Мэта месяца: АДЧУЦЬ РЫТМ ЖЫЦЦЯ Гэта важна. Калі крочыш у такт жыццю, атрымліваецца ўсміхнуцца дрэннаму надвор’ю, дапамагчы бліжняму ў віры сваіх праблем. Толькі пры гэтай умове ў Цябе ўсё заўжды раскладзена па палічках, Ты бадзёры і задаволены жыццём. Ты ўсё паспяваеш і спіш колькі трэба.
Калі няма рытму, няма і тэмпу. Тады жыццё здаецца марудным. Чалавек адчувае, што нейкія рэчы ён робіць аўтаматычна, а пэўныя з іх – нават без патрэбы.
І хоць музыка ў сэрцы кожнага свая, рытм – гэта той галоўны элемент, дзякуючы якому інструмент Тваёй душы здольны выканаць прыгожую мелодыю. Толькі хтосьці рашуча ўступае, і ўсе заміраюць, а хтосьці нясмела выслухоўвае пажаданні іншых і выконвае мелодыю “на заказ”.
Прадмет разважанняў месяца: ШЛЯХ Шлях жыцця, шлях думкі, шлях вырашэння праблемы...
Існуе залежнасць ад выбранага напрамку, вызначаных прынцыпаў і арыенціраў. Адныя абіраюць марскі шлях і плывуць па плыні, другія пракладваюць сцежку ў лесе, бо там найбольш прыдатная глеба. Які варыянт даспадобы Табе? І ці задумваўся Ты, якія сляды пакінеш пасля сябе на шляху жыцця, да чаго імкнецца Твая свядомасць па шляху думкі і якімі пуцявінамі Ты крочыш да вырашэння праблемы? У маі ёсць час паразважаць над гэтымі пытаннямі.
Асоба месяца: Святы Каміл дэ Лелліс Нарадзіўся Каміл 25 мая 1550 года ў правінцыі Італіі. Яго бацька быў вайскоўцам, і хлопец заўсёды хацеў быць падобным да яго. У маладым узросце Каміл служыў у Венецыі, Іспаніі, Афрыцы. У арміі прыахвоціўся да гульні ў карты. У выніку прайграў свой набытак. У хуткім часе пасля гэтага ён пачаў будаваць манастыр. У яго ўнутраным свеце адбылося духоўнае аднаўленне, і ён уступіў у навіцыят.
Так здарылася, што Каміл трапіў у шпіталь (аб сабе нагадвалі баявыя раны, якія ён атрымаў падчас службы ў арміі). Там Каміл заўважыў, як абыходзяцца з хворымі, і захацеў нешта змяніць. Паразважаўшы, вырашыў усё сваё жыццё прысвяціць служэнню хворым людзям. Працуючы, даслужыўся да кіраўнічага паста, што дало магчымасць унесці пэўныя змены ў працу шпіталя. Напрыклад, змяніць наёмных працаўнікоў на добраахвотнікаў. Затым Каміл дэ Лелліс прыняў сан святара. У 1584 годзе заснаваў Таварыства дапамогі хворым (у 1591 годзе яно набыло статус манаскага ордэна).
За ўсё жыццё Каміл дэ Лелліс заснаваў 14 мясцін, дзе працавалі людзі з ордэна. Каміліянцы, як іх называлі, клапаціліся аб безнадзейна хворых людзях, каб суцешыць іх, знаходзячыся побач.
У 1742 годзе Каміл быў беатыфікаваны, у 1746 годзе – кананізаваны. Каталіцкі Касцёл успамінае св. Каміла 14 ліпеня.
Да якіх Святых маліцца ў маі? Святы Станіслаў (8 мая).
Справа месяца: ЗААХВОЦІЦЬ БЛІЖНЯГА Усе мы ў некаторай ступені залежым адзін ад аднаго. Людзі жывуць у соцыуме, таму кантакт, безумоўна, патрэбны. А камунікацыя – гэта адзін з элементаў зносін паміж людзьмі. Уважлівыя звярнулі ўвагу на тое, што камунікатыўныя асобы здольны ўздзейнічаць на іншага чалавека. Добра, калі яны гэта робяць з карысцю для нас жа.
Чаму не паспрабаваць і нам? Кагосьці патрэбна ўзяць за руку, надаўшы ўпэўненасці, камусьці патрэбна адкрыць вочы на відавочнае, а нехта чакае закліку да добрай працы. Маленькі штуршок – і Ты заахвоціў бліжняга да нечага добрага, нешта яму ўзгадаў, на штосьці звярнуў яго ўвагу.
Кніга месяца: “Айцец Луіджы Арыёнэ: Шлях хрысціяніна” “Рабіць дабро заўсёды, рабіць дабро ўсім, зла ніколі, нікому”, – такімі словамі пачынаецца кніга пра жыццё св. айца Арыёнэ, італьянскага святара. “Ён жыў бедна для таго, каб зрабіць багатымі бедных; ён жыў у пакоры для таго, каб пакінутыя і пагарджаныя зноў здабылі сваю добрую якасць; ён жыў для Бога, каб чалавецтва не адчувала холаду адзіноты і зноў адкрыла для сябе радасць братэрства”.
Біяграфічная кніга, якая ўключае апісанне фрагментаў з самага маленства айца Арыёнэ да яго навучання, суправаджаецца фотаздымкамі з жыцця, месцаў, якія наведваў святар, людзей, з якімі быў звязаны. Кніга прасякнута духам святасці. На старонках змешчаны малітвы, вобразы Марыі, якую праслаўляў а. Луіджы Арыёнэ. Кніга напісана ў жанры кароткага летапісу жыцця Святога.
Верш месяца: “По воле Его мы дышим”, Марыя Скерсь Знаёмімся з творчасцю нашай моладзі:
По воле Его мы дышим...
По воле Его мы уйдем...
Он сердца голос слышит,
Он знает как мы живем.
Он любит нас всем своим сердцем –
За нас на крест Сына отдал.
Он ждет, когда сами мы дверцу
Откроем, чтоб ласки нам дал.
Он – Пастырь, а мы – Его овцы...
Он – Свет, а мы – Света лучи...
Он свыше дарует нам ловкость
И путь освещает в ночи.
Он все нам проступки прощает
И ждет покаянья слезу.
Его милосердие не тает,
На сердце оставив следы.
Он дарит нам Духа Святого
И вечную радость в раю.
Испить из Истока Живого
Стремись еще в жизни бою.
(верш пададзены на мове арыгінала)
“Яго міласэрнасць бязмежная. Ён цярпліва чакае, пакуль мы адрачэмся ад штодзённасці, запросім Яго ў сваё жыццё і адкрыем дзверы свайго сэрца, а Ён сваёй кроўю ацаліць усе раны, ачысціць сэрца і напоўніць яго сваёй бязмежнай любоўю...” – піша Марыя.