З жыцця Касцёла

Традыцыйныя велікапосныя рэкалекцыі для Душпастарства студэнцкай і працуючай моладзі “OPEN” адбыліся ў рэктаральным касцёле Звеставання Найсвяцейшай Панны Марыі ў Гродне. Цягам трох дзён моладзь прысвячала свой час Богу і разважала над сваёй верай, адносінамі з Хрыстом і сваімі бліжнімі.

Штогод рэкалекцыі для моладзі збіраюць вялікую колькасць удзельнікаў з розных парафій г. Гродна. Не стала выключэннем і сёлетняя сустрэча: маладыя вернікі прымалі актыўны ўдзел у духоўных практыкаваннях разам з рэкалекцыяністам кс. Паўлам Рудзьманам, душпастарам моладзі Пінскай дыяцэзіі.
    Час рэкалекцый быў вельмі насычаным: моладзь прымала ўдзел у св. Імшах, набажэнстве Крыжовага шляху, адаравала Найсвяцейшы Сакрамант, а таксама мела магчымасць паяднацца з Богам праз сакрамант пакаяння. Шмат часу было адведзена на размовы з рэкалекцыяністам і разважанні, якія дапамаглі маладым людзям паглядзець на штодзённае жыццё і веру з іншага ракурсу.
    Звяртаючыся да маладых хлопцаў і дзяўчат падчас рэкалекцыйных канферэнцый, кс. Павел шмат увагі прысвяціў тэме шляху да Бога. Ён падкрэсліў, што веруючы чалавек не павінен жыць на нейкім адзінокім востраве, а павінен памятаць пра тое, што яго атачаюць людзі. Таму неабходна сваім жыццём і адпаведнай паставай сведчыць, што толькі паставіўшы Бога на першае месца, можна атрымаць усё, у чым маем патрэбу. Рэкалекцыяніст таксама патлумачыў, чым адрозніваецца сапраўднае хрысціянства ад павярхоўнага. Калі мы акружаем сябе рознымі атрыбутамі – нацельным крыжыкам, малітоўнымі кнігамі, ружанцам, – а на самой справе застаёмся пустымі духоўна, то тады нашыя знешнія праявы веры губляюць усякі сэнс. Мы становімся падобнымі на мабільны тэлефон, які дорага каштуе, прыцягвае ўвагу іншых людзей, але карысці з яго няма, калі зарадка амаль на нулі. †

Папа Рымскі Францішак і Патрыярх Маскоўскі і ўсяе Русі Кірыл сустрэліся на Кубе. Падзея здзейснілася ўпершыню пасля Вялікага расколу 1054 года. Вынікам перамоваў стала падпісанне сумеснай дэкларацыі.

Пытанне аб правядзенні мерапрыемства абмяркоўвалася каля 20 гадоў. Сустрэча адбылася 12 лютага ў 14.25 па мясцовым часе ў аэрапорце Гаваны. Як растлумачылі спікеры абедзвюх Цэркваў, месца для дыялогу было абрана невыпадкова: папа Францішак пачынае свой апостальскі візіт у Мексіку, а патрыярх Кірыл даўно планаваў наведаць Кубу. †

Больш за 150 маладых католікаў з Беларусі прынялі ўдзел у ХХХVIII Еўрапейскай сустрэчы моладзі “Пілігрымка даверу па зямлі”. Спатканне, арганізаванае экуменічнай супольнасцю Taize, адбывалася з 28 снежня па 1 студзеня ў іспанскай Валенсіі. Уражаннямі ад паездкі дзеліцца Вольга Сяліцкая з Гродна.

Я ўпершыню была на еўрапейскай сустрэчы Taize. Шмат чула пра гэтыя спатканні, але не выязджала. У мінулым годзе планавала паехаць у Прагу, але, на жаль, не атрымалася. І вось я ў Валенсіі... У адказ усміхаюся валанцёрам Taize. Нас засяляюць у прыгарадзе. З сяброўкай трапляем да пажылой іспанкі. Нягледзячы на моўны бар’ер, імкнемся зразумець адна адну сэрцам.
    Кожную раніцу сустракаемся на малітве з моладдзю, якая пасялілася з намі ў парафіі. Пасля дзелімся на групы. Наша суполка складаецца з французаў, немцаў, палякаў, славакаў і беларусаў. Браты Taize прапануюць паразважаць над даверам да міласэрнага Бога, шматкратным прабачэннем, сітуацыямі непакою, пашырэннем міласэрнасці, якая ўсеабдымная. Свае думкі скіроўваем да дэвіза сёлетняй сустрэчы – “Мужнасць міласэрнасці”. †

13 снежня гродзенскі біскуп Аляксандр Кашкевіч адчыніў Святыя Дзверы ў катэдральным касцёле св. Францішка Ксаверыя. У гэты ж дзень дапаможны біскуп Гродзенскай дыяцэзіі Юзаф Станеўскі адчыніў Дзверы Міласэрнасці ў касцёле Узвышэння Святога Крыжа (Фара) у Лідзе. У незвычайнай падзеі прыняло ўдзел мноства вернікаў.

Перад пачаткам святой Імшы каля святыні сабраліся шматлікія вернікі. Спеў песні “Езу, давяраю Табе з дзяцінства” уводзіў у перажыванне літургіі, якая адкрыла Юбілейны год міласэрнасці ў Гродзенскай дыяцэзіі.
    З гэтага часу да 20 лістапада 2016 г. у гродзенскім катэдральным касцёле вернікі будуць мець магчымасць атрымаць поўны адпуст. Пасля адкрыцця Святых Дзвярэй біскуп Аляксандр Кашкевіч заклікаў усіх увайсці ў святыню. Затым пачалася ўрачыстая Імша з удзелам святароў, кансэкраваных асоб, навучэнцаў Гродзенскай вышэйшай духоўнай семінарыі і вернікаў горада.
    У гаміліі гродзенскі ардынарый адзначыў, што папа Францішак, абвяшчаючы Юбілей, жадаў звярнуць увагу ўсяго Касцёла на вялікі дар, якім з’яўляецца Божая міласэрнасць. Іерарх дадаў, што праз сваё рашэнне Святы Айцец хоча, каб у гэты Юбілейны год “увесь Касцёл скіраваў свой позірк на таямніцу міласэрнасці, каб кожны чалавек спазнаў блізкасць і любоў Айца Нябеснага”. †