Малітва аб супакоі
   Не спыняюцца ваенныя дзеянні на ўсходзе Украіны. У сувязі з узмацненнем баявых дзеянняў і ростам ліку забітых і параненых біскупы лацінскага абраду ў гэтай краіне заахвочваюць вернікаў да малітвы і посту ў інтэнцыі супакою, а таксама ахвяр вайны.
   
   Зварот іерархаў быў зачытаны ва ўсіх касцёлах і капліцах лацінскага абраду. Заклапочаныя і занепакоеныя будучыняй краіны і народа, біскупы заахвочваюць вернікаў нястомна выпрошваць у Бога міласэрнасці, спяваючы “Суплікацыю” і молячыся Вяночкам да Божай міласэрнасці. Выразным знакам гэтай вялікай малітвы аб супакоі павінна быць грамнічная свечка, запаленая ў час сур’ёзнай пагрозы і пры паміраючых. “Давайце запальваць яе падчас штодзённай супольнай малітвы і тады, калі будзем маліцца за памерлых і акалечаных, а таксама просячы аб збаўленні ад вайны”, – напісалі біскупы. †

---

Хутка Чэмпіянат Еўропы
па футболе сярод святароў
   IX Чэмпіянат Еўропы па міні-футболе сярод святароў пройдзе 23–27 лютага ў Аўстрыі.
    Чакаецца ўдзел каля 220 ксяндзоў з Беларусі, Польшчы, Аўстрыі, Украіны, Харватыі, Партугаліі, Славакіі, Босніі, Румыніі, Славеніі, Венгрыі, Чарнагорыі, Косава, Албаніі і Казахстана. З ініцыятывай арганізацыі святарскага чэмпіянату выступіла духавенства з Аўстрыі. Яны таксама арганізавалі першы турнір у 2004 годзе ў Айзенштадт. “Нашай асноўнай мэтай з’яўляецца сустрэча з калегамі з усіх еўрапейскіх краін і з іншых касцёльных традыцый”, – падкрэсліваюць аўстрыйскія ксяндзы. Разам са спартыўнымі спаборніцтвамі плануецца пілігрымка ксяндзоў у вядомы ў рэгіёне санктуарый, а таксама штодзённая літургія з біскупамі.

---

Пратэсты хрысціян у Індыі
   У сталіцы Індыі Дэлі мноства хрысціян выступілі супраць атак на касцёлы. Некалькі дзясяткаў пратэстуючых былі затрыманы, сярод іх – каталіцкі ксёндз і манахіня.
    Атакі на касцёлы менавіта ў сталіцы прынясуць незваротныя страты для рэпутацыі Індыі. 1 лютага ноччу была праведзена атака на каталіцкі касцёл св. Альфонса ў Дэлі. Невядомыя ўварваліся ў будынак і абрабавалі яго. Сярод іншага была здзейснена прафанацыя Найсвяцейшага Сакраманту. Гэта быў ужо пяты падобны выпадак у адным толькі рэгіёне Дэлі. Хрысціяне лічаць, што за атакамі стаяць індуісты-экстрэмісты. Паліцыя ўзмацніла меры бяспекі вакол каля 200 касцёлаў у Дэлі.