З жыцця Касцёла

10-ю гадавіну каранацыі цудатворнага абраза Маці Божай Кангрэгацкай адзначылі ў Гродне. Ва ўрачыстасцях, якія адбыліся ў касцёле св. Францішка Ксаверыя, прынялі ўдзел шматлікія вернікі, якія дзякавалі Марыі за ўсе атрыманыя праз Яе заступніцтва ласкі.

Ужо традыцыйна духоўная падрыхтоўка да ўрачыстасці пачалася 4 жніўня святой Імшой і адарацыяй Найсвяцейшага Сакраманту. Затым апоўначы ў катэдры была адпраўлена святая Імша пад кіраўніцтвам кс. б-па Юзафа Станеўскага. У сваёй гаміліі іерарх адзначыў, што сёлетнія ўрачыстасці маюць выключны характар, паколькі яны звязаны з 10-й гадавінай каранацыі цудатворнага абраза Маці Божай Кангрэгацкай.
    “Вернікі Гродна заўсёды знаходзяць час, каб прыйсці і памаліцца пры абразе Маці Божай Кангрэгацкай, даручаюць Марыі свае сем’і, выпрошваюць патрэбныя ласкі. Маці Божая Кангрэгацкая ніколі не самотная, Яна заўсёды вядзе дыялог з чалавекам”, – сказаў кс. бп Юзаф.
    Пасля набажэнства было адноўлена сутачнае чуванне, у якім прынялі ўдзел асобныя парафіі горада.
    Вечарам наступнага дня была адпраўлена адпуставая святая Імша, падчас якой вернікі дзякавалі Найсвяцейшай Панне Марыі ў Яе цудоўным абразе за ўсе атрыманыя ласкі і маліліся аб умацаванні веры і вернасці Богу для кожнага чалавека. †

Рэдакцыя адкрыла акаўнт у самай папулярнай у свеце сацыяльнай сетцы. Цяпер падпісчыкі старонкі “Слова Жыцця” будуць першымі даведвацца аб навінах з жыцця Касцёла ў Беларусі і ў свеце. Шматлікія артыкулы можна прачытаць з электроннага носьбіта ў любы зручны час.

Рэдакцыя заклікае да інтэрактыву! Зараз “посты” “Слова Жыцця” можна каментаваць і абмяркоўваць. Інфармацыяй, якая найбольш зацікавіла, адным клікам дзяліцца ў віртуальнай прасторы з сябрамі. Увесь час на старонцы будуць адкрыты тэматычныя апытанні. Іх вынікі па традыцыі з’явяцца ў газеце з каментарыем эксперта.
    Цяпер фота- і відэаматэрыялы сабраны ў альбомы. Гэта зроблена дзеля зручнай навігацыі па старонцы. Любы жадаючы можа адкрываць архівы, праглядаць іх і захоўваць на свой носьбіт нейкія асобныя фотаздымкі або відэастужкі.
    Акрамя таго, карыстальнікі Facebook могуць задаваць пытанні рэдакцыі, дзяліцца сваімі ўражаннямі, пакідаць заўвагі і прапановы. Важна не забываць пра паважлівыя і сумленныя адносіны ў віртуальнай прасторы.
    Будзем рады даведацца аб надыходзячых святах і розных падзеях у Вашых парафіях. Раскажыце пра іх рэдакцыі! Мажліва, менавіта Вашы навіны трапяць на старонкі газеты ў бліжэйшым нумары.
   
    Далучайцеся да газеты ў Facebook! Старонка “Слова Жыцця” знаходзіцца па адрасе www.facebook.com/slowo.grodnensis.by. †

31 ліпеня лес каля Навагрудка, дзе ў час вайны фашысты расстралялі 11 сясцёр назарэтанак, наведалі шматлікія пілігрымы. Сястра Стэла і 10 яе паплечніц загінулі там ранкам 1 жніўня 1943 года, аддаўшы жыццё за бацькаў сем’яў.

Бласлаўлёныя мучаніцы да канца споўнілі сваё пакліканне і былі вернымі харызме сваёй кангрэгацыі. Воляй заснавальніцы іх супольнасці – маці Марыі ад Пана Езуса Добрага Пастыра (Францішкі Сядліскай) – было тое, каб Кангрэгацыя Сясцёр Найсвяцейшай Сям’і з Назарэта жыла па прыкладзе Найсвяцейшай Сям’і праз малітву, працу і цярпенні, ахвяраваныя за святы Касцёл, Папу і сем’і. †

Пад канец жніўня ў Гродне запланаваны Фестываль фарбаў. Яго арганізатары ўпэўніваюць, што гэта будзе сапраўднае свята, поўнае радасці, колераў, танцаў і спеваў. Аднак, ніадзін з плакатаў, што інфармуюць аб гэтай падзеі, не ўпамінае пра тое, што гэтая, здавалася б, прыемная забава выводзіцца з індуісцкай традыцыі.

Фестываль фарбаў Холі становіцца ўсё больш папулярным у многіх краінах, у тым ліку і каталіцкіх. У Беларусі каляровае шаленства таксама набірае абароты, пра што сведчыць нават той факт, што апошні фестываль, які прайшоў у Мінску, сабраў 30 000 удзельнікаў.
    Гэтае “свята” выводзіцца з розных індыйскіх міфаў, у залежнасці ад вызнаваемай традыцыі індуізму (Шываізм, Вайшнавізм) і рэгіёна Індыі (паўночныя, усходнія ці паўднёвыя штаты). Само слова “холі” азначае спаленне. Яго значэнне растлумачваюць шматлікія легенды. Найбольш вядомая з іх расказвае гісторыю бязлітаснага караля дэманаў – Хіраньякашыпу, які хацеў, каб усе ў яго каралеўстве маліліся толькі да яго. Аднак яго расчараваў уласны сын – Прахлада, які горача маліўся богу Нараяна (Вішну). Бацька не мог справіцца з сынам, таму вырашыў пакараць яго смерцю. Ён загадаў сваёй сястры Холіцы, каб яна атуліла пляменніка сваім целам і разам з ім увайшла ў палаючы агонь. Холіка валодала дарам, дзякуючы якому яна магла прайсці праз агонь без пашкоджанняў. Але яна не ўсведамляла, што яе дар дзейнічае толькі тады, калі яна праходзіць праз агонь адна. У выніку Холіка згарэла ў агні, а Прахлада цудоўным чынам ацалеў, быў вернуты да жыцця. †