11 студзеня а 13-й гадзіне ў Гродне ў Абласным кардыялагічным шпіталі па вул. Болдзіна кс. бп Аляксандр Кашкевіч урачыста асвяціў экуменічную капліцу. “З сённяшняга дня гэтая капліца будзе месцам сустрэчы чалавека з Богам. Шукайце тут паратунку і ўнутранага супакою”, – пажадаў іерарх.

На ўрачыстым асвя­чэнні прысут­нічалі таксама кс. Раман Катлімоўскі, кс. Алег Кудэрка і а. Юзаф Макарчык OFMConv, сёстры назарэтанкі на чале са сваёй правінцыяльнай сястрой Нэрэушай Падзялінскай CSFN, алюмны Гродзенскай вышэйшай духоўнай семінарыі, праваслаўны святар, хворыя і шматлікія працаўнікі службы аховы здароўя на чале з галоўным урачом спадарыняй Тамарай Далгашэй, якая на самым пачатку прывітала ўсіх прысутных, падкрэсліваючы, што ў хворых з’явілася выдатная магчымасць чэрпаць сілы і знаходзіць духоўную дапамогу ў гэтым святым месцы. †

Пасля прывітання ксёндз біскуп асвяціў алтар і табэрнакулюм, а затым капліцу асвяціў праваслаўны святар а. Аляксандр.
    Найсвяцейшую Ахвяру гродзенскі ардынарый цэлебраваў у інтэнцыі медыцынскага персаналу і ўсіх хворых, якія знаходзяцца ў гэтым месцы. Падчас казання a. Юзаф Макарчык OFMConv, прыгадваючы Год веры, сказаў аб Езусе Хрысце, які з’яўляецца Галоўным Лекарам душы і цела. Менавіта чалавек на падставе моцнай веры ў Найважнейшага Лекара можа атрымаць аздараўленне. “Зараз тут, у гэтай капліцы, мы маем сапраўднага Бога – Найвышэйшага Лекара, а вера ў Яго можа даць ласку аздараўлення”, – дадаў а. Юзаф. Напрыканцы св. Імшы ксёндз біскуп шчыра падзякаваў усім тым, хто якімсьці чынам садзейнічаў паўстанню капліцы, асабліва кіраўніцтву кардыялагічнага цэнтра, і пажадаў, каб у гэтым месцы заўсёды панавала прыемная атмасфера лячэння хворых.
    Кс. Раман Катлімоўскі, які апекуецца хворымі ў кардыялагічным цэнтры, выразіў падзяку ўсім тым, хто дапамагае яму несці гэтае служэнне, і нагадаў, што з гэтага месца выпраменьваецца асаблівае духоўнае святло, якім з’яўляецца Збаўца, Езус Хрыстус.
    У Гродзенскай дыяцэзіі гэта ўжо чацвёртая па ліку шпітальная капліца. Раней яны былі асвечаны ў Гродзенскім абласным шпіталі, а таксама ў Іўеўскай і Ашмянскай раённых бальніцах.
    Святая Імша і наведванне хворых у палатах Гродзенскага абласнога кардыялагічнага цэнтра адбываецца кожны аўторак з 17-ай гадзіны.