Варта ведаць

•  У Германіі, у каталіцкім касцёле ў Райдт, мусульманскія дзеці знішчылі калядную шопку. Аб гэтым паведаміла паліцыя, не падаючы, аднак, нічога на тэму рэлігійнай прыналежнасці гэтых дзяцей. У Вігілію ў касцёл увайшлі чацвёра дзяцей і адзін малады хлопец, якія знішчылі шопку і абражалі сабраных вернікаў. Газеты апісваюць іх як мусульман.
   
    • У Францыі 1 студзеня бягучага года памёр самы старэйшы біскуп свету Жэры Лёйя, ардынарый французскай дыяцэзіі Амьен у 1963–1985 гадах. Ён праславіўся тым, што, жадаючы поўнасцю змяніць стыль жыцця і паслугі Касцёла, прадаў дыяцэзіяльную нерухомасць і пасяліўся ў кватэры. Бп Жэры Лёйя пражыў 105 гадоў. На сённяшні дзень самым старэйшым біскупам свету з’яўляецца Пітэр Леа Джэрэт – народжаны 19 ліпеня 1912 г. арцыбіскуп мітрапаліт Ньюарка ў ЗША.†

•  У сталіцы Мексікі, Мехіка, у катэдральным касцёле каля 30 святароў на працягу 12 гадзін паспавядалі каля 5000 вернікаў, якія некалькі гадзін стаялі ў чарзе. На пачатку Адвэнту кард. Нарберта Рыв’ера Карэра заахвоціў шукаць паяднання з Хрыстом, і як рэзультат – вялікая колькасць вернікаў прыняла гэтае заахвочванне і прыступіла да сакраманту паяднання.
   
    • На Брытанскіх астравах паводле даследаванняў, праведзеных Інстытутам хрысціянства, больш за палову ўстаноў выказаліся за тое, каб высылаць святочныя віншаванні на паштоўках, якія не адносяцца да Божага Нараджэння, а толькі маюць надпіс “Вясёлых Свят”. Рэлігійныя паштоўкі заменяць зімовыя віды вакзалаў, аэрапортаў. Выключэннем з’яўляецца Бэйнбрыдж (Паўночная Ірландыя). На паштоўках, якія яго жыхары атрымаюць з віншаваннямі на Божае Нараджэнне, будуць рэлігійныя матывы.†

•  У Кітаі ўсё больш узрастае колькасць хрысціян. З-за гэтага кітайскі ўрад раз’юшаны. Аб гэтым сведчаць разбурэнне святынь, арышты падпольных біскупаў і лідараў лакальных супольнасцей, а таксама нелегальныя пасвячэнні клерыкаў. На сённяшні дзень хрысціян больш, чым камуністаў. Лічыцца, што ў Кітаі звыш 100 мільёнаў хрысціян, з якіх 12 мільёнаў – католікі. У той жа час да камуністычнай партыі Кітая належаць не цэлыя 87 мільёнаў членаў.
   
    • У Польшчы з праведзеных у апочні час даследаванняў вынікае, што 89% рэспандэнтаў акрэсліваюць сябе як католікі, 5% – як хрысціяне, а астатнія акрэсліваюць сябе агностыкамі, атэістамі і людзьмі без веравызнання. Для 66% дарослых палякаў парафія з’яўляецца асноўным месцам рэлігійных практык. Але толькі 31% з іх удзельнічае ў жыцці парафіі. †

•  У Францыі памяншаецца колькасць семінарыстаў і павялічваецца колькасць старэйшых ксяндзоў. На сённяшні дзень у гэтай краіне 848 семінарыстаў рыхтуюцца да святарства. На першы курс навучання паступіла 136 клерыкаў. Можна заўважыць, што ў семінарыю паступаюць усё старэйшыя кандыдаты, многія з іх паходзяць з паслясаборных касцёльных рухаў. На сённяшні дзень у Францыі налічваецца каля 15 тысяч ксяндзоў, 2/3 з якіх ужо больш за 65 гадоў. Калі спад будзе далей расці, то ў 2025 годзе святароў будзе толькі 10 тысяч, прычым толькі 5-ці тысячам будзе менш за 75 гадоў.
   
