Праца Сіноду

Жыць Евангеллем.
Першы Сінод Гродзенскай дыяцэзіі

У межах І Сінода Гродзенскай дыяцэзіі бп Аляксандр Кашкевіч стварыў Падкамісію па справах абвяшчэння Божага слова, якая ўваходзіць у склад Камісіі па справах літургічнага душпастырства і сакраментальнага жыцця. Абшарам яе зацікаўленасці з’яўляецца ўсё тое, што датычыць абвяшчэння і слухання Божага слова.
    Касцёл жыве Божым словам, захоўвае яго і аберагае, перадае з пакалення ў пакаленне і дзеліцца ім з усімі людзьмі. Мэтай Падкамісіі з’яўляецца ацэнка прапаведавання Божага слова ў Гродзенскай дыяцэзіі (у тым ліку недахопы і памылкі, звязаныя з гэтай дзейнасцю), а таксама фармацыя тых, хто яго абвяшчае. Падкамісію цікавяць разнастайныя пытанні, звязаныя з нядзельным і штодзённым казаннем ці гаміліяй (крыніцы, тэматыка і інш.), а таксама арганізацыя парафіяльных місій і рэкалекцый.✝︎

Жыць Евангеллем.
Першы Сінод Гродзенскай дыяцэзіі

Касцёл рэалізуе місію асвячэння праз святую літургію, якая з’яўляецца здзяйсненнем святарства Пана Езуса. Добра перажытая св. Імша – гэта крыніца і вяршыня хрысціянскага жыцця. У ёй абвяшчаецца і цэлебруецца містэрыя Хрыста, пра сутнасць якой вернікі пакліканы сведчыць у свеце.
    Праблематыкай, якой займаецца Камісія па справах літургічнага душпастырства і сакраментальнага жыцця, з’яўляецца шырока разуметая літургія Касцёла, асаблівым чынам лакальнага – Гродзенскага. Падчас нарад члены Камісіі засяроджваюць увагу на сфарміраванай літургіі ў парафіях, ажыццяўляемых сакрамантах і сакраменталіях. Іх мэта – зрабіць вернікаў успрыімлівымі да таго, што кожную цэлебрацыю трэба старанна рыхтаваць у адпаведнасці з літургічнымі кнігамі. Гэтая задача адносіцца найперш да душпастыраў і парафіяльнай літургічнай службы. ✝︎

Жыць Евангеллем.
Першы Сінод Гродзенскай дыяцэзіі

Касцёл абвяшчае Божае слова, каб Добрая Навіна пра збаўленне пашыралася ва ўсе бакі свету; цэлебруе сакраманты, каб жывы Езус прасякаў людскую штодзённасць; здзяйсняе паслугу любові (caritas) і сведчання хрысціянскага жыцця, каб ахінаць клопатам асабліва тых, хто “хворы” (параўн. Мц 9, 12). Асноўнай задачай, незалежна ад часу і акалічнасцей, з’яўляецца адкрыццё чалавека на асабістую сустрэчу з Хрыстом, “тым самым учора, і сёння, і навекі” (Гбр 13, 8). Касцёл рэалізуе гэтую місію праз арганізаваную збаўчую дзейнасць, называемую душпастырствам. Яго мэта палягае на суправаджэнні людзей, што жывуць “тут і цяпер”, да сустрэчы з Богам у веры, надзеі і любові. ✝︎

Жыць Евангеллем.
Першы Сінод Гродзенскай дыяцэзіі

Ахова касцёльных аб’ектаў – абавязак як усёй дыяцэзіі, так і асобных парафій, духоўных і свецкіх асоб. Яна палягае на клопаце пра стан рэлігійных помнікаў, а таксама на абуджэнні грамадскай свядомасці аб іх непаўторнай каштоўнасці.
    Прадметам разгляду Камісіі па справах спадчыны Гродзенскага Касцёла і сакральнага будаўніцтва з’яўляюцца рэлігійныя, гістарычныя, патрыятычныя, навуковыя і мастацкія вартасці дыяцэзіі. Сюды адносяцца святыні, іх акружэнне, а таксама могілкі ды іншыя рухомыя і нерухомыя аб’екты, якія служаць рэлігійнаму культу. ✝︎

Жыць Евангеллем.
Першы Сінод Гродзенскай дыяцэзіі

Хрыстос праз свае словы і ўчынкі аб’явіў нам Бога, багатага на міласэрнасць. Ён з любоўю схіляўся над людзьмі, якія спазналі духоўнае ці фізічнае цярпенне. Заахвочваў вучняў наследаваць Усемагутнага, кажучы: “Будзьце міласэрнымі, як і Айцец ваш міласэрны” (Лк 6, 36). Езус дапамог нам усвядоміць, што паслуга любові да ўбогіх ніколі не згубіць сваю актуальнасць, таму што “ўбогіх заўсёды маеце пры сабе” (Ян 12, 8). Таму відавочна, што І Сінод Гродзенскай дыяцэзіі не можа ўхіліцца ад разважанняў над дабрачыннай справай.