Езус сказаў: “Я – добры пастыр. Добры пастыр аддае жыццё сваё за авечак. А найміт і не пастыр, якому не належаць авечкі, калі бачыць, што прыходзіць воўк, кідае авечак і ўцякае, а воўк хапае і разганяе іх. Уцякае, бо ён найміт і не клапоціцца пра авечак. Я – добры пастыр і ведаю сваіх, а Мае ведаюць Мяне, як Мяне ведае Айцец і Я ведаю Айца. І жыццё сваё аддаю за авечак. Ёсць у Мяне і іншыя авечкі, якія не з гэтага двара. І гэтых Мне трэба прывесці, і яны будуць слухаць голас Мой, і будзе адзін статак і адзін пастыр. За тое любіць Мяне Айцец, што Я аддаю жыццё сваё, каб узяць яго зноў. Ніхто не адбірае яго ў Мяне, але Я сам аддаю яго. Я маю ўладу яго аддаць і маю ўладу зноў узяць яго. Такую запаведзь Я атрымаў ад Айца Майго”. †

Знайсці сапраўднае шчасце
   Перад намі сёння стаіць постаць Хрыста, Добрага Пастыра. Гэта Ён “да водаў спакойных вядзе мяне, душу маю пажыўляе, накіроўвае мяне на сцежкі справядлівасці” (Пс 23). Ён, уваскрослы, застаецца з намі на звілістых шляхах гісторыі ажно да сканчэння свету. Чаму? Таму што належым да Яго аўчарні, у якой кожная авечка каштоўная, а ўсе іх яднае любоў.
    У гэты час давайце глыбей задумаемся над разважлівым падыходам да таго, што прапануе свет, каб у Езусе Хрысце, Добрым Пастыры, мы адкрылі і знайшлі сапраўднае шчасце.
   

● Якія падзеі дазволілі мне апошнім часам адчуць Божую любоў?    ● Ці стараюся ўслухацца ў голас Бога?