З жыцця Касцёла

14 жніўня ў літургічным календары каталіцкага Касцёла адзначаецца ўспамін св. Максімільяна Марыі Кольбэ, заснавальніка рэлігійнага часопіса “Рыцар Беззаганнай” і аднайменнага апостальскага таварыства. Падчас Другой сусветнай вайны святар дабравольна прыняў ў Асвенціме мучаніцкую смерць замест незнаёмага яму чалавека.

Напярэдадні 75-й гадавіны смерці аднаго з апекуноў Гродзенскай дыяцэзіі асаблівым чынам ушанавалі ў парафіі ў Каробчыцах, куды былі ўнесены яго рэліквіі. Падзея адбылася ў парафіі св. Максімільяна Кольбэ і св. Станіслава 13 жніўня. Рэліквіі ўрачыста ўнёс у святыню біскуп Гродзенскі Аляксандр Кашкевіч, які адзначыў, што, абраўшы сваім заступнікам св. Максімільяна, парафіяльная супольнасць даверылася штодзённай апецы вялікага святога. Іерарх заахвоціў вернікаў выпрошваць праз яго Божае бласлаўленне для сябе, блізкіх, парафіі і ўсёй дыяцэзіі.
    З гаміліяй да прысутных звярнуўся кс. Аляксандр Мацкевіч. Ён падкрэсліў, што сваім прыкладам святы вучыць сучаснага чалавека аддаваць сябе ў дар іншаму. “У святога Максімільяна не адабралі жыццё – ён сам аддаў яго з любові да бліжняга”, – адзначыў святар.
    Напрыканцы ўрачыстасці пробашч парафіі кс. Ян Рушніцкі падкрэсліў, што рэліквіі будуць спрыяць духоўнаму ўзрастанню вернікаў і пабуджаць парафіяльную супольнасць развіваць культ Маці Божай, верным слугой якой быў св. Максімільян. †

• У Крыжовым шляху са Святым Айцом Францішкам прынялі ўдзел каля 800 тыс. чалавек. На начным чуванні маліліся каля 1,6 млн. маладых людзей, а на ўрачыстай св. Імшы з Папам на завяршэнне Дзён моладзі арганізатары налічылі больш за 2,5 млн. чалавек.
    • На кракаўскіх урачыстасцях прысутнічалі каля 1,2 тыс. кардыналаў і біскупаў, у тым ліку 6 біскупаў з нашай краіны, а таксама каля 13 тыс. святароў з усяго свету.
    • Падчас прывітання ў працэсіі са сцягамі прайшлі прадстаўнікі са 187 краін, якія прымалі ўдзел у СДМ. • Цэнтральныя падзеі суправаджаліся аркестрам і хорам з 400 чалавек.
    • У рамках Фестывалю моладзі адбылося каля 250 адукацыйных, культурных і спартыўных мерапрыемстваў, падрыхтаваных пры ўдзеле шматлікіх хрысціянскіх артыстаў свету. Мерапрыемствы праходзілі на 27 сцэнах Кракава. • Па традыцыі на прыватным абедзе з Папам сабралася 12 прадстаўнікоў з розных кантынентаў. Усе маладыя людзі – актыўныя дзеячы кракаўскай падзеі. Сустрэча за агульным сталом працягвалася 1,5 гадзіны. †

Урачыстасці ў гонар Маці Божай Кангрэгацкай прайшлі 4–5 жніўня ў катэдральным касцёле св. Францішка Ксаверыя ў Гродне. Шматлікія вернікі цягам дваццаці чатырох гадзін няспынна чувалі перад цудатворным абразом, праслаўляючы веліч Найсвяцейшай Маці ды ўзносячы малітвы аб Яе заступніцтве і дапамозе.

Згодна з традыцыяй урачыстасці ў гонар Маці Божай Кангрэгацкай папярэднічала малітоўнае чуванне, у якім прынялі ўдзел прадстаўнікі ўсіх парафій горада. Кульмінацыйным момантам свята стала адпустовая св. Імша, якую цэлебраваў біскуп Віцебскі Алег Буткевіч.
    Звяртаючыся да шматлікіх вернікаў, прысутных на набажэнстве, іерарх адзначыў выключную ролю Марыі ў жыцці кожнага чалавека. Біскуп падкрэсліў, што Маці Божая апекуецца намі, а мы павінны дбаць пра тое, каб вера, захаваная і перададзеная старэйшым пакаленнем, надалей фармавала жыццё грамадства. “Сённяшні свет патрабуе сведкаў Езуса Хрыста, якія б не навучаннем ці словам, а звычайным штодзённым жыццём сведчылі аб сваёй веры, аб Божым Валадарстве, брамы якога адкрыў для свету Езус. Няхай Божая Маці і Яе заступніцтва дапаможа нам трываць у еднасці з Хрыстом, і праз гэта – у радасці Яго Валадарства”, – сказаў іерарх. †

XXXI Сусветныя дні моладзі з удзелам Святога Айца Францішка прайшлі ў Польшчы з 26 па 31 ліпеня.
    Галоўныя падзеі адбываліся ў Кракаве – духоўнай сталіцы Божай міласэрнасці, у горадзе, асаблівым чынам звязаным з ініцыятарам СДМ – св. Янам Паўлам ІІ. Дэвізам спаткання сталі словы Езуса: “Шчаслівыя міласэрныя, бо яны міласэрнасць спазнаюць” (Мц 5, 7).

Быць знакам надзеі
    СДМ сталі святам колераў, твараў, падзей. Нягледзячы на моўны бар’ер, удзельнікі мелі ў сабе волю братэрства і жаданне будаваць масты. Напэўна, кожны прыбыў сюды са сваімі ранамі, разнастайнымі пытаннямі, але, перш за ўсё, з радасцю сустрэчы.
    Традыцыйна сімвалічнай карцінай Дзён моладзі з’яўлялася рознакаляровае мора сцягоў, якімі размахвалі ўдзельнікі. Цудоўна, калі сцягі канфліктуючых паміж сабой краін развіваліся побач, бо менавіта так і выглядае будаванне мастоў і нашай будучыні. †