З каталіцкіх СМІ Беларусі (33)

Прэса

catholicby2018   Інтэрнэт-партал Касцёла ў Беларусі
   Парафія Найсвяцейшай Тройцы ў Радашковічах правяла Купалаў фэст для ўсіх, хто любіць і шануе народнага паэта Беларусі Янку Купалу. Сёлетні фэст праходзіў у 140-ю гадавіну з дня нараджэння славутага беларускага песняра.
    Ян Луцэвіч нарадзіўся ў 1882 годзе ў Вязынцы, быў ахрышчаны ў касцёле Найсвяцейшай Тройцы старадаўняга мястэчка Радашковічы і атрымаў імя ў гонар Хрыстовага Папярэдніка Яна Хрысціцеля.
    Сёлетні Купалаў фэст складаўся з трох частак. Распачаўся ён св. Імшой, пасля якой адбылася музычная праграма і літаратурная імпрэза. Важнай падзеяй стала бласлаўленне адноўленай мемарыяльнай кампазіцыі, якая нагадвае, што менавіта ў гэтым касцёле 12 ліпеня 1882 года быў ахрышчаны Ян Луцэвіч – паэт Янка Купала.

рэлігійны часопіс    Рэлігійны часопіс
   10 ліпеня 2022 года ў касцёле св. Ігнацыя ў Віцебску а. Віктар Жук склаў свае апошнія манаскія абяцанні, якія прыняў правінцыял Вялікапольска-Мазавецкай правінцыі Таварыства Езуса а. Збігнеў Лячкоўскі SJ.
    Перад абрадам св. Камуніі першы езуіт з Беларусі склаў абяцанні беднасці, чысціні, паслухмянасці, а таксама асаблівай паслухмянасці Святому Айцу. Падчас сваёй фармацыі ў ордэне езуітаў айцец атрымаў добрую багаслоўскую і філасофскую адукацыю.
    14 жніўня 2014 года з рук арцыбіскупа Тадэвуша Кандрусевіча прыняў святарскае пасвячэнне ў Мінску, з чэрвеня 2019 года з’яўляецца пробашчам парафіі св. Уладзіслава. З таго часу а. Віктар вядзе актыўную дзейнасць па ўсёй Беларусі, распаўсюджваючы ігнацыянскую духоўнасць.
   
   
Беларуская рэдакцыя   Беларуская рэдакцыя
   Упершыню ў гісторыі тры жанчыны сталі членамі ватыканскай Дыкастэрыі па справах біскупаў. Гаворка ідзе пра намінацыю дзвюх манахінь і свецкай верніцы. Сярод іх сястра Рафаэла Пэтрыні, італьянская манахіня з кангрэгацыі сясцёр францысканак Эўхарыстыі, прызначаная ў лістападзе 2021 года Генеральным сакратаром Губернатарата Дзяржавы Ватыкан; сястра Івон Рэнгот, французская манахіня, Генеральная настаяцельніца кангрэгацыі Дачок Марыі Успамогі Хрысціян, вядомых таксама як сёстры салезіянкі святога Яна Боско; і італьянка Марыя Лія Дзэрвіна, старшыня Сусветнага аб’яднання Жаночых каталіцкіх арганізацый.
    Святы Айцец Францішак адзначыў, што жанчыны будуць уключаны ў працэс выбару новых пастыраў дыяцэзій.
   
  Інтэрнэт-партал Гродзенскай дыяцэзіі   Інтэрнэт-партал Гродзенскай дыяцэзіі
   У аграгарадку Абухава каля Гродна заклалі фундамент новага касцёла. Святыню будуюць па ініцыятыве вернікаў мясцовай парафіі бл. Міхала Сапоцькі. Да гэтага часу ў Абухаве не было каталіцкай святыні, а ў аграгарадку пражывае каля 300 католікаў. На працягу дзесяцігоддзяў вернікі наведвалі касцёлы ў розных месцах, у асноўным па вялікіх святах. Інакш кажучы, не так часта, як ім хацелася б бываць у святыні. Парафіяне хочуць, каб будучы касцёл быў сціплы, але прыгожы, невялікі, але ўтульны. Па праекце ён разлічаны прыкладна на 80 сядзячых месцаў.