Вялікі тыдзень у пытаннях і адказах

Задай пытанне

Чаму Вялікі тыдзень называецца “вялікім”?
    Паняцце “вялікі” падкрэслівае значэнне гэтага тыдня для ўсяго касцёльнага года, таму што менавіта падчас яго літургічна здзяйсняюцца збаўчыя падзеі.
   
    Што сімвалізуе абмыванне ног 12-ці апосталам?
    Мыццё ног з’яўляецца знакам пакорнай службы і падрыхтаванасці (таксама ў маральным плане) да служэння па прыкладзе Хрыста, які прыйшоў, “каб служыць”. Лічба 12 адсылае да 12-ці пакаленняў Ізраэля і 12-ці Апосталаў, сімвалізуючы колькасць паўнаты ў суадносінах колькасці і якасці (мужчыны з’яўляюцца тут прадстаўнікамі цэлай супольнасці).

    Чаму ў Вялікі чацвер з алтара здымаюцца абрус і аздобы?
    Алтар “абнажаецца” на знак набліжэння балесных падзей, звязаных з мукай і смерцю Хрыста. Гэты абрад прыгадвае, што перад укрыжаваннем Езуса распранулі.
   
    Чаму ў Вялікую пятніцу ў Касцёле не адпраўляюцца св. Імшы?
    Езус у гэты дзень здзейсніў крывавую ахвяру на крыжы, таму Касцёл лічыць немэтазгодным складаць таксама некрывавую ахвяру – св. Імшу.
   
    Чаму ў Вялікую пятніцу ў касцёле так ціха – не ўжываюцца ні званочкі, ні арган?
    Дзень, які называем Вялікай пятніцай, у Іерусаліме быў днём перадсвяточнага шуму, днём падрыхтоўкі да шабату. Для нас ён з’яўляецца часам засяроджання і маўчання. Нічога не павінна перашкаджаць роздуму над смерцю Езуса. Захоўваем цішыню, каб падкрэсліць настрой і сур’ёзнасць характару гэтага дня.
   
    Навошта манстранцыю пасля перанясення ў Гроб Пана накрываюць белым вэлюмам?
    Белы вэлюм, які прыкрывае манстранцыю з Найсвяцейшым Сакрамантам, сімвалізуе плашчаніцу, у якую загарнулі цела Хрыста пасля Яго смерці.
   
    Чаму гаворым, што Пан Езус быў у магіле 3 дні, калі на самой справе гэта былі няпоўныя 2-ое сутак?
    Адказ крыецца ў яўрэйскім разуменні дня, які распачынаўся ад моманту наступлення змроку папярэдняга дня да змроку бягучага. Таму ад падзей пятніцы да нядзелі ўключна атрымліваецца 3 дні (пятніца, субота, нядзеля). Акрамя таго, выкарыстоўваецца сімволіка тройкі, якую прарокі прыводзілі як лічбу поўні, структуры збаўленага свету (неба, зямля і падзямелле) ці таксама самаго Бога. Так, напрыклад, Іона 3 дні знаходзіўся ў чэраве рыбы, Езус мог адбудаваць святыню Божую цягам 3-ох дзён.
   
    Навошта ў ноч Пасхальнай вігіліі перад касцёламі распальваюць вогнішчы?
    Хрыстос стаў вуглавым каменем, з якога выйшла святло свету, асвячаючы ўсю зямлю. Святар бласлаўляе агонь як сімвал Збаўцы, які з цемры магілы выйшаў у нязвыклым бляску. Вогнішча рыхтуецца па-за святыняй у адпаведным месцы.
   
    Навошта падчас цырымоніі асвячэння агню святар убівае ў пасхальную свечку 5 цвікоў?
    Пасхальная свечка сімвалізуе ўваскрослага Хрыста, які памёр на крыжы. Устаўленыя ў яе цвікі – сімвал ран Езуса: Яго прабітыя рукі, ногі і бок. Лічба 5 уключае ў сябе таксама 4 бакі свету, таму цвікі размяшчаюць сіметрычна: усход – захад, поўнач – поўдзень, – а таксама цэнтр свету, якім з’яўляецца Езус Хрыстус як Альфа і Амега.