З жыцця Касцёла

Дзень 11 верасня для семінарыйнай супольнасці нашай дыяцэзіі стаў ужо гісторыяй. У гэты дзень семінарыйная сям’я ў Гродне святкавала 25-годдзе заснавання семінарыі і пачатак чарговага 26-га года духоўнай фармацыі будучых святароў. Пад кіраўніцтвам ксяндзоў біскупаў – кс. б-па Аляксандра Кашкевіча, ардынарыя дыяцэзіі, а таксама кс. б-па Юзафа Станеўскага, дапаможнага біскупа і шматгадовага рэктара семінарыі – адбыліся юбілейныя ўрачыстасці ў семінарыйным будынку. Па запрашэнні рэктара ВДС кс. д-ра Рамана Рачко прыбыло мноства гасцей: дабрачынцаў, прадстаўнікоў свецкіх улад, а таксама ўсіх тых, хто кожны дзень спрыяе добраму функцыянаванню семінарыі.

Урачыстасці распачаліся супольнай святой Імшой пад кіраўніцтвам Яго Эксцэленцыі кс. б-па Аляксандра Кашкевіча ў канцэлебры з біскупам Юзафам. Гамілію прамовіў ксёндз рэктар семінарыі, накрэсліўшы партрэт будучага святара, які павінен прайсці ўсебаковую фармацыю: чалавечую, духоўную, інтэлектуальную і душпастарскую. Па словах Яго Магніфіцэнцыі, трэба звярнуць увагу перш за ўсё на сэрца, якое любіць Бога і людзей: “Патрэбна сэрца, якое любіць Бога, Касцёл і бліжніх. Езус паклікаў простых людзей, якія мелі вялікае сэрца і веру; на гэта трэба асабліва звярнуць увагу падчас семінарыйнай фармацыі”. †

Пад такім дэвізам 12 верасня адбылася IX Нацыянальная пілігрымка сем’яў. Да Маці Божай Нястомнай Дапамогі ў парафію Найсвяцейшага Адкупіцеля ў Гродне прыбылі сем’і з усёй Беларусі. Падчас сустрэчы сужэнцы-католікі маліліся аб тым, каб Маці Божая ахінула іх сваім матчыным плашчом, а Яе заступніцатва ўчыніла так, каб кожная сям’я ішла ў сваім жыцці дарогай сапраўднага шчасця.

У межах IX Нацыянальнай пілігрымкі сем’яў вернікі, што прыбылі на сустрэчу, пачулі гісторыю культу абраза Маці Божай Нястомнай Дапамогі. А. Анджэй Ядкоўскі CSsR заахвоціў прысутных прыносіць перад аблічча Марыі ўсе свае радасці і клопаты, каб у Яе прысутнасці ўсё асэнсаваць, падзякаваць за атрыманыя ласкі і папрасіць аб заступніцтве. Таксама пілігрымы ўдзельнічалі ў адарацыі Найсвяцейшага Сакраманту, мелі магчымасць паспавядацца, маліліся на ружанцы.
    Цэнтральным пунктам пілігрымкі стала ўзначаленая кс. б-пам Аляксандрам Кашкевічам святая Імша ў інтэнцыі ўсіх сем’яў нашай краіны. Падчас набажэнства іерарх звярнуўся да сабраных сужэнцаў з прамовай, падчас якой асаблівы акцэнт зрабіў на праблемах, з якімі сутыкаюцца сучасныя сем’і. †

Вось і настала школьная пара. Па ўсёй краіне прайшлі ўрачыстыя лінейкі, і дзеці пасля вясёлага летняга адпачынку распачалі чарговы навучальны год. Напярэдадні 1 верасня, згодна з добрай традыцыяй, у каталіцкіх святынях адбыліся набажэнствы, падчас якіх маліліся аб патрэбных ласках для дзяцей і моладзі. Таксама былі асвечаны заплечнікі і школьныя прылады. Але не варта забывацца пра тое, што разам з новым навучальным годам распачаўся таксама год катэхетычны, які будзе спрыяць узрастанню ў мудрасці і веры.

Біскуп Гродзенскі Аляксандар Кашкевіч кожны год у пастарскім лісце на пачатак новага катэхетычнага года звяртаецца з такімі словамі да бацькоў, дзяцей, моладзі і катэхетаў: “Навучанне і выхаванне ў веры належыць да найважнейшых задач Касцёла, вызначаных Езусам Хрыстом. Хрыстос пасылае Вас да кожнага чалавека: «Ідзіце на ўвесь свет і навучайце ўсе народы, хрысціце іх у імя Айца, і Сына, і Духа Святога. Вучыце іх захоўваць усё тое, што Я вам наказаў. А Я з вамі праз усе дні ажно да канца свету» (Мц 28, 19–20)”. Згодна з гэтым заклікам, у кожнай парафіі нашай дыяцэзіі праводзіцца сістэматычная катэхізацыя дзяцей і моладзі ажно да часу заканчэння імі навучання ў сярэдняй школе.
    Святары, катэхеты, манаскія сёстры і свецкія асобы ахвярна і нястомна працуюць, каб як мага больш дзяцей і моладзі пачулі Божае слова, пазналі Хрыста і Яго Добрую Навіну. Катэхетам даводзіцца працаваць з рознымі групамі: дзецьмі, што рыхтуюцца да Першай святой Камуніі, з падлеткамі, вучнямі старэйшых класаў, а таксама са студэнтамі і працуючай моладдзю. Да кожнага катэхеты знаходзяць свой падыход, патрэбныя словы, каб данесці Божае слова, умацаваць дар веры. †

Пятая юбілейная сустрэча душпастарства настаўнікаў, выкладчыкаў і выхавацеляў адбылася сёлета ў Тракелях. Маці Божая Тракельская з усёй моцаю мацярынскай любові дазволіла тым, хто сёння фарміруе маладое пакаленне, тым, хто больш за іншых адказвае за наша будучае, сустрэцца ў гэтым месцы, дзе Яна, наша Каралева, здзяйсняла цуды. Здзяйсняла, каб мы моцна ў Яе паверылі, каб прыходзілі і прасілі, бо праз Яе заступніцтва можна выпрасіць шматлікія ласкі ў нашага Збаўцы Езуса Хрыста.

Сёлетняя сустрэча сабрала з усіх куткоў Гродзенскай дыяцэзіі тых аднадумцаў, хто перш за ўсё прыехаў падзякаваць за ўсё тое, што было ў мінулым навучальным го-дзе, за поспехі і здабыткі, за радасць і смутак, за ўзлёты і падзенні. Усе мы цудоўна разумеем, што ў нашым жыцці не бывае нічога выпадковага, што ўсё тое, што сустракаецца на шляху выхавання маладога пакалення, звязана з Божай воляй. Каму як не настаўнікам варта яшчэ і яшчэ раз звяртацца да Той, якая выслухае і абавязкова дапаможа. Таму і сабралася ўся педагагічная супольнасць тут, каб прасіць у Божай Маці аб Яе няспыннай апецы, аб дапамозе ў выхаванні падрастаючага пакалення ў такі няпросты час, аб вырашэнні тых складаных задач, з якімі так часта даводзіцца сутыкацца, працуючы з моладдзю. Сёння ўвесь свет ахутаны спакусамі. Не абмінаюць яны і маладое пакаленне. Як дапамагчы ім разабрацца ў тым, што добрае, а што злое, што варта ўвагі, а што трэба адкінуць, што каштоўнае, а што нізкапробнае. На гэта накіравана праца настаўніка, складаная, але такая неабходная. †