    • Фінляндыя абмяжоўвае рэлігійным меншасцям магчымасць навучання рэлігіі ў грамадскіх школах. Каб мець права на катэхізацыю, цяпер неабходна будзе група з мінімум дзесяці, а не з трох вучняў, як было да гэтага часу. Новае распараджэнне закране перш за ўсё каталіцкіх дзяцей. Катэхезу заменяць заняткамі па этыцы. У гэтую справу ўжо ўмяшалася каталіцкая дыяцэзія ў Хельсінкі. †

•  У Аргенціне ў горадзе Алаварыя ноччу з 31 кастрычніка на 1 лістапада (час Хэлоўіна) быў прафанаваны касцёл Маці Божай Фацімскай. Віноўнікі знішчылі канфесіяналы, абразы, літургічнае абсталяванне, вітражы і нават кветкі. Акрамя гэтага, яны пакінулі ў касцёле сляды крыві і адбіткі пальцаў. Узломшчыкі хацелі падпаліць алтар, але агонь удалося патушыць.
   
    • У Турцыі з часу, калі гэтую краіну наведаў папа Бенедыкт XVI (8 гадоў таму), узрасла колькасць католікаў. Было створана таксама 7 новых парафій. У 2006 г. у краіне было 32 тысячы католікаў і 68 святароў. На сённяшні дзень 53 тысячы жыхароў краіны – католікі, сярод якіх 58 святароў, якія працуюць у 54-х парафіях. Варта таксама прыгадаць, што на канец лістапада запланаваны візіт Папы ў Турцыю. †

•  Палітычная журналістка Мартына Пардзі пасля 25-ці гадоў працы на BBC вырашылася пайсці ў манастыр. У сваім профілі на Твітэры яна пакінула паведамленне: “Прывітанне, адыходжу з BBC. З Богам”. Яна была адной з самых значных медыйных асоб у Паўночнай Ірландыі. Дырэктар BBC сказаў, што яму вельмі шкада страціць такога працаўніка, але адначасова ён пажадаў Мартыне ўсяго найлепшага на новым шляху.
   
    • У Пермі (Расія) бацькі сатаністы назвалі свайго сына Люцыферам. Аб гэтым паведаміў кіраўнік Кіраўскага аддзела ЗАГС, дзе было зарэгістравана дзіця. Расійскае заканадаўства дазваляе бацькам выбіраць для сваіх дзяцей такія імёны, якія яны захочуць. Маці хлопчыка сказала, што вяла нездаровае жыццё і пастанавіла, што калі дзіця народзіцца, яго назавуць Люцыферам.†

•  У Маскве адбылася сустрэча на тэму “Інфармацыйная прастора – прэзентацыя свецкіх і рэлігійных падзей”. Арганізатарам выступіла Міжнароднае інфармацыйнае агенцтва “Расія сёння”. Прадстаўнікі традыцыйных канфесій Расіі падзяліліся заўвагамі на тэму ўзроўню рэлігійных ведаў сярод жыхароў Расіі. Удзельнікі сустрэчы з жалем сцвердзілі, што ўзровень рэлігійных ведаў і рэлігійнай свядомасці расіян нізкі.
   
    • На Мальце шэсць сясцёр уршулянак прымуць удзел у паўфінале конкурсу Еўрабачанне. Манахіні выканаюць твор, напісаны Філіпам Вела, які паказвае іх працу з сіротамі. Дазвол на ўдзел у конкурсе сёстры атрымалі ад аб-па Паула Крэмона, які наказаў ім ісці за радай Папы і евангелізаваць свет. Паўфінал адбудзецца 21 і 22 лістапада.†

•  У Бразіліі, у Рыа-дэ-Жанейра, быў абакрадзены мясцовы арцыбіскуп. Тры ўзброеныя мужчыны затрымалі аўтамабіль кард. Жуана Тэмпесты ў кіламетры ад яго рэзідэнцыі. Пазнаўшы кардынала, яны спачатку папрасілі ў яго прабачэння, а затым аграбілі. Забралі тэлефон, персцень, крыж і пяро. Абакралі таксама семінарыста і фатографа, якія спадарожнічалі арцыбіскупу. Паліцыі ўжо ўдалося адшукаць усе скрадзеныя рэчы акрамя фотаапаратаў.
   
    • Каталіцкі біскуп Мальты прапанаваў, каб кожная парафія дыяцэзіі прыняла адну сям’ю хрысціян, якіх праследуюць на Блізкім Усходзе. Кіраўніцтва Мальты прагне паведаміць аб тым, што яго дыяцэзія гатова зрабіць такі крок, каб дапамагчы хрысціянскім сем’ям, што перажываюць ганенні. †