Мц 5, 17–37

Езус сказаў сваім вучням: “Не думайце, што Я прыйшоў адмяніць Закон ці Прарокаў. Не адмяніць прыйшоў Я, а выканаць. Бо сапраўды кажу вам: пакуль не міне неба і зямля, ніводная ёта, ніводная рыска не зменіцца ў Законе, пакуль не збудзецца ўсё. Таму, калі хто парушыць адну з гэтых найменшых запаведзей і навучыць гэтаму людзей, той найменшым назавецца ў Валадарстве Нябесным. Хто ж выканае і навучыць, той вялікім назавецца ў Валадарстве Нябесным. Бо кажу вам, калі справядлівасць ваша не пераўзыдзе справядлівасці кніжнікаў і фарысеяў, то вы не ўвойдзеце ў Валадарства Нябеснае. Вы чулі, што было сказана продкам: «Не забівай», – а хто заб’е, падлягае суду. А Я кажу вам, што кожны, хто гневаецца на брата свайго, падлягае суду. Хто ж скажа брату свайму «рака», падлягае Сінэдрыёну, а хто скажа «неразумны», падлягае геене вогненнай. Таму, калі прынясеш дар свой да ахвярніка і ўспомніш там, што брат твой мае нешта супраць цябе, пакінь дар свой перад ахвярнікам і ідзі спачатку памірыся з братам сваім, а тады прыйдзі і прынясі свой дар. Мірыся з праціўнікам тваім хутка, пакуль ты з ім яшчэ ў дарозе, каб праціўнік не аддаў цябе суддзі, а суддзя не аддаў цябе слугу, і каб не ўкінулі цябе ў вязніцу. Сапраўды кажу табе: не выйдзеш адтуль, пакуль не аддасі апошні грош. Вы чулі, што сказана: «Не чужалож». А Я кажу вам: кожны, хто з пажадлівасцю глядзіць на жанчыну, ужо ўчыніў з ёю чужалоства ў сваім сэрцы. Калі правае вока тваё спакушае цябе, вырві яго і адкінь ад сябе, бо лепей табе, калі загіне адзін з тваіх членаў, чым усё цела тваё будзе кінута ў геену. І калі правая рука твая спакушае цябе, адсячы яе і адкінь ад сябе, бо лепей табе, калі загіне адзін з тваіх членаў, чым усё цела тваё пойдзе ў геену. Сказана: «Калі хто адпускае жонку сваю, няхай дасць ёй разводны ліст». А Я кажу вам: кожны, хто развядзецца з жонкаю сваёю, акрамя як з прычыны распусты, той даводзіць яе да чужалоства, а хто ажэніцца з разведзенаю, той чужаложыць. Вы чулі, што сказана было продкам: «Не прысягай фальшыва, а выконвай перад Богам прысягі свае». А Я кажу вам: не прысягайце наогул: ні небам, бо гэта пасад Божы; ні зямлёю, бо гэта падножжа ног Ягоных; ні Ерузалемам, бо гэта горад вялікага Караля. Ні галавою сваёй не прысягай, бо не можаш ніводнага воласа зрабіць белым або чорным. Няхай будзе слова вашае «так-так», «не-не». А што звыш гэтага, тое ад злога”. †

Прыпадобніцца да Хрыста
   Часта, слухаючы казанне на Гары, канцэнтруемся на патрабаваннях, якія перад намі ставіць Езус. Здаецца, што выканаць іх амаль немагчыма. Нам вельмі хацелася б ісці па ўказанай Збаўцам дарозе, але, будучы рэалістамі, разумеем, што гэта няпроста, калі наогул магчыма. Разам з тым забываемся, што Той, хто прамовіў такія словы, кожнае з пастаўленых патрабаванняў выканаў у сваім жыцці. У Езусе Хрысце Закон атрымаў новае значэнне. Ён не адмяніў старазапаветных правіл, а надаў ім адпаведны сэнс і паказаў, якім чынам самі можам іх выконваць.
    Езус звяртаецца да нас у паўнаце аўтарытэту Найсвяцейшай Тройцы, роўны Айцу. Яго навучанне перапоўнена Божай моцай, уцелаўленнем якой Ён сам з’яўляецца. Адначасова Хрыстос поўнасцю застаецца чалавекам, а мы як хрысціяне закліканы прыпадобніцца да Яго. Уласнымі сіламі не здолеем гэтага зрабіць. Мусім адкрыцца на Хрыста і прасіць дапамогі Святога Духа, які будзе нас весці да паўнаты, падрыхтаванай Айцом.

● Чым для мяне з’яўляюцца Божыя запаведзі? ● Ці стараюся выконваць іх у штодзённым жыцці?