У гэты адметны дзень навучальную ўстанову наведалі многія шаноўныя госці, былыя выкладчыкі і выпускнікі семінарыі, якія сёння служаць у розных частках Беларусі. Сярод гасцей быў і заснавальнік семінарыі Мітрапаліт Мінска-Магілёўскі арцыбіскуп Тадэвуш Кандрусевіч.

Справаздачy з дзейнасці навучальнай установы на працягу 25 гадоў прадставіў прэфект семінарыі кс. Віталій Сідорка, нагадаўшы ў ёй гісторыю заснавання семінарыі і падрыхтоўкі маладых людзей да святарскага служэння. Прэфект узгадаў таксама тых, хто стаяў ля пачаткаў семінарыі і ўклаў шмат працы ў яе заснаванне.
    У сваю чаргу біскуп Гродзенскі Аляксандр Кашкевіч у сваім слове падзякаваў за працу і адданасць многіх руплівых святароў, дзякуючы якім стала магчымым узнікненне гэтай навучальнай установы і яе развіццё. Асаблівым чынам біскуп падзякаваў двум святарам, якія ўтваралі семінарыю ў Гродне ад самага пачатку яе існавання: ксяндзу прэлату Ежы Мар’яну Лявінскаму i айцу Андрэю Шчупалу CSsR. Іерарх выказаў ім падзяку за служэнне і сведчанне святарскай паставы і ўручыў папскую адзнаку – крыж заслугі “Pro Ecclesia et Pontifice” ад Святога Айца Францішка. †

Кульмінацыйным пунктам святкавання стала ўрачыстая святая Імша, якую ўзначаліў арцыбіскуп Тадэвуш Кандрусевіч у пабернардынскім касцёле.
    У гаміліі Мітрапаліт сказаў, што гродзенская семінарыя “вытрывала выпрабаванне часам не толькі як навучальная і выхаваўчая ўстанова, але яшчэ і як сведчанне Евангелля для тых, хто перанёс цяжкія часы праследавання, і для тых, хто сёння змагаецца з выклікамі часу”. Святкаванні завяршыліся асвячэннем і адкрыццём памятнай дошкі, якая будзе нагадваць аб гэтай юбілейнай урачыстасці. Кожны ўдзельнік атрымаў памятны альбом, у якім прадстаўлена гісторыя заснавання семінарыі.