З жыцця Касцёла

Каталіцкая сямейная кансультацыя ў Гродне дзейнічае з 1997 года. Яе дзейнасць накіравана на аказанне дапамогі людзям, якія маюць цяжкасці ў асабістым, сужэнскім ці сямейным жыцці.
    Першым душпастырам, які апекаваўся кансультацыяй, быў кс. Тадэвуш Крыштопік. На пачатку свайго існавання кансультацыя працавала тры разы на тыдзень, але колькасць зацікаўленых асоб увесь час узрастала. У 2009 годзе супрацоўнікі кансультацыі пачалі прымаць удзел у сямейных курсах, арганізаваных у нашай дыяцэзіі. Ездзілі таксама на майстар-класы за мяжу (Ломжа, Масква). У найбольшых парафіях Гродна з’яўляліся філіялы кансультацыі, дзе адбываліся перадшлюбныя курсы і размовы з супрацоўнікамі кансультацыі. †

Пад такім дэвізам у трэцюю нядзелю верасня адбылася пешая пілігрымка дзяцей і моладзі, настаўнікаў і выхавацеляў, прафесараў і катэхетаў з Гродна і ваколіц у санктуарый Маці Божай Яснагорскай на Узгорку надзеі ў Капцёўцы. У ёй прыняло ўдзел больш за тысячу вернікаў.

Перад распачаццем пілігрымкі яе ўдзельнікі прынялі ўдзел у святой Імшы. На пачатку Эўхарыстыі біскуп Аляксандр Кашкевіч падзякаваў усім настаўнікам, катэхетам, выхавацелям і сем’ям за выхаванне дзяцей у веры, а таксама за перадачу ведаў і жыццёвай мудрасці. Біскуп пажадаў, каб новы навучальны і катэхетычны год стаў багатым у плане вопыту і спрыяў узрастанню ў мудрасці і веры.
    У пілігрымцы ўдзельнічала шмат дзяцей і моладзі, якіх на шляху да Маці Божай суправаджалі бацькі, апекуны і катэхеты. На Узгорак надзеі ў Капцёўцы пілігрымавалі таксама клерыкі Гродзенскай вышэйшай духоўнай семінарыі. Пілігрымаў прывітаў кусташ санктуарыя кс. Міхал Ластоўскі, пасля чаго распачалася св. Імша з пасвячэннем школьных прылад. Варта заўважыць, што дзеці і моладзь прынеслі гэтыя рэчы ў школьных рукзаках. †

18 верасня ў Ватыкане адбылася сустрэча папы Францішка з біскупамі, якія атрымалі сакру на працягу апошняга года. У іх ліку і біскупы з Беларусі: біскуп Віцебскі Алег Буткевіч, дапаможны біскуп Гродзенскай дыяцэзіі Юзаф Станеўскі і дапаможны біскуп Мінска-Магілёўскай архідыяцэзіі Юрый Касабуцкі.

Больш за 300 біскупаў прыбылі ў Рым для ўдзелу ў адмысловым курсе, арганізаваным Кангрэгацыяй па справах біскупаў. Кс. біскуп Юзаф Станеўскі распавёў, што кожны дзень для біскупаў праходзілі лекцыі, якія чыталі прадстаўнікі розных кангрэгацый і папскіх рад. На завяршэнне курса, які працягваўся 10 дзён, з біскупамі сустрэўся папа Францішак. †

33 гады з моманту прэзбітэрскіх пасвячэнняў адзначыў 12 верасня ксёндз прэлат Вінцэнт Лісоўскі, пробашч парафіі Беззаганнага Зачацця Найсвяцейшай Панны Марыі ў Лідзе і дэкан Лідскі.

Як заўважыў сам святар, гэтая дата для яго вык­лючная і адрозніваецца ад тых, што ён адзначаў раней: яна нагадвае ўзрост зямнога жыцця Езуса Хрыста, i ў гэты дзень ён асабліва яднаецца з асобай Найвышэйшага і Вечнага Святара.
    Радасць кс. Вінцэнта прыйшлі падзяліць шматлікія госці. Святую Імшу ў лідскім касцёле, дзе святар служыць ужо шмат гадоў, узначаліў дапаможны біскуп Пінскай дыяцэзіі Казімір Велікаселец, з якім юбіляр разам вучыўся ў падпольнай семінарыі ў кс. інфулата Вацлава Пянткоўскага ў Мядзведзічах. Прыбылі святары, якіх яднаюць повязі сяброўства з кс. Лісоўскім, тыя, хто супрацоўнічаў з ім у парафіі, а таксама яго выхаванцы. Парафіяльная супольнасць, якой служыць юбіляр, таксама агарнула яго ў гэты дзень сваёй малітвай. Біскуп Казімір Велікаселец нагадаў сабраным пра тое, як яны разам з юбілярам пачыналі вучобу ў семінарыі ў кс. Пянткоўскага. Ксёндз Вацлаў Пянткоўскі, былы Генеральны вікарый Пінскай дыяцэзіі, вязень ГУЛАГа, быў выхавацелем маладых святароў. У часы ганенняў на Касцёл ён арганізаваў падпольную семінарыю, дзе рыхтаваў кандыдатаў да святарства. Два з іх – Антоній Дзям’янка і Казімір Велікаселец – сталі біскупамі. Сярод былых вучняў кс. Пянткоўскага таксама кс. прэлат Антоній Гей з Брэста, кс. прэлат Вінцэнт Лісоўскі з Ліды, кс. Генрых Акалатовіч з Валожына і многія іншыя святары. †