З жыцця Касцёла

З Марыяй у дарозе навяртання

У дыяцэзіяльным санктуарыі Маці Божай Тракельскай, Каралевы сем’яў, адбыліся адпуставыя ўрачыс-тасці. З розных бакоў Гродзенскай дыяцэзіі, а таксама з-за мяжы ў санктуарый прыбылі пілігрымы. Усіх іх злучыла супольная малітва. Як адна сям’я, на каленях яны крочылі да Маці Божай і з вялікім даверам прасілі Яе, каб атуліла сваім мацярынскім плашчом.

Ужо традыцыйна ўсіх пілігрымаў яшчэ па дарозе ў Тракелі вітаў біскуп Гродзенскі Аляксандр Кашкевіч, які блаславіў і дзякаваў за прыгожае сведчанне веры. У саміх Тракелях перад уваходам у санктуарый пілігрымаў сустракаў кусташ гэтага святога месца кс. Аляксандр Рудзевіч.
    Найбольшай па колькасці ўдзельнікаў стала пешая пілігрымка з Гродна, якая прыйшла ў Тракелі ўжо ў 17-ты раз і налічвала больш за 370 чалавек. Таксама прыбылі пілігрымкі з Ашмянаў, Іўя, Навагрудка, Ваўкавыска і іншых мясцін. †

У парафіі Адведзінаў Найсвяцейшай Панны Марыі ў мястэчку Гудагай, што на Гродзеншчыне, 19 ліпеня а 12-й гадзіне адбылася адпуставая святая Імша, якую ўзначаліў дапаможны біскуп Гро- дзенскай дыяцэзіі Юзаф Станеўскі.

На пачатку ўрачыстасці пробашч парафіі а. Казімір Мараўскі OCD прывітаў пілігрымаў з Беларусі і з-за мяжы, якія прыбылі на адпуст.
    У гаміліі біскуп Юзаф звярнуўся да вернікаў, кажучы: “Пытанне цішыні турбуе чалавека ў XXI стагоддзі. Мы павінны адрозніваць мёртвую цішыню, якая прыносіць жах і трывогу чалавеку, ад цішыні правільнай, якая з’яўляецца прыгожай гармоніяй. Яна дадзена гэтаму свету Богам. Гэта мелодыя нашай зямлі, якую Бог упісаў у мелодыю чалавека, вызваленага з шуму свету, які кажа “цішыня і супакой”. На самой справе чалавек атрымлівае гэты вялікі супакой ад Бога. На працягу тысячагоддзяў чалавек уцякаў ад шуму жыцця, імкнуўся да Божай цішыні. Менавіта ў такой цішыні, падчас гэтай чарадзейнай мелодыі прарокі і пустэльнікі ўзыходзілі на гару Кармель. У гэтай цішыні было нешта асаблівае, што давала чалавеку перажываць блізкасць Бога. Не было мёртвай цішыні. І сёння сэрцы людзей імкнуліся сюды, каб акунуцца ў цішыню гэтай зямлі, жывую цішыню. Каб дакрануцца да гэтага Божага свету. Бо мы па ім сумуем. І жадаем напаўняць сябе Богам”. †

У суботу 18 ліпеня а 15-й гадзіне з парафіяльнага касцёла ў Адамавічах вырушыла першая ў гісторыі Гродзенскай дыяцэзіі пешая пілігрымка да месца мучаніцкай смерці жыхароў Гродна і Ліпска (сёння тэрыторыя Польшчы), якія 13 ліпеня 1943 года былі расстраляны гітлераўцамі на Форце № 2 каля Навумавічаў.

Каб ушанаваць памяць ахвяр фашысцкай агрэсіі, у паломніцтва выйшла больш за сто вернікаў з усіх гродзенскіх парафій. На экуменічнай святой Імшы а 19-й гадзіне колькасць людзей, якія прыйшлі ўспомніць чарговую гадавіну трагічных падзей, двойчы ўзрасла.
    Звяртаючыся да гісторыі трагічных падзей, якія мелі месца 13 ліпеня 1943 года: у той дзень на Форце № 2 каля Навумавічаў гітлераўцы расстралялі групу людзей з 50-ці чалавек, сярод якіх былі як свецкія вернікі, так і святары. Прычынай масавага пакарання стала помста немцаў за забойства партызанамі нямецкага паліцэйскага. Да ліку ахвяр фашысцкай помсты сярод іншых належала бласлаўлёная Мар’яна Бярнацкая. Яна пацярпела мучаніцкую смерць, аддаючы жыццё за сваю нявестку, якая была цяжарнай. †

27 чэрвеня ў архікатэдральным касцёле ў Мінску адбылося біскупскае пасвячэнне кс. Аляксандра Яшэўскага SDB, якога папа Францішак прызначыў дапаможным біскупам Мінска-Магілёўскай архідыяцэзіі. Пантыфік надаў новаму біскупу тытулярную біскупскую кафедру “Furnоs maior” і скіраваў на служэнне ў Магілёўскую частку архідыяцэзіі.

Галоўным пасвячаючым быў Апостальскі нунцый у Беларусі арцыбіскуп Клаўдыа Гуджэроці, асістуючымі – старшыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч і біскуп Гродзенскі Аляксандр Кашкевіч.
    Тое, што Апостальскі нунцый удзяліў гэтае пасвячэнне ў Год кансэкраванага жыцця, падкрэслівае асаблівую сувязь, якая існуе паміж манахамі і манахінямі з Беларусі, да якіх належыць новапрызначаны біскуп, з асобай і паслугай Рымскага Пантыфіка. Гэтая падзея з’яўляецца кульмінацыйным момантам святкавання Года кансэкраванага жыцця і асаблівым чынам выражае падзяку Касцёла за прысутнасць і працу кансэкраваных асоб у каталіцкім Касцёле ў Беларусі.
    На пачатку св. Імшы Мітрапаліт Тадэвуш Кандрусевіч, звяртаючыся да прысутных, сказаў: “Сёння вялікі дзень. Мы дзякуем Богу і Святому Айцу, які добра бачыць патрэбы каталіцкага Касцёла ў Беларусі і за апошні час павялічыў колькасць беларускіх біскупаў у два разы”. Арцыпастыр падзякаваў таксама бацькам новапрызначанага біскупа, салезіянскай супольнасці, да якой ён належыць. Мітрапаліт папрасіў усіх прысутных маліцца за новага іерарха, які “ўзяты з людзей і пастаўлены для людзей”, а таксама маліцца аб новых пакліканнях да святарства і кансэкраванага жыцця. †