ХXVII ЗВЫЧАЙНАЯ НЯДЗЕЛЯ
Разважанні з Божым Словам
З Eвангелля св. Марка
Падышлі фарысеі да Езуса і, выпрабоўваючы Яго, спыталіся, ці дазволена мужу разводзіцца з жонкаю? Ён сказаў ім у адказ: “Што наказаў вам Майсей?”. Яны сказалі: “Майсей дазволіў пісаць разводны ліст і разводзіцца”. А Езус сказаў ім у адказ: “Дзеля жорсткасці сэрца вашага ён напісаў вам гэтую запаведзь, бо на пачатку стварэння Бог стварыў іх мужчынам і жанчынай. Таму пакіне мужчына бацьку свайго і маці сваю і злучыцца са сваёй жонкай, і будуць двое адным целам. Так што яны ўжо не двое, але адно цела. Таму тое, што Бог злучыў, чалавек няхай не разлучае”.
У доме вучні зноў спыталіся ў Яго пра гэта. Ён сказаў ім: “Хто развядзецца з жонкаю сваёю і ажэніцца з іншай, той чыніць распусту ў дачыненні да яе. І калі жонка развядзецца з мужам сваім і выйдзе за іншага, чыніць распусту”.
†
Мк 10, 2–12
Святасць сужэнства Вучэнне Езуса аб непарыўнасці шлюбу асабліва цяжка прыняць людзям ХХІ стагоддзя, паколькі сённяшні свет забыўся пра вялікае значэнне сям’і. Многія людзі крытыкуюць Касцёл, абвінавачваючы яго ў тым, што не ідзе ў нагу з часам і не разумее сучасных праблем. Таму зараз можна заўважыць, як сістэматычна і паслядоўна падрываюцца і высмейваюцца такія вартасці, як сапраўднае каханне, вернасць, адданасць, чыстасць, святасць сужэнства...
Маладыя людзі, якія засноўваюць сям’ю, забываюцца, што любоў і шчасце будуюцца, а не бяруцца ў крэдыт.
Не прыкладваюць ніякіх намаганняў, а толькі чакаюць, што гэта само прыйдзе ім у рукі. А калі так не адбываецца, адразу хочуць выйсці з заключанага саюзу, апраўдваючыся, што проста ўсё не атрымалася, не было выканальным.
Але ж пабудаваць добрае і шчаслівае сужэнства магчыма! Аб гэтым сведчыць прыклад мноства цудоўных сем’яў, якія жывуць ва ўсім свеце. Як сцвярджае бразільская прымаўка, “у добрым сужэнстве сустракаюцца неба і зямля”.
Мы ўсе павінны старанна маліцца аб моцных і шчаслівых сем’ях. Іх вернасць і любоў з’яўляюцца надзвычай моцным сведчаннем для блукаючага свету.
● Што раблю, каб не дапусціць крызісу свайго сужэнства? ● Як дапамагаю сужэнствам, што перажываюць крызіс?
|
|