод іх рэдэмптарысты, якія праводзяць у Гродзенскай дыяцэзіі парафіяльныя місіі. Кс. бп Аляксандр Кашкевіч даручае рэдэмптарыстам душпастарства ў некалькіх парафіях, сярод якіх таксама новая парафія ў Гродне на Дзевятоўцы, утвораная дэкрэтам ад 27 жніўня 1994 года. †

“У Божае Імя” – менавіта такія словы перад вайной у польскіх школах пісаліся на першых старонках сшыткаў. Такім чынам вучні давяралі сваю будучыню Пану, пакорна прызнаючы – без Бога чалавек нічога не варты. Новы сшытак, новы навучальны год, усю сваю будучыню сапраўдны хрысціянін пачынаў з Богам, у Божае Імя.

1 верасня па ўсёй краіне прайшлі святочныя лінейкі, прымеркаваныя да пачатку новага навучальнага года. У першы вераснёўскі ранак каля школ было шматлюдна: вучні, настаўнікі, бацькі віталі Дзень ведаў. Званок паклікаў дзяцей і моладзь на заняткі, дзе іх будуць чакаць новыя веды і адкрыцці.
    Сталася добрай традыцыяй, што з нагоды пачатку навучальнага года ў святынях адбываюцца набажэнствы, падчас якіх вернікі моляцца аб патрэбных ласках для дзяцей і моладзі, просяць аб спасланні дароў Святога Духа для тых, хто прыступае да навукі, каб новы навучальны год быў плённым не толькі ў плане навукі, але і ў пазнаванні Бога і Яго ісцін. Вучні і студэнты прыносяць у касцёл дзённікі, сшыткі, заплечнікі, заліковыя кніжкі, каб іх асвяціў святар, і распачынаюць навучальны год у Божае Імя. †

Кс. бп Юрый Касабуцкі, дапаможны біскуп Мінска-Магілёўскай архідыяцэзіі, правёў у Гродзенскай вышэйшай духоўнай семінарыі два туры рэкалекцый для святароў нашай дыяцэзіі. Аб тым, як быць добрым ксяндзом у наш час, аб моцнай веры ў складаных сітуацыях, а таксама аб дзейнасці сект у Беларусі з Яго Эксцэленцыяй размаўляў кс. Павел Салабуда.

– Ваша Эксцэленцыя, Вы вяртаецеся ў семінарыю ўжо ў якасці біскупа. Якія ўражанні і пачуцці ў Вас узнікаюць, калі Вы наведваеце сваю школу Хрыста ў поўні святарства?
    – Я ўжо не першы раз прыязджаю ў семінарыю як біскуп – вясной я праводзіў дзень засяроджання для семінарыстаў. Безумоўна, гэтая роля дастаткова незвычайная для мяне, я перажываю іншыя ўражанні. Прыгадваю семінарыйныя гады: як сядзелі ў капліцы, як жылі тут, як хадзілі па калідорах, таму нядзіўна, што я адчуваю пэўную настальгію. Я заўсёды наведваю семінарыю з вялікай удзячнасцю да выхавацеляў і выкладчыкаў, якія прысвячалі вельмі шмат часу, каб перыяд фармацыі быў сапраўдным перыядам падрыхтоўкі да святарства. Толькі цяпер я ўсведамляю сабе, колькі энергіі, колькі сіл трэба было прысвяціць нам, семінарыстам, каб мы маглі стаць святарамі; колькі працы, колькі, часам, нерваў каштавала выкладчыкам наша святарства. Я заўсёды стараюся маліцца за ўсіх тых людзей, якіх я сустракаю на сваім жыццёвым шляху. †

Адной з самых дарагіх рэліквій з даўніх часоў, якой па праву ганарыцца парафія св. Францішка Ксаверыя ў Гродне, з’яўляецца добра вядомы і паўсюдна шануемы абраз Маці Божай Снежнай, які тут ушаноўваюць пад назвай Маці Божай Кангрэгацкай. 3 жніўня жыхары горада і ўсе, хто даручае сябе заступніцтву Марыі, з пакорай і шчырай верай дзякавалі за юбілей 350-годдзя пераносу ў Гродна гэтага цудатворнага абраза.

Юбілейныя ўрачыстасці абраза Маці Божай Кангрэгацкай папярэдзілі своеасаблівыя духоўныя практыкаванні, у межах якіх у катэдральным касцёле 31 ліпеня, а таксама 1 і 2 жніўня былі прамоўлены спецыяльныя казанні і малітвы. Ноччу з 2 на 3 жніўня ў катэдры адбылося ўсяночнае малітоўнае чуванне. Апоўначы была адпраўлена св. Імша пад кіраўніцтвам кс. б-па Юзафа Станеўскага, да самай раніцы адбывалася начная адарацыя Найсвяцейшага Сакраманту, у якой прынялі ўдзел вернікі ўсяго горада. †