З жыцця Касцёла

Да пытанняў, якія абудзілі найбольш дыскусій падчас апошняга Сінода належала праблема душпастарства разведзеных асоб, якія жывуць у новых грамадзянскіх саюзах. Гэтыя пытанні трактуюцца ў параграфах 84–86 канечнага дакумента.

Пытаннем, якое пэўным чынам абцяжарыла працу Сінода, было пытанне аб магчымасці прыняцця святой Камуніі разведзенымі асобамі, якія жывуць у новым саюзе. У канчатковым дакуменце Сінод не ўпамінае аб магчымасці дапушчэння да Камуніі такіх асоб. Выразна падкрэсліваецца неабходнасць лепшага, больш дакладнага вывучэння сітуацыі да-дзеных асоб і актыўнейшага іх удзелу ў жыцці Касцёла.
   
    Тры параграфы прысвечаны менавіта гэтай праблематыцы. Вось яны:
    84. Ахрышчаныя асобы, якія развяліся і зноў заключылі грамадзянскі саюз, павінны больш уключацца ў хрысціянскія супольнасці рознымі магчымымі спосабамі, пазбягаючы ўсякіх нагод для спакусы. Ключом душпастарскага спадарожнічання ім з’яўляецца логіка інтэграцыі, каб яны не толькі ведалі, што належаць да Цела Хрыста, якім з’яўляецца Касцёл, але і маглі радасна і плённа гэта перажываць. Яны ахрышчаны, яны з’яўляюц-ца братамі і сёстрамі, Святы Дух разлівае ў іх дары і харызмы, для дабра ўсіх. Іх удзел можа быць выражаны ў розных касцёльных паслугах, таму трэба распазнаць, якія з розных форм адчужэння, практыкаваных сёння ў літургіі, душпастарстве, адукацыі і ў інстытуцыйнай сферы можна пераадолець. Яны не толькі не павінны адчуваць сябе экскамунікаванымі, яны могуць жыць і развівацца як жывыя члены Касцёла, адчуваючы, што ён з’яўляецца маці, якая заўсёды іх прымае, клапоціцца пра іх з любоўю і падтрымлівае іх у пілігрымцы жыцця і Евангелля. Гэтая інтэграцыя патрэбна таксама па прычыне клопату і хрысціянскага выхавання іх дзяцей, якія павінны быць прызнаны найважнейшымі. Для хрысціянскай супольнасці клопат пра гэтых людзей не з’яўляецца аслабленнем сваёй веры і сведчання аб непарыўнасці сужэнства: наадварот, у гэтым клопаце Касцёл выражае менавіта сваю любоў. †

31 кастрычніка моладзь з Гродна, Мінска, Полацка і Магілёва правяла ружанцовую малітву праз Skype. Гэта ўжо пяты па ліку Ружанец, які праводзіцца моладдзю з выкарыстаннем сучасных сродкаў сувязі.
    Першая такая малітва праходзіла ў гродзенскім катэдральным касцёле з выкарыстаннем мабільнай сувязі. Калі да гэтага ўдзельнікамі была моладзь гродзенскай дыяцэзіі, то ў гэты раз праз Skype маліліся маладыя католікі з усёй Беларусі.

Ружанец адбыўся 31 кастрычніка. Так каталіцкая моладзь у супрацьлегласць Хэлоўіну, які ўваходзіць у моду ў Беларусі, вырашыла паказаць перавагу веры ў жывога Бога.
    Перад малітвай адбылася святая Імша з удзелам моладзі розных парафій Гродна і моладзі з душпастарства “OPEN”. †

Цеплыню роднага дома і любоў можна было адчуць 17 кастрычніка ў парафіі Святой Сям’і ў Лідзе, дзе прайшла сустрэча сем’яў Гродзенскай дыяцэзіі. На сустрэчу з розных бакоў дыяцэзіі прыбыло шмат сужэнстваў разам з дзецьмі. У свяце прынялі ўдзел таксама тыя сем’і, якія ў гэтым годзе адзначаюць юбілей сужэнства, і тыя, якія толькі заключылі сёлета сакраментальны сужэнскі саюз.

Сустрэчу ўзначаліў біскуп Гродзенскі Аляксандр Кашкевіч, які і быў яе ініцыятарам. Прысутнічаў таксама біскуп Пінскі Антоні Дзям’янка, старшыня Рады па справах сям’і пры Канферэнцыі Каталіцкіх Біскупаў у Беларусі.
    Удзельнікі сустрэчы маліліся за Святога Айца Францішка, за Сінод Біскупаў на тэму сям’і, які праходзіць зараз у Ватыкане, і за самі сужэнствы і сем’і.
    Лідская парафія была абрана месцам правя-дзення гэтай сустрэчы невыпадкова. Апекуны парафіі – Святая Сям’я – вялікі і годны ўзор для пераймання для маладой парафіяльнай супольнасці. У парафіі актыўна праводзіцца душпастарства сем’яў, якое ўключае сотні сужэнцаў, што знаходзяць час на фармацыйныя сустрэчы і адарацыю Найсвяцейшага Сакраманту. Пробашч парафіі кс. Юзаф Ганьчыц заўсёды гасцінна прымае ў парафіяльнай святыні, ствараючы сапраўдную сямейную атмасферу, каб кожны мог адчуваць сябе як дома.
    У гэты дзень кожны ўдзельнік сустрэчы мог адчуць шмат радасці і духоўных перажыванняў. Супольная малітва цэлых сем’яў, прыгожы спеў, цёплыя размовы – адным словам, любоў злучала прысутных. †

22 кастрычніка вернікі аддалі пашану святому, таксама ў гэты дзень у парафіяльную святыню ў Макараўцах прыбылі рэліквіі св. Яна Паўла ІІ, а напярэдадні ўрачыстага ўспаміну святога была асвечана капліца св. Яна Паўла ІІ у шпіталі ў Міхалішках.

З асобай св. Яна Паўла ІІ звязана шмат дат:
    18 мая – гадавіна нараджэння, 16 кастрычніка – гадавіна абрання на Пятровы Пасад, 2 красавіка – гадавіна смерці. Дата 13 мая – гэта памятная і надзвычайная падзея, калі ў 1981 годзе на наступніка св. Пятра быў учынены замах. 22 кастрычніка – ва ўсім Касцёле ў літургіі ўзгадваюць св. Яна Паўла ІІ. Менавіта на гэты дзень прыпадае гадавіна інаўгурацыі яго Пантыфікату. †